HOSIA 12

₁Vhathu vha Efraimi vha ḽa muya, vha ṱwa vha tshi pandamedza muya wa vhubvaḓuvha u fhisaho zwimela, vha anza mazwifhi na u huvhadzana. Vha vhofha mulanga na Ashuru, vha dovha vha luvha Egipita nga mapfura a muolivi.

₂Muṋe washu u vhea Juda mulandu, u ḓo rwa Jakopo a tshi tevhedza mishumo yawe, a mu lifhedza a tshi tevhedza zwiito zwawe. ₃Musi a tshee muvhilini wa mme awe o fara mukomana wawe nga tshirethe, ó no vha munna a ita tsimbe na Mudzimu. ₄O ita tsimbe na muruṅwa a mu kunda, o tsengisa miṱodzi a mu luvhelela uri a mu shudufhadze. O mu wana Bethele, Muṋe washu a amba na riṋe henefho, ₅Ene Muṋe wa zwoṱhe Mudzimu Ramaanḓaoṱhe, dzina ḽawe ḽa bvumo ndi Yahavee! ₆Huno zwino ni fanela u vhuelela ha Mudzimu waṋu, ni vhe na lufuno lu sa shanduki, ni ite zwi re zwone, ni dzule no lindela Mudzimu waṋu.

₇“Vhathu vha Efraimi vho no tou vha Vhakanana, ndi vhashavhi vho faraho zwikalo zwi sa fulufhedzei, vha tama zwa u fhura. ₈Naho zwo ralo vha a zuwa vha ri, ‘A tho ngo pfuma zwone, ndo wana lupfumo lu si na vhukono. A hu na ane a nga mpomoka u pfuma nga u pfuka mulayo.’ ₉Ndi Nṋe Yahavee Mudzimu waṋu we a ni pfulusa Egipita, ndi ḓo ita uri ni dovhe ni dzule dzidenndeni, sa misi iḽa ya vhuṱambo ha Mishasha. ₁₀Ndo amba na vhaporofita, nda vha sumbedza mabono manzhi, nda ni vhudza zwifanyiso nga mulomo wavho.” ₁₁Na ḽa Giliadi ḽo vha ḽo pfuma, hone zwino a ḽi tshee tshithu. Ngei Giligala vha ṋekedza zwiṱhavhelo zwa dzimboho. Aḽiṱari dzavho dzi ḓo sala dzi tshi nga thulwi ya matombo tsimuni yo liṅwaho.

₁₂Jakopo o shavhela shangoni ḽa Aramu; Israele o shumela u wana musadzi, a mu mala nga u lisa nngu dza makhulu. ₁₃Muṋe washu o ruma muporofita u yo pfulusa Vhaisraele Egipa, a vha londola nga muporofita. ₁₄Hone vhathu vha Efraimi vho mu ṱunga lu ṱungufhadzaho, Muṋe wavho u ḓo vha hwesa mulandu wa u shulula malofha, a mu lifhedzela lunyadzo lwawe.