MUFUNZI 8

₁Vhuṱali vhu tshisa tshifhaṱuwo tsha muthu, ha ita uri tsha si tsha sinyalala. Ndi zwone, hone ndi nnyi a no nga uyo muṱali? Ndi nnyi a no kona u ṱalutshedza zwoṱhe?

₂Ndi ri ita zwine khosi ya amba; wo anela Mudzimu uri u ḓo mu thetshelesa. ₃U songo ṱavhanya u shandukela khosi; u songo lwela zwi si zwone; khosi i nga ita zwine ya funa. ₄I na maanḓa a u ita zwine ya amba. Ndi nnyi ane a nga i sengisa a ri, “U khou itani?” ₅Ane a thetshelesa ndaela dzawe ha nga huvhali. Wa vhuṱali u ḓivha uri zwi itwa hani nahone lini. ₆Tshiṅwe na tshiṅwe tshi na tshifhinga tshatsho na nḓila yatsho, naho muhwalo we muthu a u hwala u tshi lemela.

₇A hu na a no ḓivha zwi no ḓo itea; ri nga vhudzwa nga nnyi?

₈A hu na ane a kona u thivha muya a u valela u si bve; sa zwenezwo a hu na ane a nga tinya lufu musi walwo. Musi wa nndwa a hu awelwi; sa zwenezwo vhuvhi vhu nga si awedze vhane vha vhu ita.

₉Ndo vhona zwoṱhe hezwi ndi tshi khou elekanya zwithu zwi no itwa fhano fhasi ha ḓuvha, hune vhaṅwe vha vha na maanḓa vha tambudza vhaṅwe. ₁₀Nda vhona vhavhi vha tshi swiṱwa zwaloni, vhathu vha ri u vhuya zwaloni vha vha renda, muḓi wa hangwa vhuvhi he vha ita. Na zwenezwo ndi mahandana fhedzi.

₁₁Vhathu vha tshi vhona vhavhi vha sa ṱavhanyi u wana ṱhamu, zwi vha ṱuṱuwedza u ḓi luka vhunwa. ₁₂Mutshinyi a nga ḓi ita vhuvemu lwa ḓana, a ḓi tshila.

Na nṋe ndi ḓivha hu tshi pfi, “Wa ofha Mudzimu zwi ḓo u nakela. ₁₃Hone vhavhi zwi nga si vha nakele, nge vha si ofhe Mudzimu. A vha nga lalami, vhutshilo havho vhu nga murunzi.” ₁₄Hone hu na maṅwe mahandana ane a itea fhano shangoni: Muvhuya a nga ḓi rwiwa nga ṱhamu yo teaho muvhi, muvhi a wana pfufho yo teaho muvhuya. Ndi ri na zwenezwo ndi mahandana fhedzi.

₁₅Nṋe ndi vhona zwi zwone muthu a tshi ḓiphiṋa; hufha hu si na tshivhuya tshine a nga tshi wana fhano shangoni tshi no fhira u ḽa na u nwa na u ḓiphiṋa, ndi hone a tshi ḓo shuma o takala maḓuvha oṱhe a vhutshilo hawe e Mudzimu a mu ṋea fhano fhasi ha ḓuvha.

₁₆Ndo linga u elekanya uri ndi ḓivhe zwa vhuṱali, ndi ḓivhe zwi iteaho shangoni, nda wana uri naho muthu a tshi nga ḓidzima khofhe vhusiku na masiari, ₁₇a nga si vhuye a kona u ṱalukanya zwine Mudzimu a ita. Nangwe muthu a ḓidina nga u ṱoḓisesa, a nga si zwi wane. Vhaṱali vha nga ḓi ri vha a ḓivha, hone vhukumakuma vha nga si zwi wane.