ESEKIELE 40

₁Nga ṅwaha wa 25 ri vhuthubwa Babele, mathomoni a ṅwaha, nga ḓuvha ḽa fumi ḽa ṅwedzi, hó no fhela miṅwaha ya 14 tshee Jerusalema wa phusukanywa, nda pfa ndo tsikeledzwa nga tshanḓa tsha Muṋe washu. ₂O nkhwala ndi kha bono ḽa Mudzimu a nnyisa shangoni ḽa Israele, a mmbea fhasi nṱha ha thavha ndapfu-ndapfu, thungo ya tshipembe tshayo hu tshi nga hu khou fhaṱiwa muḓi. ₃A nnyisa hone, henefho nda vhona munna we a vha a tshi nga o vhumbwa nga musinaseṱha. O vha o fara thambo ya muḓali na luṱanga lwa u ela, o ima khoroni. ₄Uyo munna a amba na nṋe a ri, “Iwe ṅwana wa muthu, sedza zwavhuḓi, kolongonya nḓevhe, zwoṱhe zwine nda u sumbedza u zwi dzhiele nzhele, vhunga wo ḓiswa fhano uri ndi u sumbedze zwone. Vhudza vhathu vha Israele zwoṱhe zwine wa zwi vhona.”

₅Thembele yo vha yo tingeledzwa nga mutsheṱo. Uyo munna o vha o fara luṱanga lwa u ela, vhulapfu halwo ho vha hu maga maṱanu na ḽithihi. A ela uyo mutsheṱo, vhuphara ha ita luṱanga luthihi, u ya nṱha ha ita luṱanga luthihi.

₆Uyo munna a ya khoroni ya vhubvaḓuvha, a namela zwiṱepisi, a ela tshiukhuvha tshayo, vhuphara hatsho ha ita maga maṱanu na ḽithihi. _7-8Rumu iṅwe na iṅwe ya vhalindi yo vha i maga maṱanu na ḽithihi vhulapfu na vhuphara, luvhondo lwa vhukati ha rumu dza vhalindi lwo vha lu na vhuphara ha maga maṱanu. Nga phanḓa ha rumu dza vhalindi ho vha hu na vanḓa ḽo lavhelesanaho na thembele. Uyo munna a ela tshiukhuvha tsha muṋango, wa u bva khaḽo u dzhena thembeleni, tsha ita maga maṱanu na ḽithihi. ₉A konou ela vanḓa ḽone ḽiṋe ḽa ita maga maṱanu na mararu, luvhondo lwaḽo thungo ya thembele lwa ita maga mavhili vhudenya halwo. ₁₀Ho vha hu na rumu tharu dza vhalindi ngeno na ngeno ha khoro ya vhubvaḓuvha, vhuraru hadzo dzi tshi eḓana; luvhondo lu re vhukati hadzo lu tshi eḓana nga vhudenya sia ḽiṅwe na ḽiṅwe. ₁₁A ela vhuphara ha khoro ha ita maga a fumi, vhulapfu hoṱhe u tsela khoroni ha ita maga a fumi na mararu. ₁₂Phanḓa ha rumu dza vhalindi ho vha hu na guvha; guvha ḽiṅwe na ḽiṅwe masia oṱhe ḽo vha ḽi tshi ita ḽiga ḽithihi vhudenya haḽo. Rumu dza vhalindi masia oṱhe dzo vha dzi maga maṱanu na ḽithihi masia oṱhe. ₁₃Uyo munna a ela vhuphara ha khoro u bva hune ṱhanga ya kwama luvhondo lwa ngeno u swika hune ya kwama lwa ngei, ha ita maga a 25; miṋango ya rumu dza vhalindi yo vha yo livhana, tharu ngeno, tharu ngeno. ₁₄A ela phuphu dzo vhandekanaho na luvhondo, dza ita maga a 60 u ya nṱha. Vanḓa ḽo vha ḽo tingeledzwa tshoṱhe nga muṱa wa thembele. ₁₅Vhulapfu ha vanḓa ḽoṱhe u bva muṋangoni wa nnḓa u swika kha wa ngomu zwa ita maga a 50. ₁₆Masiani oṱhe a khoro, rumuni dza vhalindi na mbondoni dza vhukati, ho vha hu na mabuli o lavhelesaho ngomu ha khoro. Ho vha ho oliwa miri ya mitshevho kha dzenedzo mbondo.

₁₇Uyo munna a nnzhia ra fhirela muṱani wa nnḓa. Wone wo vha u na dzirumu wo ridelwa u mona hoṱhe; ho vha hu na rumu dza 30. ₁₈Ho ridelwaho ho vha ho adza ha guma nga khoro, phevimennde u aṱama hayo hu tshi lingana na vhunavha hayo; ho ridelwaho honoho hu fhasinyana kha ha ngomu. ₁₉A ela u buḓekanya muṱa wa nnḓa u bva khoroni u swika muṱani wa ngomu, zwa ita maga a ḓana kha masia a vhubvaḓuvha na devhula.

₂₀Uyo munna a ela vhunavha na vhuphara ha khoro ya devhula ya muṱa wa nnḓa. ₂₁Yo vha i na rumu tharu dza vhalindi ngeno na ngeno; vhuphara ha mbondo vhukati hadzo, na guḓa ḽayo, zwoṱhe zwo vha zwi na mielo i no eḓana na ya khoro iḽa ya u thoma, zwi tshi ita maga a 50 vhunavha na maga a 25 vhuphara. ₂₂Mafasiṱere ayo na guḓa ḽayo na miri yayo ya makolo a muri wa mutshevho zwoṱhe zwo vha zwi na mielo i no eḓana na ya khoro ya vhubvaḓuvha. Ho vha hu na zwiṱepisi zwiṱanu na zwivhili zwi no gonya khayo, vanḓa ḽayo ḽi magumoni nga ngomu. ₂₃Muṱani wa ngomu u lavhelesana na khoro ya devhula, ho vha hu na vanḓa ḽi no fana na ḽo lavhelesanaho na ya vhubvaḓuvha. A ela tshikhala u bva kha iṅwe khoro u swika kha iṅwe zwa ita maga a ḓana.

₂₄Uyo munna a nnzhia a nnyisa sia ḽa tshipembe he ha vha hu na khoro ya tshipembe, a ela rumu dzayo dza vhalindi na vhuphara ha mbondo na guḓa; dzo vha dzi na muelo u no eḓana na dziṅwe. ₂₅Hoṱhe u mona nayo na guḓa ḽayo ho vha hu na mafasiṱere a no fana na maṅwe mafasiṱere; yo vha i na vhunavha ha maga a 50 na vhuphara ha maga a 25, ₂₆nahone yo vha i na zwiṱepisi zwiṱanu na zwivhili zwi no gonya khayo, guḓa ḽayo ḽo vha ḽi magumoni nga ngomu, ḽi na makolo a miri ya mitshevho mbondoni dzaḽo, muthihi nga ngeno, muthihi nga ngei. ₂₇Muṱa wa ngomu wo vha u na khoro ya tshipembe. A ela tshikhala itsho a tshi ya thungo ya tshipembe u bva kha iṅwe khoro u swika kha iṅwe zwa ita maga a ḓana.

₂₈Uyo munna a nnzhia a nnyisa muṱani wa ngomu tsini na khoro ya tshipembe, a ela khoro ya tshipembe; yo vha i tshi eḓana na dziṅwe. ₂₉Rumu dzayo dza vhalindi na vhuphara ha mbondo na guḓa, zwoṱhe zwo vha zwi na mielo i no eḓana na zwiṅwe. Yone na guḓa ḽayo zwo vha zwi na mafasiṱere u mona hoṱhe. Vhunavha hayo ho vha hu tshi ita maga a 50, vhuphara hayo hu tshi ita maga a 25. ₃₀Guḓa ḽayo u mona hoṱhe ḽo vha ḽi na vhunavha ha maga a 25 na vhuphara ha maga maṱanu. ₃₁Guḓa ḽo vha ḽo lavhelesa muṱa wa nnḓa. Ḽo vha ḽo oliwa miri ya mitshevho kha phuphu dzaḽo masia oṱhe, ha vha na zwiṱepisi zwiṱanu na zwiraru zwi no gonya khaḽo.

₃₂Uyo munna a nnzhia a nnyisa khoroni ya vhubvaḓuvha a i ela. Yo vha i na mielo i no fana na ya dziṅwe. ₃₃Rumu dzayo na vhudenya ha mbondo dzayo na guḓa ḽayo zwoṱhe zwo vha zwi na mielo i no ḓi nga ya zwiṅwe. Yone na guḓa ḽayo zwo vha zwi na mafasiṱere u mona hoṱhe. He ya adza hone ho vha hu tshi ita vhunavha ha maga a 50, vhuphara vhu tshi ita maga a 25. ₃₄Guḓa ḽayo ḽo vha ḽo lavhelesa muṱa wa nnḓa. Ho vha ho oliwa miri ya mitshevho kha phuphu dzaḽo, masia oṱhe ha vha na zwiṱepisi zwiṱanu na zwiraru zwi tshi gonya khayo.

₃₅Uyo munna a nnzhia a nnyisa khoroni ya devhula a i ela. ₃₆Rumu dzayo dza vhalindi na vhudenya ha mbondo dzayo na guḓa ḽayo, zwoṱhe zwo vha zwi na mielo i no nga ya zwiṅwe. Yo vha i na mafasiṱere u mona hoṱhe. He ya adza hone ho vha hu tshi ita maga a 50 vhunavha na maga a 25 vhuphara. ₃₇Guḓa ḽayo ḽo vha ḽo lavhelesa muṱa wa nnḓa. Ho vha ho oliwa miri ya mitshevho kha phuphu dzaḽo, masia oṱhe, ha vha na zwiṱepisi zwiṱanu na zwiraru zwi no gonya khayo.

₃₈Ho vha hu na rumu i na muṋango, ye muthu a vha a tshi dzhena khayo a tshi bva guḓani ḽa dzikhoro. Henefho ho vha hu tshi ṱanzwiwa zwiṱhavhelo zwi fhiswaho. ₃₉Masia oṱhe a guḓa ḽa khoro ho vha hu na maḓafula mavhili sia ḽiṅwe na ḽiṅwe hune ha shidzhelwa zwiṱhavhelo zwi fhiswaho na zwa u hangwelwa vhutshinyi na zwipfumelo. ₄₀U ya devhula u swika nga khoro, ho vha hu na maḓafula mavhili nnḓa na maṅwe hafhu maḓafula mavhili magumoni a guḓa ḽa khoro. ₄₁Ho vha hu na maḓafula maṋa ngomu ha guḓa na maḓafula maṋa nnḓa ha guḓa, oṱhe o ṱangana o vha e maḓafula maṱanu na mararu e zwiṱhavhelo zwa vha zwi tshi ṋekedzelwa nṱha hao. ₄₂Ha dovha ha vha na maḓafula maṋa a matombo o vhaḓiwaho a zwiṱhavhelo zwi fhiswaho. Ḽiṅwe na ḽiṅwe ḽo vha ḽi na vhunavha vhu no ita ḽiga na hafu na vhuphara ha ḽiga na hafu na vhulapfu u ya nṱha ha ḽiga ḽithihi. Nṱha hao ho vha hu tshi vhewa zwoṱhe zwi ṱoḓeaho hu tshi shidzhwa tshiṱhavhelo na dziṅwe nduvho. ₄₃Ho vha hu na lubomo lwa vhuphara ha hafu ya ḽiga, lwo mona na nga nṱha hao, nahone nṱha ha maḓafula ayo hu tshi vhewa ṋama ya zwiṱhavhelo.

₄₄Muṱani wa ngomu ho vha hu na rumu mbili nnḓa ha khoro; iṅwe yo vha yo vhandekana na khoro ya devhula, muṋango wayo wo lavhelesa tshipembe; iṅwe yo vha yo vhandekana na khoro ya tshipembe, muṋango wayo wo lavhelesa devhula. ₄₅Uyo munna a mmbudza a ri, “Nnḓu yo lavhelesaho tshipembe ndi ya vhotshifhe vhane vha shuma thembeleni, ₄₆nnḓu yo lavhelesaho devhula ndi ya vhotshifhe vhane vha shuma aḽiṱarini. Havho ndi vhana vha Tsadoko; ndi vhone vhana vha Livi vhe vhoṱhe vhane vha sendela tsini ha Muṋe washu vha mu shumela.”

₄₇Uyo munna a ela muṱa wa ngomu. Masia awo oṱhe o vha a tshi eḓana, vhunavha vhu maga a ḓana na vhuphara vhu maga a ḓana, ho ima aḽiṱari phanḓa ha thembele.

₄₈Uyo munna a nnzhia a nnyisa vanḓani ḽa thembele a ela mihangammbwa ya vothi ḽayo, sia ḽiṅwe na ḽiṅwe ḽo vha ḽi maga maṱanu, u aṱama ha muṋango ho vha hu maga a fumi na maṋa, ha vha na mutsheṱo wa maga mararu nga vhudenya, sia ḽiṅwe na ḽiṅwe. ₄₉Vhunavha ha vanḓa ho vha hu maga a 20, vhuphara vhu maga a 12. Ho vha hu na zwiṱepisi zwa fumi zwine zwa gonya khaḽo, nahone phanḓa ha thikho dza muṋango ho vha hu na phuphu mbili, iṅwe kha ḽino sia, iṅwe kha ḽiḽa.