YESAYA 32

₁ Ḽi ḓo ḓa ḓuvha

ḽine ha ḓo vha na Khosi i no ḓo vhusa nga u fulufhedzea,

magota awe one a ḓo haṱula nga khaṱhulo mbuya.

₂Muṅwe na muṅwe wavho u ḓo nga tshipilamuya

na vhudzumbamo musi wa mvula khulu;

vha ḓo nga milambwana i elaho phangani,

vha nga murunzi wa dombo ḽihulu shangoni ḽo bvaho.

₃Maṱo a vhane vha fanela u vhona ha tsha ḓo pofula,

nḓevhe dza vhane vha fanela u pfa dzi vho ḓo thetshelesa.

₄Mbilu dza vha mashithe dzi vho ḓo ṱalukanya,

vha no kakamela vha vho ḓo amba zwavhuḓi;

₅tsilu a ḽi tsha ḓo hulisiwa,

ḽivemu a ḽi tsha ḓo pfi ḽi a fulufhedzea.

₆Tsilu tshaḽo ndi u amba zwa vhutsilu,

ḽi dzula ḽi tshi luka vhunwa;

zwine ḽa ita zwi nyadzisa Mudzimu,

ḽi isa phungo ya u nyefula Muṋe washu;

vha re na nḓala ḽi vha dzima zwiḽiwa,

vho farwaho nga ḓora a ḽi vha fhi maḓi.

₇Zwine ḽivemu ḽa ita ḽi itiswa nga vhuvhi;

ḽi luka vhunwa ha u vhaisa vhashai nga mazwifhi,

ḽa kundisa vhaheḓana u wana zwo vha fanelaho.

₈Muḓivhalea ene u vhamba maano a u ḓivhalea,

a imelela zwi no ḓivhalea.

₉Inwi vhasadzi ni no vhona unga no khuda,

iḓani ni thetshelese zwine nda amba!

Inwi vhasidzana ni sa ofhi tshithu,

ipfani zwine nda amba!

₁₀Ṅwaha u ḓo ri u fhela

inwi ni sa ofhi tshithu na vha ni tshi vho tetemela;

a ni tsha ḓo kaṋa nḓirivhe,

mitshelo a i tsha ḓo vha hone.

₁₁Inwi vhasadzi ni no ḓiphiṋa,

tetemelani!

Ofhani inwi vhasidzana ni sa ofhi tshithu!

Bvulani zwiambaro zwaṋu ni vhofhe madzanganda khunduni.

₁₂Ṱungufhalani ni tou ḓirwa dzikhana,

ni lilele mafulo e a vha a tshi titima,

na minḓirivhe yavhuḓi,

₁₃ni lilele masimu a vhathu vhanga o no melaho luanakha

na mutshutshungu.

Lilelani nnḓu dzoṱhe he vhathu vha vha vho takala,

na muḓi wa vhathu vha no tshila nga u ḓiphiṋa;

₁₄pfamo yo ṱutshelwa,

muḓi mulilangoma wo sala we swoto;

vhushavhelo na tshiingamo

zwi ḓo sala zwi matumba tshoṱhe;

hu ḓo fula mbiḓi henefho dza tou ḓiphiṋa,

hu ḓo vha pfulo dza maṱambi a nngu.

₁₅Zwi ḓo ralo, Muṋe washu a vhuya a ri shululela Muya wawe

a tshi bva ṱaḓulu,

ndi hone phanga i tshi vho ḓo vha tsimu yo vhibvelaho,

masimu o vhibvelaho a miri ya mitshelo

a tou pinzana.

₁₆Khaṱhulo mbuya ya fhaṱela phangani,

shangoni ḽo vhibvelaho ha fhaṱela zwi re zwone,

₁₇mutshelo wazwo ha vha u ḓisa mulalo,

mushumo wazwo ha vha u ladza shango,

vhathu vha pfa vho tsireledzea lini na lini.

₁₈Vhathu vhanga vha ḓo dzula miṱani ya mulalo,

mahayani o tsireledzeaho,

vha dzula vha awela hu si na zwi vha dinaho.

₁₉Naho tshifhango tsha wa tsha vunḓekanya maṱaka,

muḓi wa maswina wa phusukanywa tshoṱhe,

₂₀inwi ni ḓo ḓi vha na mashudu,

ni ḓo zwala mbeu hoṱhe-hoṱhe,

maḓi a ḓo vha a si na vhukono,

phulu na donngi dzi ḓo tshimbila hoṱhe

hu si na tshi ofhisaho.