YESAYA 54

₁Jerusalema, wo vha u tshi nga musadzi wa muumba a sa bebi,

zwino fhululedza u pembele u tou ṱavha mukosi nga dakalo,

iwe u sa athu vhuya wa pfa vhuṱungu ha musadzi

a tshi ṱoḓou vhofholowa!

Wo vha u musadzi o ṱaliwaho,

hone zwino u vho ḓo vha na vhana vhanzhi

vha no fhira vha musadzi a re na munna.

₂Engedzedza dennde ine wa dzula khayo!

Ṱharamudza masila ayo,

u songo ita thotho!

Lapfisa thambo dzayo,

u khwaṱhise khokho!

₃U ḓo engedza mikano yau masia oṱhe;

vhathu vhau vha ḓo wana mashango ane zwino a dzula dziṅwe tshakha;

miḓi yo phusukanywaho i vho ḓo vha na vhathu.

₄U songo ofha,

a u tsha ḓo dovha wa shona;

u songo vha na ṱhoni,

a u tsha ḓo dovha wa nyadziswa;

u ḓo hangwa vhuaḓa he wa ita u tshee muṱuku,

wa si tsha elelwa u nyadziwa hau zwiḽa u tshee tshilikadzi.

₅Musiki wau u vho ḓo nga munna wau;

Ene u pfi Muṋe washu Mulangazwoṱhe;

Mukhethwa wa Israele ndi Mutshidzi wau;

u pfi Mudzimu wa ḽifhasi ḽoṱhe.

₆Iwe Jerusalema, u nga musadzi

o ṱaliwaho nga munna,

a no dzula a tshi ḽa mbilu nga u vhona a si tsha funwa

unga zwiḽa a tshee muṱuku.

Hone Muṋe washu u ri u humele khae;

Mudzimu wau u ri,

₇“Ndo vha ndo u ṱala tshifhinga tshiṱukuṱuku,

hone zwino ndi ḓo u khathutshela zwihulu,

nda u vhidza wa vhuya.

₈Ndo vha ndo u sinyutshela zwihulu nda u furalela tshifhinganyana,

hone zwino ndi ḓo u khathutshela nga lufuno lwa lini na lini.”

Muṋe washu Mutshidzi wau u ralo.

“Misi ya Nua ndo ana nda ri a thi tsha ḓo fhedza shango

nga muḓalo wa maḓi,

zwino ndi khou dovha u ana sa zwenezwiḽa

uri a thi tsha ḓo dovha nda u sinyutshela

kana nda u ofhisa.

₁₀Naho dzithavha dza dzinginyea,

mivhundu ya sudzuluwa,

hone lufuno lwanga a lu nga dzinginyei,

mulanga wanga wa mulalo we nda vhofha na iwe

a u nga sudzuluwi.”

Muṋe washu ane a u khathutshela u ralo.

“Iwe Jerusalema,

muḓi wo tambudzwaho,

wo phusukanywaho,

hu si na ane a u khuthadza,

ndi ḓo vusa miteo yau

nga matombo a mutengo muhulu,

nda u fhaṱa nṱha ha matombo a safire;

₁₂ndi ḓo fhaṱa mitsheṱo yau nga matombo a no penya

unga mulilo,

khoro dzau nda dzi ṱama nga matombo a muroxwe,

luvhondo lwo u tangaho nda lu vusa nga matombo a mutengo muhulu.

₁₃Nṋe nga ndoṱhe

ndi ḓo funza vhathu vhau,

ḽa tou lala tshoṱhe.

₁₄U fulufhedzea hu ḓo vha yone thikho yau;

a hu na ane a ḓo u kandeledza,

a u nga ofhi tshithu,

zwi ofhisaho zwi ḓo vha kule na iwe.

₁₅Ane a u kovhola

u ḓo vha a songo tendelwa nga Nṋe;

ane a vhuya a lwa na iwe u ḓo kundiwa.

₁₆“Ndi Nṋe ndo sikaho mufuli wa tsimbi

ane a vhasa mulilo wa masimbe a fula zwihali,

na muhali muphusukanyi o vhumbwa nga Nṋe;

₁₇a hu na tshihali tshine tsha ḓo u huvhadza;

vhoṱhe vhane vha u pomoka vha ḓo wanala vhe na mulandu.

Hoyo ndi wone mukovhe wa vhalanda vhanga,

ndi vha sengela nga u ralo.”

Ho amba Muṋe washu.