MUFUNZI 7

₁Hu pfi, “Bvumo ḽivhuya ḽi fhira tshiḓolo tsha mutengo muhulu,” hone nṋe ndi ri ḓuvha ḽa u fa ḽi fhira ḓuvha ḽa u bebwa.

₂U ya hune ha lilwa mufu hu fhira u ya munyanyani, ngauri vha tshilaho vha fanela u dzula vha tshi elekanya uri lufu ndi vhuyo ha muṅwe na muṅwe.

₃U ṱungufhala hu fhira tshiseo: tshifhaṱuwo tsha ṱungufhala ndi u tonda mbilu.

₄Ane a dzula a tshi elekanya zwa madakalo ndi tsilu; muṱali u elekanya lufu.

₅U seṅwa nga muṱali hu fhira u imbelwa tshirendo nga tsilu.

₆Tsilu ḽi sea unga mipfa i tshi thathaba muliloni; ndi mahandana fhedzi.

₇Na muṱali u a tsilufhala nga u shushedzwa; tshanḓanguvhoni tshi tshinya mbilu.

₈Magumoni a tshithu hu fhira mathomoni atsho.

U sa fhela mbilu hu fhira u ḓihudza. ₉U songo ṱavhanya u sinyuwa; mbiti dzi dzula mbiluni ya tsilu.

₁₀U songo ri, “Ndi mini maḓuvha a kale o vha a tshi fhira a zwino?” Iyo mbudziso a i sumbedzi vhuṱali.

₁₁Vhuṱali vhu takadza unga ifa; vhu farisa vhapenyu. ₁₂Vhu tsireledza muthu unga tshelede. Tshivhuya tsha nḓivho ndi uri vhuṱali vhu tshidza muthu.

₁₃Edzou elekanya mishumo ya Mudzimu: Zwe a zwi kombamisa ndi nnyi ane a nga zwi onyolosa? ₁₄Arali zwi tshi u nakela, takala! Na musi u tshi welwa nga khombo u elelwe uri zwoṱhe vhuvhili hazwo zwi bva kha Mudzimu; a u ḓivhi zwine zwa kha ḓi ḓo itea.

₁₅Vhutshilo hovhu hanga ha mahandana ndo vhona zwoṱhe: A thetshelesaho Mudzimu a nga kha ḓi fa a tshi mu thetshelesa, muvhi a ḓi sala a tshi lalama e muvhi. ₁₆Ndi zwine nda ri u songo vha muvhuya wa kalula, u songo ṱalifhesa; u ḓilozwelani? ₁₇Nahone u songo vha muvhi wa kalula wa vha tsilu; u felani tshifhinga tshau tshi sa athu swika? ₁₈Ndi zwavhuḓi u tshi fara tshino, na tshiḽa u si tshi litshe. Muthu a no ofha Mudzimu u ḓo tinya u kalula hoṱhe.

₁₉Vhuṱali vhu u itela zwi no fhira zwine vhavhusi vha fumi vha nga itela muḓi. ₂₀Hone a hu na na muthihi shangoni a re muvhuya lune a dzula a tshi ita zwi re zwone a sa khakhi.

₂₁U songo londa zwoṱhe zwine vhathu vha amba, u sa ḓo vhuya wa pfa phuli yau i tshi u sema. ₂₂Hufha u tshi zwi ḓivha uri na iwe ndi kanzhi u tshi sema vhaṅwe.

₂₃Ndo lingedza zwoṱhe ndi tshi ṱoḓa vhuṱali, ndi tshi ri ndi ḓo ṱalifha, hone nda si kone na u vhu hovhelela. ₂₄Ndi nnyi ane a nga ḓivha zwiphiri zwa vhutshilo? Hufha zwi tshi fhira ṱhalukanyo yashu kule-kule; zwi a ri kunda. ₂₅Nda dovha nda ḓikumedza uri ndi ṱalukanye, ndi ṱoḓisese zwa vhuṱali na nzudzanyo ya zwithu, na u ṱalukanya uri vhutsilu vhu ḓiswa nga vhuvhi naa, vhuḓabaḓaba vhu bva kha tshipengo naa.

₂₆Nda wana hu na musadzi a no kalakata u fhira lufu; ene muṋe ndi tshikwekwe, mbilu yawe ndi tshilibana, zwanḓa zwawe ndi geḓane. Ane a takadza Mudzimu u ḓo mu ponyoka, mutshinyi u ḓo fashiwa.

₂₇Nṋe Mufunzi ndi ri, khezwi zwe nda zwi wana ndi tshi khou ṱoḓa dziphindulo nga nthihi nga nthihi: ₂₈Zwe nda vha ndi tshi zwi ṱoḓa a tho ngo zwi wana. Ndo wana munna muthihi fhedzi a no ḓivhalea kha tshigidi tsha vhathu, hone musadzi a tho ngo wana na muthihi zwawe. ₂₉Zwe nda guda ndi hezwi fhedzi: Mudzimu a tshi vhumba vhathu o vha vhumba vha si na vhufhura, vhone vhaṋe vha ḓipiringanya nga vhumbulu.