JUDITHI 14

₁Ndi hone Judithi a tshi vha vhudza a ri, “Vha hashu, nthetsheleseni. Dzhiani ṱhoho iyi ni i fhahee mutsheṱoni. ₂Zwino ḽi tshi tsha, musi ḓuvha ḽi tshi bvisa mulomo, vhahali vhoṱhe vha ḓipfaho vha bve muḓini nga luvhilo vha tshi khou langwa nga murangaphanḓa wavho, vha nge vha khou tsela mudavhini u yo lwa na vhalindi vha Vhaashuru, hone vha si tsele hone. ₃Vhaashuru vha ḓo fara zwihali zwavho vha gidimela mishashani yavho u yo vusa vhalangammbi vha Vhaashuru, vhenevho vha gidimela denndeni ya Holofenese, vha si mu wane. Ndi hone vha tshi ḓo farwa nga nyofho, ni tshi swika vha ni shavha. ₄Zwenezwo inwi na vhaṅwe vhoṱhe vha dzulaho shangoni ḽa Israele vha ḓo vha pandamedza, vha vha vhulaha vha tshi khou shavha. ₅Hone ni sa athu ita izwo, vhidzisani Akhioro wa Muamoni uri a sumbe uyo we a nyadza nnḓu ya Israele a rumela Akhioro ngeno a tshi ri u ḓo vhulahwa na riṋe.”

₆Ndi hone vha tshi vhidza Akhioro e nḓuni ya Uzia. Musi a tshi swika, a vhona ṱhoho ya Holofenese yo farwa nga munna muṅwe henefho ho kuvhanganaho vhathu, a mbo ḓi wa a ṋoka. ₇Vha mu vusa, a ḓiposa milenzheni ya Judithi a luvha, a ri,

₈“Hone zwino, nga vha mmbudze zwoṱhe zwe vha ita maḓuvha ayo.” Ndi hone Judithi a tshi mu vhudza vhathu vha tshi khou thetshelesa, zwoṱhe zwe a vha a tshi khou ita u bva tshee a ṱuwa a thoma u amba navho henefho. ₉Musi Judithi a tshi fhedza u toolola mafhungo ayo, vhathu vha fhululedza, muḓi wavho wa bvuma nga mikosi ya u pembela. ₁₀Zwino musi Akhioro a tshi vhona zwoṱhe zwo itwaho nga Mudzimu wa Israele, a mu tenda tshoṱhe, a fumbiswa, a baḓekanywa na vha nnḓu ya Israele na ṋamusi.

₁₁Nga maḓautsha vha nembeledza ṱhoho ya Holofenese mutsheṱoni. Zwino vhanna vhoṱhe vha Israele vha fara zwihali zwavho, vha tsela mabamani. ₁₂Musi Vhaashuru vha tshi vha vhona, vha ḓivhisa vharangaphanḓa vhavho, avho vha ya kha vhalangammbi na vhalangagomane na vharangaphanḓa vhavho vhoṱhe. ₁₃Vha swika denndeni ya Holofenese, vha vhudza mulondoli wa zwithu zwawe vha ri, “Vusani muṋe washu; phuli dziḽa dzi khou linga u tsela fhasi u ḓa u lwa na riṋe, uri ri vha lozwe tshoṱhe.” ₁₄Baguasi a dzhena, a khokhonya muṋangoni wa dennde, a tshi humbula uri Holofenese o kuvhama na Judithi. ₁₅A tshi pfa hu sa fhinduli muthu, a vula a dzhena vhulaloni, a mu wana o lala fhasi tshi tshitumbu tshi si na ṱhoho. ₁₆Baguasi a thoma u honḓa, a tshi khou gomela, a tshi zhamba, a kherukanya zwiambaro zwawe. ₁₇Zwino a dzhena denndeni he Judithi a vha o dzula hone, a si mu wane, a gidimela nnḓa kha vhahali, a ṱavha mukosi a ri, ₁₈“Dziḽa phuli dzo ri fhura! Musadzi muthihi fhedzi wa Muheberu o shonisa nnḓu ya khosi Nebukhadinetsara. Holofenese ngoyu o lala fhasi a si na ṱhoho!”

₁₉Musi vhalangi vha mmbi ya Vhaashuru vha tshi pfa maipfi ayo, vha kherukanya zwiambaro zwavho nga u hanganea. Mishashani ha pfala u zhamba na u honḓa.