VHAHEBERU 12

₁Zwino vhunga ri na gogo ḽingafhangafha ḽa ṱhanzi dzo ri tangaho, nga ri kudze zwithithisi zwoṱhe kule, na vhutshinyi, ngauri vhu a ri piringedza, ri tou oma kha mbambe ine ra vha khayo, ₂ro tou sedza henengei phanḓa kha Yesu, Ene we a ri zhakela nḓila ya lutendo a dovha a vha Ene ane a ri swikisa he lwa livha hone. Ene nga u sedza dakalo ḽe a vha o vhetshelwa ngei phanḓa, o konḓelela lufu lwa tshifhambano a si londe u nyadzea halwo, zwino khezwo-ha, o no dzula thungo ya tshauḽa ya Mudzimu vha vhusa vhoṱhe. ₃Edzonu elekanya Ene we a konḓelela u hanedzwa zwingafhongafho nga vhatshinyi, ndi hone ni sa ḓo kulea nungo na ṱovhowa.

₄Hafhu ni tshi lwa na vhutshinyi a ni athu vhuya na swika hune na vhulawa. ₅No no hangwa fhaḽa hune Maṅwalo a ni ṱuṱuwedza sa vhana vha Mudzimu a ri,

₇Ndi ndayo, i konḓeleleni. Ndi hone Mudzimu a tshi ni fara sa vhana vhawe. Nṋa hu na ṅwana ane khotsi a si mu laye naa? ₈Hufha vhana vhoṱhe vha tshi laiwa. Arali inwi na sa laiwa, izwo a ni vhana vhukuma ni tou vha vhana vha u vhumbela. ₉Hufha vhokhotsi ashu lwa ṋama vho ri kaidza ra ḓi vha hulisa. Zwino Khotsi ashu lwa muya ri nga kundwa ngani-vho u mu thetshelesa? A si hone ri tshi ḓo wana vhutshilo? ₁₀Vhone vho ri laya kha zwa vhutshilo honovhuno vhu sa yi thambo vha tshi ri laya nga he vha vhona zwo fanela. Hone Khotsi wa ṱaḓulu a tshi ri laya ndi Ene ane a ita uri zwi ri nakele ri kovhekane nae vhukhethwa hawe. ₁₁U laiwa ngoho a zwi takadzi. Nga tshifhinga tshenetsho zwi nga zwi a vhavha, hone ngavhuya mitshelo ine ya fuliwa nga vho laiwaho ndi mulalo na vhutshilo vhu sa solisei.

₁₂Zwino khwaṱhisani-ha zwanḓa zwaṋu zwo netaho na magona a lepalepaho, ₁₃ni fare nḓilatswititi. Ndi hone muraḓo wo kuleaho u tshi ḓo khwaṱha u si lunguluwe.

₁₄Tshaṋu nga hu vhe u dzudzana na vhathu vhoṱhe nga mulalo, ni luse u tshila vhutshilo vhukhethwa; ane a si ralo a nga si vhone Muṋe washu. ₁₅Ni vhone hu sa ḓo vha na ane a ḓikundisa u wana vhuthu ha Mudzimu. Hu si vhe na ane a nga tsheṋe i kalakataho ine ya ri u mela mulimo wayo wa fhirela kha vhanzhi. ₁₆Hu si vhe na phombwe na a nyadzaho zwikhethwa sa Esau we a rengisa vhukomana hawe nga ndilo nthihi ya zwiḽiwa. ₁₇Ni a zwi ḓivha uri ngavhuya o tama u dovha u wana mashudu a tanzhe, a landulwa; naho o lila a ḓiphiṋa zwa ḓi kunda, a si tsha wana nḓila ya u khakhulula zwe a khakha.

₁₈Ni vhone! He na swika hone a si thavhani ya Sinai zwayo ine muthu a nga i kwama, i dugaho mulilo yo tou bodo nga swiswi hu na maḓumbu mahulu, ₁₉hu tshi pfala phalaphala i lilaho na ipfi ḽa Mudzimu, ḽe vha ri u ḽi pfa vha tou luvhelela uri vha si tsha dovha vha ḽi pfa. ₂₀Hu tshi pfi, “Na phukha ya tou kwama thavha, yo fanela u kanḓwa nga matombo,” zwo vha ofhisa lwe vha kundwa na u zwi konḓelela. ₂₁Zwe vha zwi vhona zwo ofhisa lwe Mushe a ri, “Ndi tou tetemela nga nyofho.”

₂₂Zwino he inwi na swika a si thavhani yo raloho zwayo, no tou swika thavhani ya Tsioni, muḓini wa Mudzimu a tshilaho, Jerusalema wa ngei ṱaḓulu, na mmbini dzi sa vhalei dza vharuṅwa, na vhuṱamboni ha ₂₃tshivhidzo tsha matanzhe a Mudzimu vhe madzina avho a ṅwalwa ngei ṱaḓulu, na ha Mudzimu Muhaṱuli wa vhoṱhe, na kha mimuya ya vhavhuya vho no khunyeledzwaho, ₂₄na ha Yesu we a ri ḓisela mulanga muswa, ane ri tshi handululwa nga malofha awe a tou ri pfumelela, ha ri hweleli sa malofha a Abele.

₂₅Ni vhone-ha uri a tshi amba ni si dzingise nḓevhe. Vhaḽa vhe vha si thetshelese a tshi vha vhudza ndaela ya Mudzimu fhano fhasi a vho ngo ponyoka ṱhamu, zwino riṋe ri nga ponyoka hani arali ri sa zwi londi a tshi amba e ngei ṱaḓulu? ₂₆Zwiḽa a tshi amba ngei thavhani ipfi ḽawe ḽo tou dzinginya shango, hone zwino o ri ḓivhadza a ri, “Ndi ḓo dovha nda vhuya luthihi, ndi si tsha dzinginyisa ḽifhasi fhedzi, ndi ḓo dzinginyisa na ḽiṱaḓulu.” ₂₇Hu tshi pfi, “Ndi ḓo vhuya luthihi”, zwi sumbedza zwavhuḓivhuḓi uri u dzinginyiswa ha zwisikwa ndi u sudzuluswa hazwo, uri hu sale zwi sa dzinginyei fhedzi.

₂₈Zwenezwo muvhuso we ra dzhena khawo a si une wa nga sudzuluswa. Nga ri livhuhe Mudzimu ri mu luvhe nga khuliso na nga nyofho, ngauri ndi zwone zwine a zwi funa. ₂₉Ḓivhani uri Mudzimu washu ndi mulilo u lozwaho.