LUKASI 2

₁Misi yeneyo khisara Agostosi a bvisa ndaela ya uri vhathu vhoṱhe nga shango vha vhaliwe. ₂Musi u vhaliwa hohu ha u thoma hu tshi vha hone ndi musi Khwiriniasi e muvhusi wa Siria. ₃Muṅwe na muṅwe a yo ḓiṅwalisa ha hawe.

₄Josefa na ene a ṱuwa muḓini wa Nazaretha shangoni ḽa Galelia a ya Judia, muḓini wa Dafita u no pfi Betlehema. A tshi vhuya a ya Betlehema ndi uri na ene Josefa o vha e muḓuhulu wa Dafita. ₅A tshi ya u ḓiṅwalisa a ṱuwa na Maria muselwa wawe we a vha e muthu wa thovhela. ₆Vhe henefho Betlehema tshifhinga tshawe tsha u vhofholowa tsha swika; ₇a beba ṅwana wawe wa mutukana wa tanzhe, a mu putela nga masila a mu ladza mukungwani, ngauri nnḓu ya vhaeni yo vha yo no ḓala.

₈Henefho shangoni ḽeneḽo ho vha hu na vhalisa vho bva mathaga, vha tshi lisa nngu vha tshi lala ḓakani. ₉Muruṅwa wa Muṋe washu a ima vhukati havho, vha vhonetshelwa nga lupenyo lwa Mudzimu, vha farwa nga nyofho khulu. ₁₀Hone muruṅwa a amba navho a ri, “Ni songo ofha! Ndi fhano ndo ni ḓela na fhungo ḽavhuḓi ḽa dakalo fulu ḽi re ḽa lushaka lwoṱhe. ₁₁Vhusiku ha ṋamusi no bebelwa Mutshidzi fhaḽa muḓini wa Dafita, Ene Mesia Muṋe washu! ₁₂Tshiga tshine na ḓo mu ḓivha ngatsho khetshi: Ni ḓo wana ṅwana o pombedzwa nga masila o ladzwa mukungwani.” ₁₃Ndi hone henefho tsini ha muruṅwa hu tshi mbo ḓi bvelela mmbi khulu ya vharuṅwa vha ṱaḓulu vha tshi khou renda Mudzimu vha tshi ri,

₁₅Musi vharuṅwa vha tshi vha ṱutshela vha tshi vhuelela ṱaḓulu, vhalisa vha amba nga tshavho vha ri, “Kha ri ye Betlehema ri yo vhona hezwo zwithu zwo iteaho zwe ra vhudzwa nga Muṋe washu.” ₁₆Nangoho vha mbo ḓi vhilula, vha wana Josefa na Maria, na ṅwana o ladzwa mukungwani. ₁₇Vhalisa vha tshi wana zwo tou ralo vha vhudza Josefa na Maria zwe muruṅwa a amba nga ṅwana. ₁₈Vhoṱhe vhe vha pfa zwe vhalisa vha amba, vha kanuka. ₁₉Maria ene haya mafhungo oṱhe a a vhulunga mbiluni yawe, a ḓi dzula a tshi a humbula. ₂₀Vhalisa vha huma vha tshi khou renda Mudzimu vha tshi mu khoḓela zwe vha zwi pfa na zwe vha zwi vhona; ngauri zwe muruṅwa a amba zwo vha zwo tou ralo.

₂₁Nga ḓuvha ḽa vhuṱanu-na-vhuraru, tshifhinga tsha uri ṅwana a fumbe tshi tshi swika, vha mu ira dzina ḽi no pfi Yesu, ḽiḽa ḽe a irwa nga muruṅwa a sa athu vha hone muvhilini wa mme awe.

₂₂Ha swika tshifhinga tsha uri Josefa na Maria vha tevhedze zwe zwa tiwa kha Mulayo wa Mushe zwa vhuṱambo ha u kumululwa. Ndi hone vha tshi dzhia ṅwana vha ya nae Jerusalema u yo mu sumela Mudzimu, ₂₃vha tshi tevhedza zwo ṅwalwaho kha Mulayo wa Muṋe washu hu no pfi, “Tanzhe ḽiṅwe na ḽiṅwe ḽa tshiduna ndi ḽa Mudzimu.” ₂₄Ndi zwe vha ita na u isa musumo vha tshi tevhedza zwo ambiwaho nga Mulayo wa Muṋe washu hu tshi pfi, “Hu iswe zwiivhamuronzhe zwivhili kana mafhondo mavhili a maivha.”

₂₅Henefho Jerusalema ho vha hu tshi dzula muṅwe muthu we a vha a tshi pfi Simioni, munna muvhuya we a vha a tshi ofha Mudzimu. O vha e na Muya Mukhethwa, o ḓi dzula o lindela ḓuvha ḽine Mudzimu a ḓo fhumudza Vhaisraele ngaḽo. ₂₆Ene Muya o vha o no mu dzumbululela uri ha nga fi a sa athu vhona Mesia wa Muṋe washu. ₂₇Zwino ḽiṅwe ḓuvha Muya Mukhethwa a mu isa thembeleni. Musi vhabebi vha Yesu vha tshi mu ḓisa thembeleni vha tshi tevhedza zwe Mulayo wa amba, ₂₈Simioni a mbo ḓi ṱanganedza ṅwana a mu angaḓedza a livhuha Mudzimu a ri,

₃₃Khotsi na mme awe vha tshi pfa zwine Simioni a amba nga ṅwana, vha akhamala. ₃₄Simioni a vha shudufhadza a konou amba na Maria mme a ṅwana a ri, “Hoyu ṅwana o nangiwa nga Mudzimu uri a vhe tshiwisi na tshivusi tsha vhathu vhanzhi vha Israele; u ḓo vha tshiga tsha Mudzimu tshine tsha ḓo landulwa nga vhathu. ₃₅Zwi tshi ralo ndi hone hu tshi ḓo dzumbuluwa zwiphiri zwi re khanani dza vhanzhi. A vha iwe vhuṱungu vhu ḓo u rumbula mbilu zwa tou nga i khou rungwa nga pfumo.”

_36-37Na muporofita muṅwe-vho o vha e hone, wa musadzi we a vha a tshi pfi Ana, ṅwana wa Fanuele, wa tsinde ḽa Ashere. O vha o no vha mukegulu wa miṅwaha ya 84, o fhedza miṅwaha ya 7 e na munna, hone zwino o vha o no vha tshilikadzi. O vha a sa ṱuwi thembeleni, a tshi ṱwa a tshi luvha Mudzimu vhusiku na masiari, a tshi ḓidzima, a tshi rabela. ₃₈Zwino nga tshenetsho tshifhinga a vha u a swika khavho, a livhuha Mudzimu; a enda a tshi amba na vhoṱhe vhe vha vha vho lindela Mudzimu a tshi lamulela Jerusalema, a vha ṱalutshedza nga ṅwana.

₃₉Musi vho no khunyeledza zwoṱhe zwo tiwaho nga Mulayo wa Muṋe washu, vha humela Galelia muḓini wa havho wa Nazaretha. ₄₀Ṅwana a aluwa a vha na nungo na vhuṱali vhuhulu, na Mudzimu a mu itela vhuthu.

₄₁Ṅwaha muṅwe na muṅwe vhabebi vha Yesu vho vha vha tshi ya Jerusalema nga vhuṱambo ha Paseka.

₄₂Musi Yesu e na miṅwaha ya 12 vha ḓi ya vhuṱamboni sa misi. ₄₃Musi maḓuvha a vhuṱambo o no fhela, vha fara lwendo lwa u humela hayani, Yesu a sala Jerusalema vhabebi vhawe vha sa zwi ḓivhi, ₄₄vha tshi ḓi ri u na vhaṅwe. Vha tshimbila ḓuvha ḽoṱhe vha tshi khou mu ṱoḓa mashakani na kha khonani dzavho, ₄₅hone vha si mu wane, vha vhuya vha tou humela Jerusalema vha tshi mu ṱoḓa. ₄₆Nga ḓuvha ḽa vhuraru vha konou mu wana thembeleni o dzula na vhafunzi vha Majuda a tshi khou vha thetshelesa, a tshi ita na u vhudzisa dzimbudziso. ₄₇Vhoṱhe vhe vha mu pfa vha kanuka ṱhalukanyo yawe na phindulo dzawe. ₄₈Musi vhabebi vhawe vha tshi mu vhona vha akhamala, mme awe vha ri, “Ṅwananga, ni ri itani? Tshee nṋe na muṋe waṋu ra ṱolou tambula ri tshi khou ni ṱoḓa!” ₄₉Ene a fhindula a ri, “Vho nṱoḓelani huṅwe? A vha zwi ḓivhi uri ndi fanela u vha nḓuni ya Khotsi anga?” ₅₀Hone vhone vha si kone u ṱalukanya uri a tshi ralo u amba mini.

₅₁Ndi hone Yesu a tshi humela navho Nazaretha, a dzula a tshi vha thetshelesa. Mme awe vhone vha vhulunga zwithu zwoṱhe hezwo mbiluni yavho. ₅₂Yesu Ene a aluwa, na vhuṱali hawe vhu tshi ḓi hulela vhu tshi ya, na u takalelwa hawe nga Mudzimu na vhathu zwa ḓi hulela zwi tshi ya.