LUKASI 24

₁Nga matshelonitsheloni a Swondaha vhaḽa vhasadzi vha bubela tshaloni na iḽa mishonga ye vha lugisa. ₂Vha wana tombo ḽe ḽa vha ḽo vala tshalo ḽo kunguluswa. ₃Vha tshi dzhena vha wana tshitumbu tsha Muṋe washu Yesu tshi si tsheeho. ₄Vha tshee vho hanganea, vha tshenuwa henefho tsini havho ho no ima vhanna vhavhili vho ambara zwiambaro zwi penyaho. ₅Vha kotamisa zwifhaṱuwo nga nyofho, hone avho vhanna vha vha vhudza vha ri, “A tshilaho ni mu ṱoḓelani vhafuni? ₆Haho fhano; o vuwa. Kani-ha no hangwa zwiḽa zwe a ni vhudza a tshee Galelia ₇uri Mubebwa-nga-muthu o fanela u kumedzwa zwanḓani zwa vhatshinyi, a vhambiwa kha tshifhambano a konou vuwa nga ḓuvha ḽa vhuraru?” ₈Ha vha hu hone vhasadzi vha tshi elelwa zwiḽa zwe a amba! ₉Vha ṱuwa tshaloni, vha hanelela ayo mafhungo oṱhe vhafunziwa vha 11 na vhaṅwe ngavho vhoṱhe. ₁₀Avho vhasadzi vho vha vhe Maria Magadalina na Johana na Maria mme a Jakopo. Na vhaṅwe vhe vha vha vhe navho vha vhudza vhaapostola eneo mafhungo. ₁₁Vhaapostola vhone vha pfa zwine vhasadzi vha amba e mafhafhaḓo, vha si tende.

[ ₁₂Pitrosi ene a takuwa a gidimela tshaloni a kotama a ṱolela, a vhona luḽa lukhaha fhedzi. A konou humela hayani a tshi kha ḓi kanuka zwo iteaho.]

₁₃Musi wonoyo vhavhili vhavho vho vha vhe nḓilani ya u ya muḓini wa Emausi, hu re khilomitha dza 11 u bva Jerusalema, ₁₄vha tshi khou tshimbila vha tshi amba nga tshavho nga zwoṱhe zwe zwa itea. ₁₅Vha tshi kha ḓi amba vhe kha mihani yeneyo, Yesu Ene muṋe a sendela a tshimbila navho, ₁₆vhone vha si mu ḓivhe, ngauri maṱo avho o vha o tsirwa. ₁₇Yesu a vha vhudza a ri, “Nṋa ndi afhio ane na khou enda ni tshi hanelelana one?” Vhone vha mbo ḓi ima vho tou ṱungufhala. ₁₈Muṅwe wavho ane a pfi Kleopasi ndi hone a tshi mu vhudzisa a ri, “Nṋa vha tou vha vhone mueni vhe vhoṱhe fhano Jerusalema vha sa ḓivhi zwe zwa itea maḓuvha eneano?” ₁₉Yesu a vhudzisa a ri, “Nṋa ndi zwifhio?” Vhone vha fhindula vha ri, “Ri khou amba zwe zwa itea kha Yesu wa Nazaretha, muporofita we a ḓisumbedza kha zwe a shuma na zwe a amba phanḓa ha Mudzimu na vhathu vhoṱhe e na maanḓa. ₂₀Onoyo, vhotshifhe vhahulwane na vhahulwane vha lushaka lwa hashu vho mu kumedza uri a haṱulelwe lufu, vha mu vhamba kha tshifhambano. ₂₁Riṋe ro vha ro fulufhela uri ndi Ene we a pfi u ḓo vhofholola Israele. Zwino khezwi, ḽo no ḓi vha ḓuvha ḽa vhuraru tshee zwa itea. ₂₂Naho zwo ralo, vhaṅwe vhasadzi vha re vhaṅwe nga riṋe vho ri akhamadza. Vho bubela tshaloni ₂₃vha wana tshitumbu tshawe tshi siho; vha vhuya vha tshi ri vhudza uri vho vhona bono ḽa vharuṅwa vhe vha ri u a tshila. ₂₄Vhaṅwe vhashu vha tshi ya tshaloni vha wana zwiḽa zwe vhasadzi vha amba zwo tou ralo, hone Ene vha si mu vhone.”

₂₅Ndi hone Yesu a tshi vha kaidza a ri, “Nṋa ni tou vha matsilu-ḓe lune mbilu dzaṋu dza konḓa u tenda zwoṱhe zwe vhaporofita vha amba! ₂₆Kani-ha a ho ngo pfi Mesia o fanela u ranga u tambula nga u ralo a konou dzhena vhugalani hawe?” ₂₇Ndi hone a tshi vha ṱalutshedza zwi re Maṅwaloni oṱhe zwine zwa amba Ene, u ranga nga a Mushe u swika kha a vhaporofita vhoṱhe.

₂₈Vhó no vha tsini ha muḓi we vha vha vha tshi khou ya khawo, Yesu a ita unga u a fhira. ₂₉Vhone vha si fune na u zwi pfa, vha ri, “Hufha ḽi tshi vho kovhela, ḽa ṋamusi tshifa ḽo fhela; vhone vha tou eḓela fhano!” Nangoho a dzhena navho henefho. ₃₀Musi o dzula navho zwiḽiwani, a dzhia vhurotho a livhuha; a konou vhu ṅwatekanya a vha kanzwa. ₃₁Ha vha hu hone vha tshi bonyolowa vha vho mu ḓivha, hone Ene a mbo ḓi ri ṋeleṋele. ₃₂Vha amba nga tshavho vha ri, “Ndi zwe ra pfa mbilu dzashu dzi tshi tou swa zwiḽa ri nḓilani a tshi khou ri ṱalutshedza Maṅwalo!”

₃₃Vha mbo ḓi takuwa na zwenezwo vha humela Jerusalema. Henengei vha wana vhaḽa vha 11 vho kuvhangana na vhaṅwe ngavho, ₃₄vha pfa vha tshi ri,

“Nangoho Muṋe washu o vuwa. O ḓisumbedza Simoni!”

₃₅Ndi hone na avho vhavhili vha tshi vho vha anetshela zwe zwa itea vhe nḓilani na uri vho ḓo mu ḓivha musi a tshi khou ṅwatekanya vhurotho.

₃₆Vha tshi kha ḓi hanelela eneo, Muṋe washu nga eṱhe a vha o no ima vhukati havho, a amba navho a ri, “Mulalo u vhe na inwi.”

₃₇Vha tshenuwa vha tou tetemela vha tshi ri vha khou vhona tshirunzi. ₃₈Ene a amba navho a ri, “Nṋa ni khou tshenuswa ngani? Khezwi ni tshi timatima mbiluni dzaṋu? ₃₉Vhonani zwanḓa zwanga na milenzhe khezwi; ndi Nṋe vhukuma. Mphuphuledzeni ni pfe: Hufha ndi na muvhili wa ṋama na marambo; tshirunzi tshi nazwo naa?”

[ ₄₀A tshi ralo a vha sumbedza zwanḓa na milenzhe yawe.] ₄₁A tshi vhona vha sa athu tenda zwavhuḓi nge vha hulelwa nga dakalo na ganuko, a vha vhudzisa a ri, “Nṋa a ni na zwiḽiwanyana afha?” ₄₂Vhone vha mu ṋea tshipiḓa tsha khovhe yo ṱhaṱhiwaho. ₄₃A mbo ḓi tshi dzhia a ḽa vha tshi zwi vhona.

₄₄A dovha a amba navho a ri, “Izwi-ha ndi zwenezwiḽa zwe nda ni vhudza ndi tshee na inwi. Zwoṱhe zwo ṅwalwaho Mulayoni wa Mushe na Maṅwaloni a vhaporofita na kha Dziphisalema zwi tshi amba Nṋe zwo fanela u khunyelela.” ₄₅A konou vha dzivhulusa uri vha ṱalukanye Maṅwalo. ₄₆A vha vhudza a ri, “Ndi zwone zwe zwa ṅwaliwa upfi Mesia o fanela u tambudzwa a vuwa vhafuni nga ḓuvha ḽa vhuraru. ₄₇A vha Ene ane a ni ruma u ḓivhadza tshakha dzoṱhe uri vha rembuluwe vha kone u hangwelwa vhutshinyi. Ni thome Jerusalema. ₄₈Ndi inwi vhane na fanela u ṱanzilela hezwi zwithu. ₄₉Huno Nṋe ndi ḓo ni rumela tshe Khotsi anga a ni fulufhedzisa. Zwino inwi ni dzule fhano Jerusalema ni vhuye ni ṋewe ayo maanḓa a bvaho ṱaḓulu.”

₅₀A bva navho o vha ranga phanḓa u vhuya u sendela tsini ha Bethania. Henefho a imisa zwanḓa zwawe a vha shudufhadza. ₅₁A tshi khou vha shudufhadza a mbo ḓi ṱuwa khavho a takulelwa ṱaḓulu. ₅₂Vhone vha mu gwadamela vha konou humela Jerusalema vhe na dakalo fulu. ₅₃Vha ḓi ṱwa thembeleni vha tshi renda Mudzimu.