JUDITHI 13

₁Musi ḽo sikuwa, vhalangammbi vha Holofenese vha mbo ḓi ṱavhanya vha tsiruwa. Baguasi a vala dennde nga nnḓa, a dzivha dzindumi vha si kone u swika hune muṋe wavho a vha hone. Vha ṱuwa vha ya vhulaloni havho, ngauri vho vha vho netiswa nga u nwesa. ₂Judithi a sala e eṱhe denndeni e na Holofenese we a vha o tou shuvhama vhulaloni hawe nge a vha o kambeswa nga waini. ₃Judithi o vha o laya phuli yawe uri i ime nnḓa ha pfamo, u ḓi nga misi miṅwe, i lindele a tshi bvela nnḓa. O mu vhudza uri u ḓo bvela nnḓa u yo rabela. Baguasi na ene a mu vhudza zwenezwo.

₄Musi vhoṱhe vho no ṱuwa, hu si tshee na muhulwane kana muṱuku o salaho afho pfamoni, Judithi a ima tsini na vhulalo ha Holofenese a ambela mbiluni a ri, “Yawee Muṋe washu, Mudzimu wa maanḓa oṱhe, zwino sedza nga vhuthu zwine zwanḓa zwanga zwa ḓo shuma zwone, uri Jerusalema hu huliswe. ₅Zwino tshino ndi tshone tshifhinga tsha u farisa vhathu vhau, na u shuma zwe nda dzudzanya zwa u lozwa maswina e a ri vutshela.” ₆Ndi hone Judithi a tshi sendela ṱhohoni dza vhulalo ha Holofenese tsini na ṱhoho yawe, henefho a dzhia banga ḽa Holofenese, ₇a sendela tsini na vhulalo, a mu fara nga mavhudzi, a ri, “Mudzimu wa Israele, nkhwaṱhise ṋamusi!”

₈Zwino Judithi a vusa maanḓa oṱhe, a mu rema luvhili mutsingani, a tumula ṱhoho yawe. ₉Judithi a kungulusa tshitumbu tsha Holofenese a tshi bvisa vhulaloni, a dzhia luḽa lupila he lwa vha lwo akhiwa hone. Zwo no ralo a bvela nnḓa, a dzhia ṱhoho ya Holofenese a i ṋekedza phuli yawe, ₁₀uyo a i longa ngomu ha mukhwama wa zwiḽiwa. Ndi hone avho vhavhili vha tshi ṱuwa vhoṱhe, vhunga vho vha vha tshi ḓi zwi ita musi vha tshi yo rabela.

Vha fhira mishashani, vha mona na govha, vha gonya bama vha swika Bethulia. Musi vha tshi swika khoroni ya muḓi, ₁₁Judithi a ṱavhela vhalindi mukosi vha tshee kulenyana a ri, “Vulani! Vulani khoro! Mudzimu, Ene Mudzimu washu u kha ḓi vha na riṋe. Ṋamusi o dovha a sumbedza nungo dzawe kha ḽa Israele, na maanḓa awe a u kunda maswina ashu.” ₁₂Musi vha dzulaho henefho vha tshi pfa ipfi ḽawe, vha mbo ḓi gidimela khoroni ya muḓi, vha vhidzisa vhahulwane vha muḓi. ₁₃Vhathu vhoṱhe, vhahulwane na vhaṱuku, vha mbo ḓi gidimela khae, ngauri vho vha vha sa lavheleli uri u ḓo vhuya. Vha vula khoro, vha ṱanganedza vhasadzi avho vhavhili. Vha honza mulilo uri hu vhe na tshedza, vha kuvhanganela avho vhavhili. ₁₄Judithi a takusa ipfi a vha ṱuṱuwedza a ri, “Rendani Mudzimu, mu rendeni! Rendani Mudzimu, ho ngo litsha u khathutshela nnḓu ya Israele. O lozwa maswina ashu nga tshanḓa tshanga vhusiku vhuno.” ₁₅Zwino Judithi a bvisa ṱhoho mukhwamani, a vha sumbedza, a ri, “Ṱhoho ya Holofenese ngeyi, ndi ene mulangammbi muhulwane wa mmbi ya Vhaashuru, lupila lwe a vha o lala fhasi halwo ó kambwa ngolu. Muṋe washu o mu vhulaha nga tshanḓa tsha musadzi. ₁₆Nga hu rendwe Muṋe washu we a ntsireledza nḓilani ye nda i fara, vhukuma ndi tshifhaṱuwo tshanga tsho nakaho tshe tsha fhura Holofenese ha lozwiwa ene fhedzi, nṋe ho ngo vhuya a nṱambela a shata muvhili wanga tshika kana a ntshonisa.”

₁₇Vhathu vhoṱhe vho vha vho akhamala zwihulu. Vho khotha vha luvha Mudzimu, vha amba mazha vha ri, “Nga hu rendwe Iwe Mudzimu, ṋamusi wo nyadzisa maswina a vhathu vhau.” ₁₈Ndi hone Uzia a tshi vhudza Judithi a ri,

Vhathu vhoṱhe vha fhindula vha ri, “Amen! Amen!”