JAKOPO 5

₁Hee inwi vhapfumi, lilani ni tou ṱavha mukosi nga u vhona u tambula hune ha khou ḓa. ₂Lupfumo lwaṋu lwo sina; zwiambaro zwo ḽiwa nga tsole; ₃musuku waṋu na siliva zwo bva vhulali; honoho vhulali ndi vhuṱanzi vhune ha ni hwelela; vhu ḓo ḽa ṋama yaṋu ya nga yo swa nga mulilo, ngauri naho o no vha maḓuvha a vhufhelo, inwi ni kha ḓi khokha lupfumo. ₄Malamba e na dzima vhakaṋi vha masimu aṋu a khou ni ṱavhela mukosi; mukosi wa vhakaṋi wo no tou swika na nḓevheni dza Muṋe washu Mulangazwoṱhe. ₅No vha ni tshi ḽa zwiṋu fhano fhasi na ḓiphiṋa, na nonisa mbilu dzaṋu, zwino ḓuvha ḽa u ṱhavhiwa ḽo no swika. ₆No haṱula a si na mulandu na mu vhulaha a si vhuye a ḓilwela.

₇Ndi zwone vha hashu, inwi ni songo fhela mbilu u swika Muṋe washu a tshi vhuya. Edzonu vhona uri mulimi u lindela hani a sa fheli mbilu mvula ya tseula na ya tshifhefho ya vhuya ya na, mavhele e a a zwala a vhuya a pakata khula dzine dza vha tshililelwa. ₈Na inwi zwi songo vhuya zwa ni dina, khwaṱhisani mbilu dzaṋu; hufha tshifhinga tsha u vhuya ha Muṋe washu tsho no vha tsini. ₉Vha hashu, ni songo gungulelana, ni sa ḓo haṱulwa. Muhaṱuli iṱali o no ḓi ima muṋangoni. ₁₀Edzisani vhaporofita vhe vha vha vhe dzomo ḽa Muṋe washu: vha tshi khakhelwa vho konḓelela vha si fhele mbilu. ₁₁Vhe vha konḓelela zwingafhangafha ri ri vha na mashudu. Na inwi no no ḓi pfa zwa u konḓelela ha Jobo, na dovha na vhona zwivhuya zwe Mudzimu a fhedza nga u mu itela. Khezwo-ha: Muṋe washu u na khathutshelo na mbilutshilidzi.

₁₂Zwihuluhulu vha hashu, ni songo ana. Ni songo ana nga ḽiṱaḓulu, kana nga ḽifhasi, naho tshi tshiṅwe-vho, uri ni sa ḓo ḓiovhela mulandu. Musi ni tshi tenda itani u ri, “Ee”, zwi vhe zwo fhela; ni tshi hanedza ni ri, “Aiwa”, zwi fhele.

₁₃Arali muṅwe waṋu e kha zwi konḓaho nga a rabele. Arali hu na o takalaho nga a imbe dza u renda Mudzimu. ₁₄Arali hu na a lwalaho nga a vhidze vhalisa vha tshivhidzo, vha mu ḓodze nga mapfura a muolivi, vha mu rabelele nga dzina ḽa Muṋe washu. ₁₅Thabelo iyo arali vha tshi fulufhela i ḓo tshidza mulwadze, Muṋe washu a mu vusa thovhoni. Naho a nga vha o tshinya u ḓo hangwelwa. ₁₆Zwenezwo arali no khakhelana ni humbelane khangwelo ni konou rabelelana uri ni fhole. Thabelo ya muvhuya i na maanḓa mahulu, i a shuma. ₁₇Elia o vha e muthu wa ṋama unga riṋe, hone o ri u rabela nga mbilu yoṱhe uri mvula i songo na, ya fhedza miṅwaha miraru na hafu i sa vhuyi ye tho. ₁₈Ndi hone a tshi dovha a rabela, mvula ya tou shuluwa, shango ḽa dovha ḽa bveledza khaṋo.

₁₉Vha hashu, arali muṅwe waṋu a pambuwa nḓilani ya ngoho, muṅwe a dovha a mu vhuedzedza khayo ₂₀ḓivhani uri ane a laṱisa mutshinyi nḓila dza magombikwa a mu vhuedzedza kha ya ngoho, u ḓo vha o mu tshidza lufuni, ha thuthwa vhutshinyi vhunzhi-vhunzhi.