Yesu a tshi fhodza phuli ya mulangagomane wa Muroma
1Musi Yesu o fhedza u vhudza vhathu mafhungo ayo oṱhe, a fhirela Kapernaumi. 2Henefho ho vha hu na mulangagomane wa Muroma, we a vha e na phuli ye a vha a tshi i takalela tshoṱhe. Yeneyo phuli yo vha i tshi khou lwala, u fa na u sa fa tshi tshithu tshithihi. 3Musi mulangagomane a tshi tou pfa nga Yesu, a ruma vhaṅwe vhahulwane vha Majuda uri vha mu humbele a ḓe a fhodze phuli yawe. 4Avho vhaḓinḓa vha tshi swika ha Yesu, vha mu humbela nga zwanḓa zwivhili vha ri, “Vhafunzi, hoyu muthu zwo mu fanela vha tshi mu farisa; 5u funa lushaka lwa hashu; na sinagogo yashu ndi ene o ri fhaṱelaho nga tshelede yawe.” 6Yesu a huma navho; hone musi a tshi tou swika tsini ha muḓi, mulangagomane a rumela khonani dzawe na ipfi ḽi no ri, “Hu pfi Muṋe wanga a songo tsha ṱolou ḓinetisa, ngauri a tho ngo vhuya nda fanela na u mu swielela nḓuni yanga. 7Ndi zwe na u ḓa khae nda vhona zwi songo vhuya zwa mpfanela. Kha a sokou amba ipfi ḽithihi fhedzi; phuli yanga i ḓo fhola. 8Ndi amba ngauri nṋe ndi fhano ndi muthu a langwaho, hone ndi ḓi vha-vho na maswole ane nda a langa. Nda vhudza uno nda ri, ‘Ṱuwa!’ u a ṱuwa; nda vhudza uḽa nda ri, ‘Iḓa!’ u a ḓa; phuli yanga nda i vhudza nda ri, ‘Ita hetshi!’ i a ita.” 9Yesu a tshi pfa zwenezwo a kanuka, a rembuluwa a lavhelesa gogo ḽi khou mu tevhelaho a ri, “Ndi a ni vhudza ndi ri, na kha lushaka lwa Israele a thi athu ṱangana na muthu a re na lutendo lungafha.” 10Avho vhaḓinḓa vha tshi humela hayani vha wana iḽa phuli yo fhola.
Yesu a tshi vusa ṅwana wa muṱhannga wa tshilikadzi o fa
11Nga matshelo Yesu a ya muḓini wa Naini e na vhafunziwa vhawe na gogo ḽihulu. 12Musi a tshi swika khoroni a ṱangana na vhathu vho hwala tshitumbu tsha muṱhannga we a vha e ene ṅwana muthihi fhedzi wa mme awe wa tshilikadzi, vho tangiwa nga vhathu vhanzhi vha henefho muḓini. 13Musi Muṋe washu a tshi vhona tshilikadzi iyo a khathuwa mbilu, a amba nae a ri, “Ni songo lila.” 14A sendela a fara hingo ḽa mufu, vhahwali vhaḽo vha ima. Ndi hone a tshi amba na mufu a ri, “Muṱhannga, ndi ri vuwani!” 15Mufu a mbo ḓi vuwa a dzula, a thoma u amba. Yesu a mu kumedza mme awe. 16Vhathu vhoṱhe vha farwa nga nyofho, vha khoḓa Mudzimu vha ri, “Ho bvelela muporofita muhulu kha riṋe; Mudzimu o vhavhalela vhathu vhawe!” 17Zwenezwo zwe Yesu a ita zwa pfala shangoni ḽoṱhe ḽa Judia zwa swika na mashangoni oṱhe o ṋekanaho masakha naḽo.
Vhafunziwa vha Johanisi Mulovhedzi vha tshi ḓa kha Yesu
18Zwino na Johanisi vhafunziwa vhawe vha mu vhudza-vho zwe Yesu a ita. Ndi hone ene a tshi vhidza vhavhili vhavho, 19a vha ruma ha Muṋe washu uri vha vhudzise vha ri, “Nṋa ndi vhone vhe vha pfi vha ḓo ḓa kana ri ḓi lindela muṅwe zwashu?” 20Vhaḽa vhaḓinḓa vha tshi swika ha Yesu vha ri, “Vhafunzi, Johanisi Mulovhedzi o ri ruma khavho uri ri vhudzise arali vhe vhone vhe vha pfi vha ḓo ḓa, uri arali zwi songo ralo ri lindele muṅwe zwashu.”
21Zwenezwo Yesu o vha a tshi khou fhodza vhathu vhanzhi vha sa ḓipfi zwavhuḓi na vha tambudzwaho nga malwadze, a tshi pandela na thuṅwa dza Saṱhane kha vhanzhi, na u swingulusa mabofu manzhi. 22Ndi hone a tshi fhindula avho vhaḓinḓa a ri, “Iyani ni vhudze Johanisi zwe na tou vhona nga aṋu maṱo na zwe na tou pfa nga dzaṋu nḓevhe: mabofu a vho vhona; zwihole zwi vho tshimbila; vha lwalaho malwadze a lukanda a kumadzaho vha khou fhodzwa; madzinganḓevhe a vho pfa; vhafu vha khou vuswa; vha si na tshavho vha khou funzwa mafhungo maḓifha. 23U na mashudu ane a sa gunee.”
24Vhaḓinḓa vha Johanisi vho no ṱuwa, Yesu a thoma u amba na vhathu nga Johanisi a ri, “No vha no yo vhona mini sogani? No vha no yo vhona luṱanga lu dzinginyiswaho nga muya naa? 25Ndi ri no vha no yo vhona mini? No vha no yo vhona muthu o ambaraho nguvho dza maṱeleṱele naa? Atsina vhonani-ha, vha ambaraho nguvho dza u ḓiṱongisa na vha ḽaho zwiṋu vha wanala pfamoni dza mahosi. 26Ndi khou ri no vha no yo vhona mini? Ho vha hu si u yo vhona muporofita naa? Ee! Nazwino Nṋe ndi ri no vha no yo vhona ane a fhira muporofita. 27Maṅwalo a amba ene Johanisi a tshi ri,
“ ‘Muḓinḓa wanga ngoyu-ha;
ndi khou mu ruma phanḓa hau
uri a u lugisele nḓila.’
28“Ndi a ni vhudza ndi ri: Kha vhathu vhoṱhe vho bebwaho nga musadzi a hu na we a vhuya a fhira Johanisi. Nangwe zwo ralo, Johanisi u fhiriwa na nga muṱukuṱuku muvhusoni wa Mudzimu.” ( 29Vhathu vhoṱhe khathihi na vhathelisi vhe vha vha vho lovhedzwa nga Johanisi vha tshi zwi pfa vha tenda uri Mudzimu ha khakhi. 30Hone Vhafarisei na vhaḓivhi vha Mulayo vho vha vho landula zwe Mudzimu a vha lugisela nga u hana u lovhedzwa nga Johanisi.)
31Yesu a tshi isa phanḓa a ri, “Nṋa vhathu vha musalauno ndi nga vha fanyisa na mini? Vha tou nga mini naa? 32Vha tou nga vhana vhe vanḓani vha tshi khou vhidzelelana vha tshi ri,
“ ‘Ro ni lidzela ṋanga, na hana u tshina!
Ra ni imbela lwa lufu, na hana u lila!’
33“Ndi tshi ralo ndi uri Johanisi Mulovhedzi o ḓa, a ḓidzima, na waini a sa nwe, inwi na ri, ‘U na thuṅwa ya Saṱhane.’ 34Mubebwa-nga-muthu a ḓa; Ene o vha a tshi ḽa, a tshi nwa, na dovha na ri, ‘Vhonani uyu munna – u vhupangwa, e vhudakwa, nahone a si u pfana hawe na vhathelisi na vhatshinyi.’ 35Hone vhuṱali ha Mudzimu vhu vhonala uri ndi ha ngoho kha avho vhane vha vhu ṱanganedza.”
Yesu e muḓini wa Simoni wa Mufarisei
36Muṅwe Mufarisei o vhuya a humbela uri Yesu a ye a ḽe nae ha hawe. Nangoho Yesu a ya nḓuni ya onoyo Mufarisei a dzula zwiḽiwani. 37Henefho muḓini wonoyo ho vha hu na muṅwe musadzi we a vha a tshi tshila vhutshilo vhu nengisaho. Onoyo a tshi pfa uri Yesu u khou ḽa nḓuni ya uyo Mufarisei a ḓa na khambana ya munyaka yo ḓala tshiḓolo tsha u nukhelela 38a ḓa a ima murahu ha Yesu milenzheni yawe, a thoma u lila a tshi rothisela miṱodzi yawe khayo, a i phumula nga mavhudzi awe, a ita na u i khisa a konou i ḓodza tshiḽa tshiḓolo tsha u nukhelela. 39Uyo Mufarisei we a vhidza Yesu a tshi zwi vhona, a ambela mbiluni a ri, “Ngavhe hoyu muthu a vhe muporofita vhukuma o vha a tshi ḓo zwi ḓivha uri uyu musadzi ane a khou mu kwama ndi muthu-ḓe na uri vhutshilo hawe ho tou ita hani, ngauri ndi mutshinyi.” 40Yesu a mbo ḓi ri, “Vho-Simoni!” Simoni a ri, “Vhafunzi vhanga!” 41Yesu a ri, “Ho vha hu na vhaṅwe vhanna vhavhili vhe vha pamba tshelede kha muhadzimisi, muṅwe maseṱha a 500, muṅwe 50. 42Vhuvhili havho vha vho kundwa u lifha. Ndi hone uyo muhadzimisi a tshi thutha milandu yavho vhoṱhe. Zwino kha avho vhavhili, ane a ḓo mu funa u fhira muṅwe ndi ufhio?” 43Simoni a fhindula a ri, “Nṋe ndi vhona unga ndi hoyo we a hangwelwa mulandu muhulwane.” Yesu a ri, “Vho amba zwone.” 44A tshi ralo a rembuluwa a sedza uyo musadzi, a amba na Simoni a ri, “Musadzi uyu vha khou mu vhona? Nṋe ndo ḓa nḓuni yavho, hone a vho ngo nṋea maḓi a u ṱamba milenzhe, hone ene o i ṱanzwa nga miṱodzi yawe, a ita na u i phumula nga mavhudzi awe. 45Vhone a vho ngo nṱanganedza nga u nkuvhatedza, hone ene tshee nda swika ha litshi u khisa milenzhe yanga. 46Vhone a vho ngo vhuya vha nnḓodza mapfura ṱhohoni, hone ene o ḓodza milenzhe yanga nga tshiḓolo tshi nukhelelaho. 47Ndi zwine nda ri, lufuno lungafho lwe a ita lu sumbedza uri o hangwelwa vhutshinyi hawe vhunzhi-vhunzhi. Hone o hangwelwaho vhutshinyi vhuṱuku, na lufuno u sumbedza luṱuku.” 48Ndi hone Yesu a tshi vhudza uyo musadzi a ri, “No hangwelwa vhutshinyi haṋu.” 49Vhaṅwe vho dzulaho zwiḽiwani vha tshi pfa zwenezwo, vha thoma u ambela mbiluni vha ri, “Nṋa uyu ndi ene nnyi ane a nga ita na u hangwela muthu vhutshinyi?” 50Yesu Ene a vhudza uyo musadzi a ri, “Lutendo lwaṋu lwo ni tshidza; ṱuwani zwaṋu no rudza mbilu.”
