JOSHUA 4

₁Musi lushaka lwoṱhe lwo no wela Jorodani, Muṋe washu a amba na Joshua a ri, ₂“Khetha vhanna vha 12, muthihi kha tsinde muthihi kha tsinde, ₃u vha vhudze vha dzhie matombo a 12 vhukati ha mulambo wa Jorodani, henefhaḽa he vhotshifhe vha vha vho ima hone, vha ṱuwe vho a hwala, vha a vhee fhasi hune na ḓo lala hone vhusiku ha ṋamusi.”

₄Ndi hone Joshua a tshi vhidza vhaḽa vhanna vha 12 vhe a vha o vha khetha, ₅a vha vhudza a ri, “Dzhenani mulamboni wa Jorodani ni fhire phanḓa ha mbulungelo ya mulanga ya Muṋe washu Mudzimu waṋu, muṅwe na muṅwe a hwale tombo nga shaḓa ḽawe, zwi tshi tevhedza mbalo ya matsinde a Vhaisraele. ₆Matombo hayo a ḓo humbudza vhathu zwe Muṋe washu a ita. Misi i ḓaho, arali vhana vhaṋu vha ni vhudzisa zwine ayo matombo a amba, ₇ni vha vhudze uri maḓi a mulambo wa Jorodani o litsha u ela musi mbulungelo ya mulanga wa Yahavee i tshi wela uyu mulambo. Matombo hayo a ḓo dzula a tshi humbudza Vhaisraele zwe zwa itea hafhano.”

₈Vhanna avho vha tevhedza zwe Joshua a amba. Vha dzhia matombo a 12 a tshi bva vhukati ha mulambo wa Jorodani, vha tshi tevhedza mbalo ya matsinde a Vhaisraele, vha a hwala vha a isa hune vha ḓo lala hone, vha a vhea fhasi henefho, nga he Muṋe washu a vhudza Joshua. ₉Joshua na ene a imisa matombo a 12 vhukati ha mulambo wa Jorodani, henefhaḽa he ha vha ho ima vhotshifhe vho hwalaho mbulungelo ya mulanga. Matombo hayo a kha ḓi vha henefho na ṋamusi. ₁₀Vhotshifhe vho ima vhukati ha Jorodani ha vhuya ha itwa zwoṱhe zwe Muṋe washu a vhudza Joshua uri a vhudze vhathu vha zwi ite. Hezwo ndi zwe Mushe a ri zwi itwe. Vhathu vha wela mulambo nga u ṱavhanya. ₁₁Musi vhoṱhe vho no vha seli na luḽa, vhotshifhe vho hwalaho mbulungelo ya mulanga wa Muṋe washu vha dovha vha ranga vhathu phanḓa. ₁₂Vhanna vha tsinde ḽa Rubeni na ḽa Gadi na hafu ya vha tsinde ḽa Manase vho vha vho ḓilugisela nndwa, vha vha vhone vho rangaho vhathu phanḓa vha tshi wela mulambo, nga he Mushe a vha vhudza. ₁₃Vhe vha vha vho shomela nndwa vha nga vha vho swika 40 000; vhenevho vha wela seli phanḓa ha Muṋe washu vha ya mudavhini wa Jerikho. ₁₄Zwe Muṋe washu a ita uyo musi zwo ita uri Vhaisraele vha vhone Joshua e munna muhulwane, vha mu hulisa vhutshilo hawe hoṱhe, zwa nga vha tshi hulisa Mushe.

₁₅Ndi hone Muṋe washu a tshi vhudza Joshua ₁₆uri a vhudze vhotshifhe vho hwalaho mbulungelo i na Mulayo uri vha bve mulamboni wa Jorodani. ₁₇Joshua a ita nga u ralo, ₁₈musi vhotshifhe vho hwalaho mbulungelo ya mulanga wa Muṋe washu vha tshi bva mulamboni, hezwi vha tshi tou kanda bamani, mulambo wa dovha u ela, wa dovha wa ḓala wa ita na u fhalala.

₁₉Vhathu vho wela mulambo wa Jorodani nga ḓuvha ḽa fumi ḽa ṅwedzi wa u thoma, vha yo ṱoka mishasha Giligala, vhubvaḓuvha ha Jerikho. ₂₀Henefho Joshua a imisa matombo aḽa a 12 e a dzhiwa mulamboni wa Jorodani. ₂₁Joshua a vhudza Vhaisraele a ri, “Misi i ḓaho, arali vhana vhaṋu vha ni vhudzisa zwine ayo matombo a amba, ₂₂ni vha vhudze zwa musi Vhaisraele vha tshi wela mulambo wa Jorodani wo oma. ₂₃Ni vha vhudze uri Muṋe washu Mudzimu waṋu o xisa maḓi a Jorodani a tshi itela inwi na vhuya na wela seli, sa zwe a xisa maḓi a Lwanzhe lwa Dziṱhanga ra lu wela. ₂₄Muṋe washu o ita hezwo uri tshakha dzoṱhe dza ḽifhasi dzi ḓivhe uri u na maanḓa, inwi ni hulise Muṋe washu Mudzimu waṋu misi yoṱhe.”