VHAGALATA 4

₁Ndi tshi ralo ndi ri: musi muḽaifa a tshee ṅwana a hu na he a fhambana na phuli, naho ifa ḽoṱhe ḽi ḽawe. ₂U ḓi vha na vhaleli vhawe na vhalangi vha thundu yawe ha vhuya ha swika tshifhinga tshe tsha tiwa nga khotsi awe. ₃Sa zwenezwo na riṋe zwiḽa ri sa athu dzia, ro vha ri tshee dziphuli dza zwidayo zwa shango zwe zwa vha zwi tshi ri vhusa. ₄Hone musi tshifhinga tsho tiwaho tsho swika Mudzimu a konou ruma Murwa wawe, a bebwa nga mme a re muthu wa ṋama, u bva hanani hawe a ḓi vhuswa nga Mulayo, ₅uri a rengulule riṋe vhe ra vha ri tshi vhuswa nga wone Mulayo, ri konou itwa vhana vha Mudzimu.

₆Huno-ha Mudzimu a ruma Muya wa Murwa wawe a dzhena mbiluni dzashu uri zwi vhonale uri ni vhana vhawe. Ndi onoyo Muya ane a vhidzelela a ri, “Baba, Khotsi anga!” ₇Zwino-ha a u tshee phuli, wo no vha ṅwana wa Mudzimu. Zwino vhunga wo no vha ṅwana wawe Mudzimu o no ḓi u ita muḽaifa wawe.

₈Zwiḽa kale ni sa athu ḓivha Mudzimu no vha ni dziphuli dza zwithu zwine zwi si vhe Mudzimu. ₉Hone zwino nó no ḓivha Mudzimu – hone litshani ndi ri: Mudzimu u vho ni ḓivha – zwino ndi mini ni tshi vho ṱoḓa u humela kha zwidayo zwa shango zwi nyadzeaho zwi si na mushumo, na dovha na vha phuli dzazwo? ₁₀Ni kha ḓi ṱalula maṅwe maḓuvha na miṅwe miṅwedzi na zwiṅwe zwifhinga na miṅwe miṅwaha na ri ndi zwikhethwa. ₁₁Ndi dinwa nga u vho vhona unga zwoṱhe zwe nda shuma henengeo ho vha hu u sokou ḓinetisa.

₁₂Vha hashu, ndi tou ni humbela uri ni nge nṋe; hufha na nṋe ndi tshi vho nga inwi. A ni athu vhuya na nkhakhela. ₁₃Ni kha ḓi elelwa uri ndi tshi ranga u ni funza mafhungo maḓifha ndo itiswa ngani: ndi nge nda vha ndi tshi lwala. ₁₄Hone naho vhuhoṱa hanga ho vha vhu tshi tou ni farisa tsha u konḓa a no ngo nnyadza, a no ngo nnengwa; tshaṋu ho vha hu u ntswielela sa muruṅwa a bvaho ṱaḓulu, na ntswielela na nga ni khou swielela Khristo Yesu. ₁₅No vha ni songo ntakalela zwone. Zwino ho no tshinyalani-ha? Nṋe nga dzanga ndi nga ni ṱanziela nda ri: arali zwo vha zwi tshi konadzea no vha ni tshi ḓo vha no tou nongola maṱo aṋu na nṋea. ₁₆Kani-ha zwino ndo no vha swina ḽaṋu nge nda ni vhudza ngoho? ₁₇Vhaḽa vhane vha ni swela mbilu a si u ni tonda, tshine vha lwela ndi u ni luṱanya na nṋe uri mbilu dzaṋu dzi swele vhone. ₁₈Zwino-ha u swa mbilu zwingafho ndi zwavhuḓi. Hone mbilu dzaṋu dzi fanela u swela zwi re zwavhuḓi, nahone ni fanela u dzula ni tshi swa mbilu, hu si musi ndi na inwi fhedzi. ₁₉Vhananga, nṋe ndi pfa vhuṱungu sa mme ane a khou ni beba, nahone vhuṱungu uho vhu nga si fhele Khristo a sa athu vhonala vhutshiloni haṋu. ₂₀Ngoho ndi tshi ni humbula mbilu yanga a i ruli. Ndi tou ri ngavhe zwino ndi na inwi henefho nandi, ndi tou ni zhambela!

₂₁Mbudzeni-ha inwi ni funaho u vhuswa nga Mulayo wa Mushe: kani-ha a ni zwi pfi zwine Mulayo wa amba? ₂₂U ri Abrahamu o vha e na vhana vhavhili vha vhatuka, muṅwe o bebwa nga phuli, muṅwe nga musadzi wawe vhukuma a si phuli. ₂₃Ṅwana wa phuli o bebwa sa nnyi na nnyi, hone ṅwana wa musadzi a si phuli o bebwa nge a tou fulufhedziswa nga Mudzimu. ₂₄Mafhungo aya a tou vha pfanyisedzo. Vhasadzi havho vhavhili vho imela milanga mivhili: hoyu muṅwe wo vhoxwa thavhani ya Sinai; ndi wa u beba dziphuli; ndi ene Hagara. ₂₅Hagara u imela thavha ya Sinai i re Arabia; yone i imela muḓi wa Jerusalema wa fhano shangoni, u re vhupulini na vhana vhawo. ₂₆Hone Jerusalema wa ngei makoleni wo vhofholowa; huno ndi wone mme ashu. ₂₇Maṅwalo na one a ri,

₂₈Zwino inwi vha hashu ni fana na Isaka; ni vhana vha Mudzimu vhe vha bebwa nge Mudzimu a tou zwi fulufhedzisa. ₂₉Misi yeneyo ṅwana uḽa wa u bebwa sa nnyi na nnyi o tovhola uḽa we a bebwa nga maanḓa a Muya wa Mudzimu; na ṋamusi zwi tshee zwo ralo. ₃₀Huno Maṅwalo a ri mini? A ri, “Thatha iyo phuli na ṅwana wayo! Ṅwana wa phuli a nga si kovhekane ifa na ṅwana wa musadzi vhukuma a si phuli!” ₃₁Zwino-ha vha hashu, riṋe a ri vhana vha phuli, ri vhana vha musadzi vhukuma a si phuli.