JOSHUA 12

₁Vhaisraele vho vha vho no ḓi kunda shango ḽa vhubvaḓuvha ha Jorodani vha dzula khaḽo, u bva govhani ḽa Arinoni u gonya na govha ḽa Jorodani, u swika thavhani ya Heremoni thungo ya devhula. ₂Mahosi e vha kunda ndi mavhili, muṅwe o vha Sihoni, khosi ya Vhaamori we a vha a tshi vhusa Hesheboni. Muvhuso wawe wo vha wo angaredza na hafu ya Giliadi: u bva Aruere, lumemeni lwa govha ḽa Arinoni, na muḓi u re vhukati ha govha ḽeneḽo, u vhuya u swika mulamboni wa Jaboko, masakhani a Amoni; ₃wa angaredza govha ḽa Jorodani u bva dzivhani ḽa Khinirethe tshipembe, u swika Bethe Jeshimotho, vhubvaḓuvha ha Lwanzhe lwa Muṋo, u livha tsindeni ḽa thavha ya Phisiga.

₄Vha kunda na Ogo khosi ya Bashani. Ndi ene wa u fhedza wa Vharefai; o vha a tshi vhusa Ashtharotho na Edrei. ₅Muvhuso wawe wo vha u tshi angaredza na thavha ya Heremoni na Salekha na ḽoṱhe ḽa Bashani u swika mikanoni ya Geshuru na Maakha, khathihi na hafu ya Giliadi u swika shangoni ḽa Sihoni khosi ya Hesheboni.

₆Mahosi hayo mavhili o kundwa nga Mushe na Vhaisraele. Mushe muḓinḓa wa Muṋe washu o dzhia mashango avho a a ṋea matsinde a Rubeni na Gadi na hafu ya tsinde ḽa Manase uri ḽi vhe ḽavho.

₇Joshua na Vhaisraele vhone vho kunda mahosi oṱhe shangoni ḽa vhukovhela ha Jorodani, u bva Baali Gadi govhani ḽa Libanoni u swika thavhani ya Halaka thungo ya tshipembe tsini ha Seiri. Joshua iḽo shango o ḽi kovhekanya matsinde a Israele, a vha ṋea uri ḽi dzule ḽi ḽavho. ₈Mukovhe hoyo wo vha u tshi angaredza na shango ḽa mivhundu na midavhini i re tsini ha lwanzhe na govha ḽa Jorodani na midavhi yaḽo na Negeve. Shango heḽo ḽo vha ḽi tshi dzula Vhahithi na Vhaamori na Vhakanana na Vhapherisi na Vhahivi na Vhajebusi. ₉Vhaisraele vho kunda mahosi a miḓi hei: Jerikho na Ai tsini ha Bethele ₁₀na Jerusalema na Hebroni ₁₁na Jaramuthu na Lakhishi ₁₂na Egiloni na Gezere ₁₃na Debiri na Gedere ₁₄na Horoma na Aradi ₁₅na Libina na Adulamu ₁₆na Makeda na Bethele ₁₇na Thaphua na Hefere ₁₈na Afeke na Lasharoni ₁₉na Madoni na Hatsoro ₂₀na Shimironi Meroni na Akhashafu ₂₁na Thaanakha na Megido ₂₂na Kedeshe na Jokoniamu kha ḽa Kharamele, ₂₃na Doro tsini ha lwanzhe, na Goimi kha ḽa Galelia ₂₄na Thiritsa. Mahosi vhoṱhe vho ṱangana ndi 31.