ESEKIELE 5

₁Muṋe washu a ri, “Iwe ṅwana wa muthu, dzhia banga ḽa vhuhali ḽi no fhira unga luare lwa muvheuli, u vheule mavhudzi au na ndebvu dzau ngaḽo. U konou dzhia zwikalo u kale ayo mavhudzi, u a fhandekanye a ite zwiputu zwiraru. ₂U fhise kuputu kuthihi u vhukati ha muḓi, musi maḓuvha a u govhelwa hawo o no fhela. Kuṅwe u ku remekanye nga banga u mona na muḓi; mavhudzi a kuṅwe kuputu kuthihi u a balanganye muyani, Nṋe ndi ḓo a pandamedza nga banga ḽanga. ₃U dzhie mavhudzi a si gathi u a pute nga lupendelo lwa khanzu yau. ₄Kha eneo u dovhe u dzhie a si gathi u a pose muliloni a swe. Hu ḓo bva mulilo khao, wa ṱanganya vhathu vhoṱhe vha Israele.”

₅Muṋe wa zwoṱhe Muṋe washu u ri, “Hoyu ndi muḓi wa Jerusalema, ndo u vhea vhukati ha dzitshakha, wo tangwa nga mashango asili. ₆U na luswetho, wo shandukela ndayo dzanga u fhira tshakha dza vhannḓa; wo shandukela milayo yanga u fhira mashango o u tangaho; wo landula ndayo dzanga, wa hana u vhulunga milayo yanga.”

₇Zwenezwo Muṋe wa zwoṱhe Muṋe washu u ri, “Vhunga no ntshandukela u fhira tshakha dzo ni tangaho, vhunga ni songo vhulunga milayo yanga kana na tevhedza ndaela dzanga, ni sa tevhedzi na ndaela dza tshakha dzo ni tangaho, ₈zwino-ha Nṋe Muṋe wa zwoṱhe Yahavee ndi ri: Zwino ndi lwa na inwi, ndi ḓo ni lifhedza tshakha dzoṱhe dzi tshi zwi vhona. ₉Ndi ḓo ni ita zwine nda sa athu ni ita, zwine nda si tsha ḓo dovha nda zwi ita, nga zwi nengisaho zwe na ita. ₁₀Vhokhotsi aṋu vha ḓo ḽa vhana vhavho, vhana vha ḽa vhokhotsi avho. Ndi ḓo ni lifhedza, tsalela dzaṋu nda dzi balanganya muyani.

₁₁“Zwino-ha, ndi ana nga vhutshilo hanga,” – hu amba Muṋe washu – “vhunga vhukuma no kumadza fhethu hanga hukhethwa nga zwi nengisaho na zwiito zwaṋu zwa mashika, na Nṋe ndi ḓo ni ṱangula ndi sa khathutsheli; a thi nga litshi muthu. ₁₂Tshipiḓa tshithihi kha zwiraru tsha vhathu vha haṋu vha ḓo fa nga dwadze kana vha fhela nga nḓala henefha ngomu muḓini; tshipiḓa tshithihi kha zwiraru tsha vhathu vha haṋu vha ḓo fa nga pfumo ngei nnḓa ha mutsheṱo; tshipiḓa tshithihi kha zwiraru ndi ḓo tshi balanganya muyani ndi tshi khou vha pandamedza nga pfumo. ₁₃Ndi hone mbiti dzanga dzi tshi ḓo fhela, nda rudza mbilu nda si tsha vha sinyutshela, nda vha ndo ḓilifhedzela. Musi mbiti dzanga dzo no fhelela khavho, ndi hone vha tshi ḓo ḓivha uri Nṋe Yahavee ndo amba ndi mbitini. ₁₄Ndi ḓo vha phusukanya ha sala matumba, vha nyadzwa nga tshakha dzo vha tangaho, vhoṱhe vhafhiri vha gondo vha tshi zwi vhona.

₁₅“Ni ḓo nyadzwa na shona, na tou vha ndayo na tsumbo ya zwi ofhisaho kha tshakha dzoṱhe dzo ni tangaho musi ndi tshi ni haṱula ndi mbitini, ndó sinyuwa, ndi tshi ni rwa nga ṱhamu i vhavhaho. Hu amba Nṋe Yahavee.

₁₆“Ndi ḓo ni ḓisela misevhe i vhulahaho nga nḓala; i ḓo ni lozwa, vhunga ndi tshi ḓo i ḓisa uri i ni lozwe; ndi ḓo ni wisela nḓala khulu ha sala hu si tshee na zwiḽiwa. ₁₇Ndi ḓo ita uri hu we nḓala, nda ruma na zwivhanda zwa ḓaka zwa ni vhulahela vhana; ndi ḓo ni ḓisela dwadze, ha shuluwa malofha. Ndi ḓo ni rambela pfumo. Hu amba Nṋe Yahavee.”