MALAKIA 3

“Vhonani, ndi ḓo ruma muḓinḓa wanga

ane a ḓo nndugisela nḓila.

Zwenezwo Muṋe waṋu ane na mu lila

u ḓo ḓa thembeleni yawe kathihi fhedzi;

Ene Muruṅwa wa mulanga we na mu ṱulutshela.

U nḓilani.”

₂Huno ane a nga kona

u konḓelela ḓuvha ḽa u ḓa hawe ndi nnyi?

Ndi nnyi ane a nga ima musi a tshi bvelela?

U ḓo nga mulilo wa u bvisa manyelo,

u ḓo nga tshisibe tsha u kuvha.

₃U ḓo nga ane a bvisa manyelo a siliva a i kunisa;

u ḓo kunisa Vhalivi a vha bvisa manyelo

unga musuku na siliva.

Zwenezwo Muṋe washu ndi hone a tshi ḓo wana vhanna

vhane vha ḓo mu ṋekedza nduvho vha sa solei.

₄Ndi hone nduvho dza vhathu vha Juda na Jerusalema

dzi tshi ḓo ṱanganedzwa nga Muṋe washu,

zwa nga sa misi iḽa ya kale,

sa miṅwaha iḽa ya u ranga.

“Ndi ḓo ḓa nda ni haṱula.

A thi nga lengi u sengisa mingome na dziphombwe

na vha anelaho mazwifhi

na vhane vha dzima vhashumi vhavho malamba avho

na vha no kandeledza tshilikadzi na vha si na vhokhotsi,

na vhatsinda,

Nṋe vha sa nnyofhi.”

“Ndi Nṋe Yahavee,

NDI ANE NDA VHA ENE, a thi shanduki.

Hone inwi-vho ni ḓi dzula ni vhana vha Jakopo,

mudziavhufhura muṋe wa dzina.

₇U bva misi ya vhokhotsi aṋu

no ḓi furalela ndayo dzanga na si dzi tevhedze.

Humelani ha Nṋe, na Nṋe ndi ḓo konou humela ha inwi.

Hone ni vhudzisa na ri,

‘Ri ḓo huma hani?’

₈Ndi ri:

Muthu a nga fhura Mudzimu naa?

Hone inwi ni a mphura.

Na dovha na vhudzisa na ri, ‘Ri u fhura nga zwifhio?’

Ni mphura nga u sa bvisa tshafumi na mitendelo.

₉No teketelwa tshoṱhe

ngauri ndi Nṋe ane na ḓi mphura, inwi noṱhe.

₁₀Ḓisani tshafumi tshoṱhe nḓuni ya u vhulungela

uri nḓuni yanga hu vhe na zwiḽiwa.

Nṋe Yahavee Mulangazwoṱhe ndi ri:

Nndingeni nga zwenezwo;

ngoho ndi ḓo vula miṋango ya ṱaḓulu

nda tou ni nisela mashudu.

₁₁Ndi ḓo kaidza nzie dzi si ḽe zwiliṅwa zwaṋu;

minḓirivhe masimuni aṋu a i nga moḓisi.

Hu amba Nṋe Yahavee Mulangazwoṱhe.

₁₂Zwenezwo tshakha dzoṱhe dzi ḓo ri ni na mashudu,

ngauri shango ḽaṋu ḽi ḓo vha ḽi tshi takadza.”

Ho amba Muṋe washu Mulangazwoṱhe.

“Ni vho tou ntswetha.

Hone inwi ni vhudzisa na ri,

‘Ro u swetha nga zwifhio?’

₁₄No ri, ‘U shumela Mudzimu a zwi farisi tshithu.

Ro wana mini nga u tevhedza ndayo dzawe,

ri tshi tshimbila ro ambara madzanganda

sa vha lilaho maṱoni a Yahavee Mulangazwoṱhe?

₁₅Hone zwino vhane vha ḓihudza

ri ri vha na mashudu.

Vhukuma vhaitazwivhi zwi a vha nakela,

vhane vha levhela Mudzimu u a vha litsha.’ ”

₁₆Vhane vha ofha Muṋe washu vha tshi amba nga tshavho,

Muṋe washu a thetshelesa a zwi pfa.

A ri hu ṅwalwe bugu ya tshihumbudzo,

ya avho vhane vha ofha Muṋe washu vha hulisa dzina ḽawe.

₁₇Muṋe washu Mulangazwoṱhe u ri,

“Nga ḓuvha heḽo ḽine nda khou ḽi ḓisa,

vha ḓo vha vhathu vhanga vhane nda vha takalela.

Ndi ḓo vha khathutshela unga khotsi

a tshi khathutshela ṅwana wawe ane a mu shumela.

₁₈Ni ḓo dovha na vhona phambano vhukati ha vhavhuya na vhavhi,

vhukati ha vha no shumela Mudzimu

na vha sa mu shumeli.”