HOSIA 3

₁Muṋe washu a amba na nṋe a ri, “Ṱuwa u yo sumbedza musadzi wau uri u khou dovha wa mu funa, naho a tshi ita vhupombwe. U mu fune unga Yahavee a tshi funa Vhaisraele, naho vha tshi luvha miṅwe midzimu vha funa u ḽa mpale wa nḓirivhe yo ṋekedzwaho yone.”

₂Zwenezwo nda mu rengulula nga mangwende a 15 a siliva na khilogiramu dza 150 dza bali. ₃Nda mu vhudza nda ri, “U ḓo dzula na nṋe maḓuvha manzhi ri sa dzhenisani nḓuni; u songo ita vhupombwe, u songo funana na muṅwe munna, na nṋe a thi nga dzheni nḓuni na iwe.” ₄Zwi ḓo ralo na kha Vhaisraele: vha ḓo fhedza maḓuvha manzhi vha si na khosi kana muvhusi, vha si na tshiṱhavhelo kana phuphu dza matombo, vha si na nzumbululo ya Mudzimu kana zwitungulo. ₅Ngavhuya Vhaisraele vha ḓo vhuya, vha ṱoḓa Muṋe washu Mudzimu wavho na Dafita khosi yavho. Vha ḓo ḓa ha Muṋe washu vha tshi tetemela, vha wana mashudu awe misi ya vhufhelo.