JEREMIA 52

₁Tsedekia o vhumbwa khosi e na miṅwaha ya 21, a vhusa Jerusalema miṅwaha ya 11. Mme awe o vha a tshi pfi Hamutali, ṅwananyana wa Jeremia wa muḓi wa Libina. ₂Khosi Tsedekia o ita zwi sa takadzi Muṋe washu, a ḓi ita zwa Jehoyakimu. ₃Zwoṱhe hezwi zwi tshi vhuya zwa wela Jerusalema na Juda ndi nge Muṋe washu a vha o sinyuwa, a fhedza nga u vha thathela kule nae.

Zwo itea Tsedekia a tshi shandukela khosi ya Babele. ₄Nga ṅwaha wa vhuṱanu na vhuṋa wa muvhuso wa Tsedekia, nga ḓuvha ḽa fumi ḽa ṅwedzi wa vhufumi, Nebukhadnetsara khosi ya Babele a ḓa na mmbi yawe yoṱhe a tshi ḓa u dia Jerusalema. Vha ṱoka mishasha yavho nnḓa ha muḓi vha u govhela nga thulwi dza mavu e vha khokha. ₅Muḓi wa dzula wo govhelwa u swika ṅwaha wa 11 wa khosi Tsedekia.

₆Nga ḓuvha ḽa vhuṱanu na vhuṋa ḽa ṅwedzi wa vhuṋa nḓala afho muḓini yo vha yo no hulela lwe ha vha hu si tshee na zwiḽiwa zwine vhathu vha nga ḽa. ₇Zwenezwo mutsheṱo wa muḓi wa pwashea wa phuletshedza, mmbi yoṱhe ya shavha. Vho ṱuwa afho muḓini vhusiku vha bva nga khoro ine ya vha vhukati ha mitsheṱo mivhili tsini ha tsimu ya musanda, naho hu uri Vhababele vho vha vho govhela muḓi. Vha shavha vho livha govhani ḽa Jorodani, ₈hone Vhababele vha pandamedza khosi Tsedekia vha mu fara mudavhini wa Jerikho. Vhahali vhawe vhoṱhe vha fhandekanywa nae vha balangana, ₉ene a thubiwa.

A dzhiwa a iswa ha khosi ya Babele muḓini wa Ribila shangoni ḽa Hamathi, ya mu haṱula henefho. ₁₀Henefho Ribila khosi ya Babele ya shidzha vhana vha Tsedekia vha vhatuka a tshi zwi vhona; a vhulaha na vhahulwane vhoṱhe vha Juda. ₁₁Ndi hone a tshi nongola maṱo a Tsedekia, a mu vhofha nga dzigeḓane, a mu isa Babele, a mu hoṋela dzhele a vhuye a fe.

₁₂Nga ḓuvha ḽa fumi ḽa ṅwedzi wa vhuṱanu, nga ṅwaha wa 19 wa muvhuso wa Nebukhadnetsara khosi ya Babele, Nebusaradani mulangammbi, muḓinḓa wa khosi ya Babele, a dzhena Jerusalema, ₁₃a fhisa thembele ya Muṋe washu nga mulilo, na pfamo ya musanda na nnḓu dzoṱhe dza Jerusalema. Nnḓu khulu iṅwe na iṅwe a i fhisa. ₁₄Mmbi yoṱhe ya Babele ye ya vha i tshi langwa nga mulangammbi wa musanda ya thutha mitsheṱo u mona na muḓi wa Jerusalema. ₁₅Nebusaradani mulangammbi wa musanda a hwala vhaṅwe vha vhatshinyali na vhe vha vha vho sala muḓini khathihi na vhatsila na vhe vha vha vho pfukela ha khosi ya Babele, a vha isa vhuthubwani. ₁₆Hone a sia vhaṅwe vha vhashai vhukuma vha shango uri vha lime masimu a minḓirivhe na maṅwe masimu.

₁₇Vhababele vha pwasha phuphu dza tshirongana na masambelo a re na milinga na thannge ya tshirongana zwe zwa vha zwi thembeleni ya Muṋe washu, vha hwala zwirongana zwoṱhe vha zwi isa Babele. ₁₈Vha hwala na dzikhali na dzifosholo na zwiṱunyathambo na midzio ya u handulula malofha na midzio ya u dubisa zwioro na midzio ya u fara nduvho ya thevhula, ine ya shumiswa thembeleni. ₁₉Mulangammbi wa musanda o dzhia na zwidongo na midzio ya u hwala masimbe na midzio ya u handulula malofha na dzikhali na zwivheambone na midzio ya zwioro na midzio ya u fara nduvho ya thevhula, midzio yoṱhe ya musuku na siliva.

₂₀Tshirongana tshi no bva kha phuphu mbili na thannge ya tshirongana na mboho dza 12 dza tshirongana dzi re fhasi hayo na masambelo a re na milinga, zwe khosi Solomoni a vha o zwi itela thembele ya Muṋe washu, tsho vha tshi sa kalei. ₂₁Phuphu iṅwe na iṅwe yo vha i na vhulapfu ha mithara ṱhanu na tharu, u monisa dzí mithara ṱhanu na hafu; iṅwe na iṅwe í na mulindi vhukati, i na vhudenya vhu no eḓana minwe miṋa. ₂₂Ṱhoho ya tshirongana ya phuphu yo vha i na vhulapfu ha mithara mbili na hafu, nahone yo ṱamiwa nga magranada a tshirongana u mona nayo. Iṅwe phuphu na magranada ayo yo vha i tshi ḓi nga yone-vho. ₂₃Nga matungo ho vha hu tshi vhonala magranada a 96; magranada oṱhe o ṱangana nga nṱha ha ayo o monaho nayo o vha e ḓana.

₂₄Mulangammbi wa musanda o dzhia Seraya tshifhe muhulu na Tsefania tshanḓa tshawe na vhalindamuṋango vhararu a vha hoṋela dzhele. ₂₅Kha vhe vha vha vha tshee vho sala muḓini, o dzhia mulangavhahali na vhaeletshedzi vha musanda vhaṱanu na vhavhili. A dovha a dzhia muṅwaleli wa u ramba vhanna musi wa nndwa na vhanna vhawe vha 60 vhe vha wanala henefho muḓini. ₂₆Nebusaradani mulangammbi o vha dzhia vhoṱhe a vha isa ha khosi ya Babele muḓini wa Ribila. ₂₇Henefho Ribila shangoni ḽa Hamathi khosi ya ita uri vha vhulawe.

Zwenezwo vhathu vha Juda vha hwalwa vha iswa vhuthubwani kule na shango ḽa havho. ₂₈Mbalo ya vhathu vhe Nebukhadnetsara a vha hwala a vha isa vhuthubwani ngeino:

nga ṅwaha wa vhuṱanu na vhuvhili wa muvhuso wawe o hwala Majuda vha 3 023;

₂₉nga ṅwaha wa 18 wa muvhuso wawe o hwala vhathu vha 832 vha no bva Jerusalema;

₃₀nga ṅwaha wa 23 wa muvhuso wawe Nebusaradani mulangammbi wa musanda o hwala Majuda vha 745 a vha isa vhuthubwani. Vhathu vhoṱhe vho ṱangana vho vha vhe 4 600.

₃₁Nga ṅwaha we Evili Merodakha a vha khosi ya Babele, a khathutshela Jehoyakhini khosi ya Juda, a mu vhofholola dzhele. Hezwo zwo itea nga ḓuvha ḽa 25 nga ṅwedzi wa 12 Jehoyakhini o no fhedza miṅwaha ya 37 vhuthubwani. ₃₂Evili Merodakha o amba nae zwavhuḓi a mu ṋea tshidzulo tsha khuliso tshi no fhira zwa maṅwe mahosi vhe vha vha vhe nae Babele. ₃₃Ndi hone Jehoyakhini a tshi bvula zwiambaro zwawe zwa dzhele a zwi vhea kule, misi yoṱhe a ḽa ḓafulani ḽa khosi vhutshilo hawe hoṱhe. ₃₄Misi yoṱhe khosi ya Babele yo vha i tshi ṋea Jehoyakhini zwa u renga zwine a zwi ṱoḓa, vhutshilo hawe hoṱhe a vhuya a fa.