YESAYA 16

₁Ṋemashango u dzula

muḓini wa Tsioni;

inwi ni re Sela,

mu luvheni nga ngwana;

rumani vhaḓinḓa vha dzi ḓise nga nḓila ya phangani.

₂Vha mu vhudze vha ri,

“Vhasadzi vha Muaba vha nga zwiṋoni

zwo shushwaho tshiṱahani tshazwo,

zwa fhufha,

vha sokou tendeleka maḓambuwoni a mulambo wa Arinoni;

₃nga ri ṋewe nyeletshedzo,

yone ambadzifhele!

Ri dzitshavhi, nga ri dzumbwe hune muthu a nga si ri wane!

Ri tsireledzwe unga muri une wa ḓisa murunzi u rotholelaho

ḽi tshi fhisa masiari tshivhangalala;

ro fhalala,

ri songo kovhelwa maswina!

₄Tshavhi dza Muaba nga dzi litshwe dzi dzule shangoni ḽa thovhele,

ri tsireledzwe, ri si lozwiwe!”

Mukandeledzi zwi ḓo mu fhelela,

ndozwo i ḓo fhela,

mudzia-u-levha u ḓo pfuluwa shangoni.

₅Pfamoni ya Dafita hu ḓo imiswa khuluṋoni

yo tewaho kha u fulufhedzea;

ane a dzula khayo u ḓo fulufhedzea,

a tshi haṱula ha nga ṱaluli,

u ḓo mbo ḓi lwela zwi re zwone.

₆Vhathu vha Juda vha ḓo ri,

“Ro zwi pfa uri Vhamuaba vha a ḓihudza;

ri a ḓivha uri vha a ḓiḓivha,

vha a ḓikukumusa,

vha na mukundulela,

hone mazuwo avho ndi mahandana,

₇vha ḓo honḓa, vha ḓo tshema,

vha ḓo lila vho kulea nungo,

vha tshi elelwa madzanga e vha vha vha tshi a ḽa

muḓini wa Kiri Hareshethe.

₈Masimu a Hesheboni o oma;

minḓirivhe ya Sibima yo puta;

mahosi a dzitshakha vho vunḓekanya

minḓirivhe yavhuḓi ye ya vhuya ya adza

ya guma Jaasere,

ya swika phangani,

maḓadzwane ayo a navha u swika lwanzheni.

₉Na nṋe ndi a lila

unga vha Jaasere vha tshi lila,

vha tshi lilela minḓirivhe ya Sibima.

Hee Hesheboni! Hee Eliali!

Ndi ni sheledza nga miṱodzi!

Khaṋo ya mitshelo na nḓirivhe yo kaṱudzwa nga mukosi

wa maswina.

₁₀Tshikovhani tsho vhibvelaho a hu tsha pembelwa;

a hu na ane a fhululedza masimuni a minḓirivhe,

a hu na a no ṱavha mukosi wa dakalo,

a hu na a no suka nḓirivhe bonḓeloni a inga waini,

mukosi wa dakalo wo fhela.

₁₁Mbilu yanga i ṱungufhalela Muaba,

luvalo lwa tetemela unga mbila dzi tshi ndiliii –

ndi tshi humbula Kiri Hareshethe muṱoḓo wanga u a tumuwa.

₁₂Vhamuaba vha tshi ḓidina nga u gonya mivhundu

vha tshi yo ṋekedza zwiṱhavhelo vha tshi yo rabela thembeleni,

ndi u sokou ḓinetisa.”