JOSHUA 3

₁Nga matshelo Joshua na Vhaisraele vhoṱhe vha tou fhinduwa, vha ṱuwa mishashani ya Shitimu, vha livha Jorodani, vha ṱoka mishasha henefho vho lindela u wela mulambo. ₂Hó no fhela maḓuvha mararu vhakoma vha buḓekanya mishasha, ₃vha vhudza vhathu vha ri, “Musi ni tshi vhona vhotshifhe, vhone Vhalivi, vhó hwala mbulungelo ya mulanga ya Muṋe washu Mudzimu waṋu, ni bve mishashani ni vha tevhele. ₄Inwi ndi u thoma ni tshi ḓa fhano, zwenezwo vha ḓo ni sumbedza nḓila ine na ḓo i fara. Hone ni songo sendela tsini ha mbulungelo ya mulanga, ni tevhele nó sia tshikhala tsha khilomitha nthihi vhukati haṋu na yone.”

₅Joshua a dovha a vhudza vhathu a ri, “Ḓikumululeni Muṋe washu ngauri matshelo u ḓo ni itela maḓembe.” ₆Ndi hone a tshi vhudza vhotshifhe uri vha hwale mbulungelo ya mulanga vha tshimbile nayo phanḓa ha vhathu. Vhone vha ita zwe a amba.

₇Muṋe washu a vhudza Joshua a ri, “Ṋamusi ndi ḓo thoma u u hulisa Vhaisraele vhoṱhe vha tshi zwi vhona, ndi hone vha tshi ḓo zwi ḓivha uri ndi na iwe sa zwe nda vha ndi na Mushe. ₈Vhudza vhotshifhe vho hwalaho mbulungelo ya mulanga uri musi vha tshi swika mulamboni, vha ri u kanda maḓini vha ime henefho.”

₉Joshua a vhudza Vhaisraele a ri, “Iḓani fhano ni pfe zwine Muṋe washu Mudzimu waṋu a amba. ₁₀Vhukumakuma ni ḓo ri ni tshi swika a thatha Vhakanana na Vhahithi na Vhahivi na Vhapherisi na Vhagirigashi na Vhaamori na Vhajebusi. Ndi hone ni tshi ḓo zwi ḓivha uri Mudzimu a tshilaho u na inwi, ₁₁musi mbulungelo ya mulanga ya Muṋe wa ḽifhasi ḽoṱhe i tshi wela Jorodani yó ni ranga phanḓa. ₁₂Zwino-ha, nangani vhanna vha 12, muthihi kha tsinde ḽiṅwe na ḽiṅwe ḽa Vhaisraele. ₁₃Vhotshifhe vho hwalaho mbulungelo ya mulanga ya Yahavee Muṋe wa ḽifhasi ḽoṱhe vha ḓo ri u longa ṋayo dzavho maḓini, mulambo wa Jorodani wa si tsha ela, maḓi a no tsa a tshi ela a ḓo ima fhethu huthihi.”

_14-15Tsho vha tshi tshifhinga tsha u kaṋa, mulambo wa vha wo ḓala wa ita na u fhalala.

Musi vhathu vha tshi takuwa mishashani uri vha yo wela Jorodani, vhotshifhe vha vha ranga phanḓa vho hwala mbulungelo ya mulanga. Ha ri milenzhe ya vhotshifhe i tshi tou kanda maḓini, ₁₆maḓi a si tsha ela, a raha a swika muḓini wa Adamu u re tsini ha Tsarethani. Maḓi a no ela a tshi tsela Lwanzheni lwa Muṋo o vha o tumuwa tshoṱhe, vhathu vha konou wela mulambo tsini ha Jerikho. ₁₇Musi vhathu vha tshi khou tshimbila vha tshi wetshela seli nga ho omaho, vhotshifhe vho hwalaho mbulungelo ya mulanga ya Muṋe washu vha vha vhó ima mavuni o omaho vhukati ha mulambo vha sa sudzuluwi vhathu vhoṱhe vha vhuya vha wela seli.