ZWILILO 3

₁Nṋe ndi munna we a pfiswa vhuṱungu

Muṋe washu a tshi nthwa nga mbiti.

₂O nthathela kule a ita uri nṋe ndi tshimbile swiswini

hu si na tshedza;

₃ngangoho o khetha nṋe uri a ntsukumedzele kule,

a dovha, ḓuvha ḽoṱhe.

₄O kalahisa lukanda lwanga a nnyondisa,

a mpwasha marambo.

₅O nngovhela a ntangela ngomu nga vhutulu na zwi konḓaho.

₆O ita uri ndi dzule swiswini unga vho faho kale.

₇O ntangela ngomu nga mutsheṱo, a thi koni u ponyoka;

o mmbofha nga geḓane dzi lemelaho.

₈Naho ndi tshi ṱavha mukosi nda ri, “Mphalale!”

ha thetshelesi thabelo yanga.

₉O thivha nḓila yanga nga murango,

o kombamisa nḓila dzanga.

₁₀O vha a tshi nga biara yo lalelaho,

a tshi nga ndau yo dzumbamaho,

₁₁a nkhwikhwidza a mmvisa nḓilani a ntumukanya

a ntsia ndi khuvhabvu.

₁₂O akha vhura hawe

a nnyita tshipfulwa tsha misevhe yawe.

₁₃O ṱomola misevhe yawe mukutuni a tou rumbula mbilu yanga ngayo.

₁₄Vhathu vhoṱhe vha hashu vha a ntsea,

vha nngoḓa nga zwiimbo zwavho ḓuvha ḽoṱhe.

₁₅O nndyisa miri i kalakataho,

a nthamisa nga ndulu.

₁₆O mpwasha maṋo nga thombwana nga u nkhurudzha mavuni.

₁₇Ndo vha ndi tshi khou kundiswa mulalo;

ndo no hangwa na uri mashudu ndi mini.

₁₈Ndi zwine nda ri, “Ndi hone ndo lovha

na zwoṱhe zwe nda vha ndo lavhelela

uri Muṋe washu u ḓo nnyitela.”

₁₉Ndi tshi elelwa u tambula hanga na u tendeleka hanga,

zwi kalakata unga ndulu na vhutulu.

₂₀Nda zwi elekanya nda dovha,

nda kulea nungo.

₂₁Naho zwo ralo

ndi dovha nda fulufhela ndi tshi elelwa uri

₂₂lufuno lwa Muṋe washu a lu fheli.

Ndi zwe ra si nyenge;

khathutshelo yawe a i gumi.

₂₃Matsheloni maṅwe na maṅwe i a vusuluswa;

u fulufhedzea hau ndi huhulu.

₂₄Ndi ḓivhudza nda ri,

“Muṋe washu ndi Ene mukovhe wanga,

zwenezwo ndi ḓo fulufhela Ene.”

₂₅Vhane vha mu fulufhela vha mu ṱoḓa,

Muṋe washu u a vha tonda.

₂₆Ndi zwavhuḓi u lindela

u tshidzwa nga Muṋe washu wo dzika.

₂₇Ndi zwavhuḓi muthu a tshi hwala dzhogo

a tshee nga hawe.

₂₈Nga a dzule e eṱhe e tshete;

o i hweswa nga Muṋe washu.

₂₉Nga a ḓiṱukufhadze,

zwe a lavhelela zwi nga kha ḓi ḓa.

₃₀Luṱaha lwawe nga a lu ṋekedze ane a mu rwa,

nga' niwe zwawe nga ṱhoni.

₃₁Muṋe washu ha laṱi vhathu lini na lini.

₃₂Naho a tshi vha ḓisela zwi vhavhaho,

u ḓo vha khathutshela;

lufuno lwawe ndi luhulu, a lu fheli.

₃₃A tshi tambudza vhana vha vhathu

ha itwi nga u takalela u vha vhaisa.

₃₄Zwivhotshwa zwoṱhe zwi tshi kandeledzwa shangoni,

₃₅muthu a tshi kundiswa u wana pfanelo dzawe

dzine Waṱaḓuluṱaḓulu a vhona zwo mu fanela,

₃₆muthu a sa wani zwo mu fanelaho tsengoni,

zwo raloho Muṋe washu ha zwi vhoni naa?

₃₇Ndi nnyi ane a nga ri u amba tshithu tsha vha hone

arali Muṋe washu a songo ri zwi ralo?

₃₈Hu tshi ḓa khombo na zwivhuya,

a si nge Waṱaḓuluṱaḓulu a ri zwi vhe hone naa?

₃₉Muthu a nga gungulelani?

Hufha a tshi kha ḓi tshila naho e mutshinyi!

₄₀Nga ri dzou sedza nḓila dzashu nga nthihi nga nthihi,

ri humele ha Muṋe washu.

₄₁Nga ri livhise mbilu dzashu na zwanḓa zwashu

ha Mudzimu a re ṱaḓulu ri ri,

₄₂“Ro tshinya ra u shandukela,

Iwe wa si ri hangwele.”

₄₃Wo ḓiputela nga mbiti dzau wa ri pandamedza,

wa ri vhulaha u sa khathutsheli.

₄₄Wo ḓiputela nga gole,

uri hu si vhe na thabelo ine ya phuletshedza

ya swika ha Iwe.

₄₅Wo ri ita mathukhwi na malambelo vhukati ha dzitshakha.

₄₆Maswina ashu oṱhe o ri nyadza a ri holedza.

₄₇Ri ofha ra tou tetemela,

ro lovha, ro pwashekana.

₄₈Maṱo anga a shuluwa milambo ya miṱodzi

nge vhathu vhanga vha lozwiwa.

₄₉Maṱo anga a ḓo ḓi shuluwa miṱodzi i sa fheli,

a sa litshi,

₅₀Muṋe washu a vhuye a lavhelese fhasi e ṱaḓulu

a zwi vhona.

₅₁Mbilu yanga i a vhavha

ndi tshi vhona zwi itwaho vhasadzi vhoṱhe vha muḓi wa hashu.

₅₂Vhe vha vha vha tshi sokou mmbenga

vho vha vha tshi nnzwima unga tshiṋoni.

₅₃Vho mposa dindini vha khokhela matombo;

₅₄maḓi a ntibedza ṱhoho,

nda vhona unga ndi hone ndo fa.

₅₅Ndo vhidzelela dzina ḽau, Iwe Muṋe wanga,

ndi fhasi-fhasi dindini.

₅₆Iwe wa pfa khumbelo yanga ndi tshi ri,

“U songo litsha u thetshelesa

ndi tshi u ṱavhela mukosi uri u nthule.”

₅₇Ndi tshi u vhidza,

wo ḓa tsini hanga wa ri,

“U songo ofha tshithu.”

₅₈Iwe Muṋe wa zwoṱhe, wo ntsengela wa ntshidza.

₅₉Iwe Muṋe washu wo vhona u khakhelwa hanga.

Ima na nṋe!

₆₀Wo vhona he ndifhedzo yavho ya guma hone,

na zwoṱhe zwine vha nndangana.

₆₁Iwe Muṋe washu,

wo pfa maṱamba avho,

na zwoṱhe zwine vha nndangana,

₆₂zwine maswina anga a hevhedza,

a ntsatsaladza ḓuvha ḽoṱhe.

₆₃Edzou vha vhona!

Arali vho dzula kana vho ima,

vha nkolela nga nyimbo dzavho.

₆₄Iwe Muṋe washu, u lifhedza muthu

nga zwo mu teaho;

ndi zwone, vha lifhedze zwe vha zwi ita

vhone vhaṋe.

₆₅Vha na mbilu dza u ḓihudza –

ngavhe vha tshi teketelwa nga yone swili yavho.

₆₆Vha pandamedze wo sinyuwa u vha lozwe,

u vha tupule vha si tsha vha hone

fhasi ha lutombo lwa Muṋe washu.