JOSHUA 1

₁Musi Mushe muḓinḓa wa Muṋe washu o no fa, Muṋe washu a amba na tshanḓa tsha Mushe, Joshua ṅwana wa Nunu, a ri, ₂“Mushe muḓinḓa wanga o fa. Zwino iwe na Vhaisraele vhoṱhe ḓilugiseni, ni wele mulambo wa Jorodani ni wetshele shangoni ḽine nda ni ṋea ḽone. ₃Ndi ni ṋea shango ḽoṱhe ḽine na ḓo kanda khaḽo, sa zwe nda vhudza Mushe. ₄Mukano wa shango ḽaṋu thungo ya tshipembe u ḓo thoma phangani wa swika thavhani dza Libanoni thungo ya devhula; thungo ya vhubvaḓuvha u ḓo bva mulamboni muhulu wa Yufuratha, wa buḓekanya shango ḽa Vhahithi, u swika Lwanzheni lwa Phandamashango thungo ya vhukovhela. ₅A hu na ane a ḓo kona u imedzana na iwe vhutshilo hau hoṱhe. Ndi ḓo vha na iwe unga ndo vha ndi na Mushe. Ndi ḓo dzula ndi na iwe, ndi nga si vhuye nda u ṱutshela. ₆Ivha na nungo u ime wo khwaṱha, ndi iwe ane wa ḓo vha murangaphanḓa wa vhathu havha musi vha tshi dzhia shango ḽe nda fulufhedzisa vhomakhulukuku wavho uri ndi ḓo vha ṋea ḽone. ₇Ivha na nungo u ime wo khwaṱha tshoṱhe, u tevhedze ndayo dzoṱhe dze muḓinḓa wanga Mushe a u ṋea. U songo litsha kupiḓa na kuthihi kwadzo, ndi hone zwi tshi ḓo u nakela hoṱhe hune wa ya. ₈U ite uri misi yoṱhe ni tshi nnduvha bugu ya mulayo i vhalwe. I gude vhusiku na masiari, u vhone uri u tevhedze zwoṱhe zwo ṅwalwaho khayo. Ndi hone zwi tshi ḓo u nakela wa zwi kona. ₉Asizwo-ha, ndo u vhudza nda ri u vhe na nungo u ime wo khwaṱha! U songo ofha tshithu, u songo kulea nungo, Nṋe Yahavee Mudzimu wau ndi na iwe hoṱhe-hoṱhe hune wa ya.”

₁₀Ndi hone Joshua a tshi vhudza vhakoma ₁₁uri vha tshimbile na mishasha, vha vhudze vhathu vha ri, “Lugisani mbuvha, ho sala maḓuvha mararu ni tshi wela mulambo wa Jorodani na dzhia shango ḽine Muṋe washu Mudzimu waṋu a ni ṋea uri ḽi vhe ḽaṋu.”

₁₂Joshua a vhudza vha tsinde ḽa Rubeni na ḽa Gadi na vha Manase vha vhubvaḓuvha, a ri, ₁₃“Elelwani zwe Mushe muḓinḓa wa Muṋe washu a ni vhudza a ri Muṋe washu Mudzimu waṋu u ḓo ni ṋea shango heḽi ḽa vhubvaḓuvha ha Jorodani ḽa vha haya haṋu na konou awela. ₁₄Vhasadzi vhaṋu na vhana vhaṋu khathihi na kholomo dzaṋu vha nga ḓi sala zwavho fhano, hone vhahali vhaṋu vha ḓo wetshela seli na luḽa vhó ḓiṱama tshoṱhe vha ranga Vhaisraele vha haṋu phanḓa uri vha vha farise, ₁₅Muṋe washu a vhuya a vha ṋea-vho vhuawelo unga o ṋea inwi, vha wana shango vhukovhela ha Jorodani ḽe Muṋe washu Mudzimu wavho a vha ṋea, na konou vhuya na dzula hafhano shangoni ḽaṋu vhubvaḓuvha ha Jorodani ḽe Mushe muḓinḓa wa Muṋe washu a ni ṋea ḽone.”

₁₆Vhone vha fhindula Joshua vha ri, “Ri ḓo ita zwoṱhe zwe vha ri vhudza; hoṱhe hune vha ri ruma ri ḓo ya. ₁₇Ri ḓo vha thetshelesa unga ro vha ri tshi ḓi thetshelesa Mushe. Ri ri ngavhe Muṋe washu Mudzimu wavho a tshi vha navho unga o vha e na Mushe! ₁₈Muthu ane a vha vhangisa kana a nyadza zwine vha ri vhudza u ḓo vhulawa. Vhone nga vha vhe na nungo vha ime vho khwaṱha!”