YESAYA 41

“Inwi mashango a kule-kule,

ni tshete ni nthetshelese;

inwi dzitshakha, ḓilugiseni,

sendelani ni ḓisengele;

nga ri ṱangane tsengoni!

₂Uḽa a no bva vhubvaḓuvha,

ane hune a kanda a kunda,

o rithwa nga nnyi uri a ḓe?

Ndi nnyi we a mu kumedza dzitshakha,

a mu tekulela mahosi,

a vha runga nga pfumo vha vha buse,

musevhe wawe wa vha balanganya unga mathukhwi

a tshi hwalwa nga muya.

₃O vha pandamedza a fhira a sa thivhelwi nga tshithu,

e na luvhilo,

ṋayo dzawe dzi sa kwami fhasi.

₄We a ita uri izwo zwi vhe hone ndi nnyi?

A si Ene we a dzula o dzudzanya zwine zwa itea naa?

Nṋe Yahavee ndo vha ndi hone mathomoni,

zwi tshi guma

ndi ḓo ḓi vha e Nṋe Muṋe wazwo.”

₅“Mashango a kule-kule o vhona zwe nda ita, a ofha,

migumo ya ḽifhasi ya tetemela.

Vhathu vho kuvhangana

₆vha farisana, vha vhudzana vha ri,

‘Ni songo kulea nungo.’

₇Muvhaḓi u ṱuṱuwedza mufuli wa musuku,

ane a kanḓa nga nundo u ṱuṱuwedza a no vhanda baphathi;

vha amba tshe vha tshi fula vha ri,

‘Ndi tshavhuḓi!’

Vha tshi paṱekanya nga zwibigiri uri tshi si tseke.”

₈“Hone iwe Israele mulanda wanga,

vhana vha Jakopo vhe nda vha nanga,

inwi vhaḓuhulu vha Abrahamu khonani yanga,

₉ndo ni endedza ni tshi bva migumoni ya ḽifhasi;

ndo ni vhidza ni tshi bva khuḓani dzaḽo dza kule-kule,

nda ri, ‘U mulanda wanga,’

a tho ngo ni landula, ndo ni nanga.

₁₀Ni songo ofha, ndi na inwi;

ndi Mudzimu waṋu,

ni songo ḽa mbilu;

ndi ḓo ni ṋea nungo nda ni farisa,

ndi ḓo ni tika

nga tshanḓa tshanga tsha maanḓa.

₁₁Vho ni sinyutshelaho vha ḓo shona vha tou niwa nga ṱhoni;

vhane vha lwa na inwi vha ḓo lovha vha sala vha si tshithu;

₁₂vhane vha ni vhenga ni ḓo vha ṱoḓa na si tsha vha wana;

vhane vha ni vutshela vha ḓo nga a vhaho.

₁₃Nṋe ndi Yahavee Mudzimu waṋu,

ndo ni fara nga tshanḓa;

ndi ri, ‘Ni songo ofha,

ndi a ni farisa!’ ”

“Iwe Jakopo,

naho u tshi shaya nungo sa tshivhungu,

inwi Vhaisraele, naho ni vhaṱuku,

ni songo ofha tshithu,

Nṋe muṋe ndi ḓo ni farisa;

Mulamuleli waṋu

ndi Mukhethwa wa Israele.

₁₅Ndi ni ita tshifhulo tshiswa

tsha maṋo a vhuhali;

ni ḓo fhula dzithavha na dzi fhefhera,

mivhundu na i kuyekanya ya vha mathukhwi;

₁₆ni ḓo i posa muyani,

muya wa i hwala,

ya balanganywa nga maḓumbu.

Ndi hone ni tshi do pembela ni tshi humbula Nṋe Yahavee,

na zuwa Mukhethwa wa Israele.”

₁₇“Musi vhashai na vhaheḓana vha tshi lila maḓi

a si vhe hone,

mikulo yavho ya tou oma nga ḓora,

ndi hone Nṋe Yahavee

ndi tshi ḓo fhindula thabelo yavho,

Nṋe Mudzimu wa Israele ndi nga si vha laṱedze.

₁₈Ndi ḓo elisa milambo makwarani,

nda phula zwisima magovhani;

phanga ndi ḓo i shandula madzivha a maḓi,

shango ḽo omaho ḽa ḓala zwisima.

₁₉Phangani ndi ḓo medza miṱulume na miunga

na miṱangule na miṱwari,

sogani ndi ḓo sima miṱaululo na miṱu na mipaini.

₂₀Ndi hone vhathu vha tshi ḓo zwi vhona

vha zwi ḓivha,

vha elekanya vha ṱalukanya

uri zwo itwa nga tshanḓa tsha Yahavee,

zwo sikwa nga Mukhethwa wa Israele.”

₂₁Muṋe washu Khosi ya Jakopo u ri,

“Inwi midzimu ya dzitshakha, ḓisengeleni,

bvisani vhuṱanzi.

₂₂Edzonu ri vhudza zwe na vhuya na ita kale

ri kone u vha na nzhele nazwo;

zwa kunda,

ri vhudzeni zwine na kha ḓi ḓo ita,

uri zwi tshi bvelela ri kone u tenda.

₂₃Edzonu ri bvumbela tshithihi zwatsho

tsha zwi ḓaho,

tshivhi kana tshivhuya,

ndi hone ri tshi ḓo ḓivha uri ni midzimu,

zwa ri somela ra ni ofha.

₂₄Hone inwi a ni tshithu,

a ni na tshine na kona,

na vhane vha ni luvha vha a nengisa.

₂₅“Ndo ritha munna a bvaho devhula uri a ḓe,

ndo mu vhidzela mushumo wanga a tshi bva vhubvaḓuvha;

u ḓo kandekanya vhavhusi unga matope,

unga muvhumbi a tshi suka vumba.

₂₆Ndi nnyi waṋu o bvumbaho uri zwo raliho zwi ḓo bvelela?

Ro vha ri tshi ḓo kona u amba ra ri,

‘No vha ni tshi khou ita zwone.’

Hone a hu na na muthihi waṋu we a vhuya a amba tshithu,

a hu na we a zwi bvumba,

a hu na we a pfa ni tshi amba tshithu.

₂₇Ndi Nṋe ndo thomaho

u vhudza Tsioni haya mafhungo;

ndi ruma muḓinḓa

a isa mafhungo maḓifha Jerusalema.

₂₈Ndi tshi sedza midzimu

a hu na we a vha e na tshine a amba;

ho vha hu si na na ane a fhindula zwine nda vha vhudzisa.

₂₉Midzimu yoṱhe heyo a i na mushumo,

a i koni u ita tshithu,

zwifanyiso zwayo a si tshithu,

ndi mahandana.”