HAGAI 2

₁Nga ṅwaha wa vhuvhili wa muvhuso wa khosi Dariosi, nga ḓuvha ḽa 21 ḽa ṅwedzi wa vhuṱanu na vhuvhili Muṋe washu a amba nga muporofita Hagai a ri, ₂“Amba na Zerubabele ṅwana wa Salathiele, muvhusi wa ḽa Juda, na Joshua ṅwana wa Jehotsadaka, tshifhe muhulu, na vhathu vho salaho u fa. Vha vhudzise u ri, ₃‘Kha inwi no salaho ndi nnyi we a vhona iyi nnḓu i tshee na vhugala vhuḽa hayo ha u ranga? Zwino ni vhona yo tou ita hani? A thi ri ni khou vhona i tshi nga a si tshithu? ₄Hone zwino, iwe Zerubabele, u songo kulea nungo,’ hu amba Yahavee. ‘Iwe Joshua tshifhe muhulu ṅwana wa Jehotsadaka, u songo kulea nungo. Noṱhe inwi vhathu vha shango ni songo kulea nungo, shumani,’ hu amba Yahavee. U ri, ‘Nṋe ndi na inwi,’ hu amba Yahavee Mulangazwoṱhe. ₅‘Musi ni tshi pfuluwa Egipita ndo ni fulufhedzisa uri ndi ḓo ni fhelekedza. Na ṋamusi Muya wanga u tshee na inwi. Ni songo ofha tshithu.’

₆“Muṋe washu Mulangazwoṱhe u ri, ‘Hu si kale ndi ḓo dovha nda dzinginyisa ḽiṱaḓulu na ḽifhasi na lwanzhe na shango ḽo omaho. ₇Ndi ḓo dzinginyisa dzitshakha, zwine zwa tamisa zwa tshakha dzoṱhe ndi ḓo zwi ḓisa zwa ḓadza nnḓu heino nga vhugala,’ hu amba Yahavee Mulangazwoṱhe.

₈“ ‘Siliva yoṱhe ndi yanga, musuku woṱhe ndi wanga,’ hu amba Yahavee Mulangazwoṱhe. ₉‘Vhugala ha nnḓu heino ya zwino vhu ḓo fhira ha iḽa ya u ranga,’ hu amba Yahavee Mulangazwoṱhe. ‘Hafhano fhethu ndi ḓo ḓisa mulalo,’ hu amba Yahavee Mulangazwoṱhe.”

₁₀Nga ḓuvha ḽa 24 ḽa ṅwedzi wa vhuṱanu na vhuṋa, nga ṅwaha wa vhuvhili hu tshi vhusa Dariosi, ipfi ḽa Muṋe washu ḽa amba na muporofita Hagai ḽa ri, ₁₁“Nṋe Yahavee Mulangazwoṱhe ndi ri, ‘Humbela nyeletshedzo kha vhotshifhe u ri: ₁₂Arali muthu a putela ṋama yo sumelwaho Mudzimu nga lupendelo lwa nguvho yawe, ulwo lupendelo lwa kwama vhurotho kana muroho kana waini kana mapfura kana zwiṅwe zwiḽiwa, na zwone zwi a vha zwikhethwa naa?’ ” Vhotshifhe vha tshi fhindula vha ri, “A zwi nga vhi zwikhethwa.”

₁₃Ndi hone Hagai a tshi vhudzisa a ri, “Arali muthu o kumala nga u kwama tshitumbu, a dovha a kwama tshiṅwe tsha izwo zwithu, tshi a vha tsho kumala naa?”

Vhotshifhe vha fhindula vha ri, “Ee, tshi a kumala.”

₁₄Ndi hone Hagai a tshi ri, “ ‘Nṋe ndi vhona vhathu havha vho tou ralo, ndi vhona lushaka holu lwo tou ralo,’ hu amba Yahavee. ‘Zwoṱhe zwine vha ita, zwoṱhe zwine vha zwi ṋekedza henefho zwo kumala.’ ”

₁₅Muṋe washu u ri, “Zwino sedzani zwavhuḓi u bva ṋamusi, humbulani uri zwiḽa tombo ḽi sa athu ingwa nṱha ha ḽiṅwe ngei thembeleni yanga, zwithu zwo vha zwo tou ita hani. ₁₆Muthu o vha a tshi ri a tshi fhula thulwi ya goroi a wana gonyongo fhedzi ḽa zwe a vha o fulufhela. Muthu a ri a tshi yo ka mielo ya mahumi maṱanu bonḓeloni ḽa waini a wana i mielo ya mahumi mavhili fhedzi. ₁₇Ndo tshinyadza zwiliṅwa zwaṋu nga vhuri na done na tshifhango, naho zwo ralo inwi a no ngo vhuya kha Nṋe. ₁₈U bva ṋamusi, u bva ḓuvha heḽino ḽa 24 ḽa ṅwedzi wa vhuṱanu na vhuṋa, ni sedze zwavhuḓi musi we ha tewa muteo wa thembele yanga. Ni sedze zwavhuḓi: ₁₉Hu tshee ho sala mbeu ḓuluni naa? U swika zwino munḓirivhe na muhuyu na mugranada na muolivi a i athu aṋwa mitshelo. Hone u bva ṋamusi ndi ḓo ni shudufhadza.”

₂₀Muṋe washu a dovha a amba na Hagai lwa vhuvhili, nga ḓuvha ḽa 24 ḽa ṅwedzi wonoyo a ri, ₂₁“Vhudza Zerubabele muvhusi wa Juda uri ndi ḓo dzinginyisa ḽiṱaḓulu na ḽifhasi. ₂₂Ndi ḓo tekula khuluṋoni dza mahosi nda pwashekanya maanḓa a mivhuso isili. Ndi ḓo thudza gariki dza nndwa na vhatshimbidzi vhadzo, nda rambaladza dzibere na vhanameli vhadzo, vha fhedza nga u vhulahana nga pfumo.” ₂₃Muṋe washu u ri, “Musi wonoyo ndi ḓo dzhia iwe mulanda wanga Zerubabele ṅwana wa Salathiele, nda u ita unga rinngi yanga ya luswayo, ngauri ndo u nanga.” Hu amba Yahavee Mulangazwoṱhe.