JEREMIA 21

₁Khosi Tsedekia o vhuya a ruma Phashuru ṅwana wa Malikhiya na tshifhe Tsefania ṅwana wa Maaseya ha Jeremia, vha ri, ₂“Kha vha dzou ri vhudzisela ha Muṋe washu; Nebukhadnetsara Khosi ya Babele u khou ri dia. Khamusi Muṋe washu u ḓo ri itela maḓembe unga zwiḽa kale, Nebukhadnetsara a ri humela.”

₃Ndi hone Jeremia a tshi vha fhindula a ri, “Vhudzani Tsedekia ni ri, ₄‘Muṋe washu Mudzimu wa Israele u ri: Zwihali zwa nndwa zwe na fara, zwine na khou lwa ngazwo na khosi ya Babele na Vhakhaladia vhane vha ḓo ni govhela nnḓa ha mutsheṱo, ndi ḓo ṱuwa ndi tshi zwi rembulusa zwa ḽa inwi. Ndi ḓo kuvhanganya maswina ngomu ha muḓi houno, ₅Nṋe muṋe nda angaladza tshanḓa nda lwa na inwi nga maanḓa anga, ndó sinyuwa, ndó dinalea, ndí mbitini khulu. ₆Ndi ḓo vhulaha vha no dzula muḓini uno, vhathu na phukha; vha ḓo fa nga dwadze ḽi ofhisaho. ₇Hu ḓo ri ho no fhira izwo, nda dzhia Tsedekia khosi ya Juda na vhahulwane vhawe na vhathu vha muḓi houno vhe vha sala u fa hu tshi ḓa dwadze na pfumo na nḓala, nda vha kumedza Nebukhadnetsara khosi ya Babele na maswina avho ane a ṱoḓa u vha vhulaha. U ḓo vha vhulaha nga pfumo; ha nga vha khathutsheli, ha nga iti nga tshilidzi, ha nga vha pfeli vhuṱungu. Ho amba Nṋe Yahavee!’

₈“Dovha u vhudze vhathu u ri, ‘Yahavee u ri: Vhonani, ndi khou ni vhetshela nḓila i isaho vhutshiloni na i yaho lufuni. ₉Ane a sala o dzula muḓini houno u ḓo fa nga pfumo na nḓala na dwadze. Hone ane a bvela nnḓa a yo ḓikumedza Vhakhaladia vho ni govhelaho, onoyo u ḓo tshila; tshine a ḓo shavha natsho ndi vhutshilo hawe. ₁₀Ndo vhofha ḽa u huvhadza muḓi hoyu, a thi nga u tondi. U ḓo kumedzwa zwanḓani zwa khosi ya Babele, a u fhisa nga mulilo. Ho amba Nṋe Yahavee.’

₁₁“Hafhu u vhudze nnḓu ya vhuhosi ya Juda u ri, ‘Ipfani ipfi ḽa Yahavee: ₁₂Inwi vha nnḓu ya Dafita, Yahavee u ri: Misi yoṱhe ḽi tshi tsha nga hu haṱulwe nga khaṱhulo mbuya, we a ṱangulwa nga a lamulelwe zwanḓani zwa mutambudzi wawe; na sa ralo mbiti dzanga dzi ḓo pwashea dza fhisa unga mulilo nga vhuvhi he na ita, dza fhisa ha si vhe na a dzi dzimaho. ₁₃Iwe Jerusalema u no dzula nṱha ha muvhundu wa makwara wo ingamela govha, wa ri: Ndi nnyi ane a nga kona u lwa na Nṋe? Ndi nnyi ane a nga kona u dzhena vhushavheloni hashu? Nṋe muṋe ndi lwa na iwe. Ho amba Nṋe Yahavee. ₁₄Ndi ḓo u lifhedza ndi tshi tevhedza zwiito zwau. Ndi ḓo vhasa mulilo maṱakani au wa fhisa zwoṱhe zwo u tangaho zwe lore.’ ”