DOTORONOMIO 16

₁“Ni songo hangwa ṅwedzi wa Avivi; nga wonoyo ṅwedzi ni itele Muṋe washu Mudzimu waṋu vhuṱambo ha Paseka, ngauri Muṋe washu Mudzimu waṋu o ni pfulusa Egipita nga ṅwedzi wa Avivi hu vhusiku. ₂Fhethu he Muṋe washu Mudzimu waṋu a khethela dzina ḽawe, henefho ni fanela u ṱhavhela Muṋe washu Mudzimu waṋu nngu kana mbudzi kana kholomo ya Paseka i vhe nduvho. ₃Ni songo i ḽa na vhurotho vhu na mbilisa; maḓuvha maṱanu na mavhili oṱhe ni ḽe vhurotho vhu si na mbilisa. Vhu ḓo ni humbudza u tambula haṋu. Vhutshilo haṋu hoṱhe ni fanela u elelwa ḓuvha ḽe na pfuluwa Egipita, ni tshi ṱuwa nga tshikapikapi ni si na tshifhinga. ₄Hu fanela u fhela maḓuvha maṱanu na mavhili hu sa wanali mbilisa shangoni ḽaṋu ḽoṱhe. Ṋama ye na ṱhavhela Muṋe washu nga ḓuvha ḽa u ranga ni songo sia muladza wayo une wa nga ḽiwa nga matshelo.

₅“Ni songo ṱhavha zwifuwo zwa nduvho ya Paseka miḓini yaṋu ye Muṋe washu Mudzimu waṋu a ni ṋea, ₆ni zwi ṱhavhe henefho fhethu hune a khethela dzina ḽawe. Ni zwi ṱhavhe nga madekwana, ngauri ndi tshone tshifhinga tshe na takuwa ngatsho ni tshi pfuluwa Egipita. ₇Ni gotshe ṋama ni i ḽe fhethu he Muṋe washu Mudzimu waṋu a hu nanga, nga matsheloni ni konou humela hayani. ₈Ni ḽe vhurotho vhu si na mbilisa maḓuvha maṱanu na ḽithihi, ḽa vhu-7 ni kuvhangane ni ite vhuṱambo ha u hulisa Muṋe washu Mudzimu waṋu, nahone mishumo ni i litshe nga ḓuvha heḽo.

₉“Musi ni tshi thoma u kaṋa mavhele ni vhale vhege ṱhanu na mbili ₁₀ni konou itela Muṋe washu Mudzimu waṋu vhuṱambo ha Khaṋo. Nga vhuṱambo honoho ni ḓo ṋekedza Muṋe washu Mudzimu waṋu nduvho ine na tou funa, ni tshi bvisa nga he a ni shudufhadza ngaho. ₁₁Ni takale ni tshi vhonwa nga Muṋe washu Mudzimu waṋu ní fhethu he a khethela dzina ḽawe, ni takale ní na muṱa woṱhe – vhana na vhashumi na Vhalivi vhane na dzula navho, na vhatsinda na tsiwana na tshilikadzi dzine dza dzula shangoni ḽaṋu. ₁₂Zwenezwo ni ḓo elelwa uri no vha ni dziphuli shangoni ḽa Egipita. Ndaela idzi ni dzi vhulunge ni dzi tevhedze.

₁₃“Musi no vhuisa khaṋo ya goroi na dovha na vhuisa na ya waini, ni ite vhuṱambo ha Mishasha maḓuvha maṱanu na mavhili, ₁₄ni takale munyanyani uyo na muṱa woṱhe – vhana na vhashumi na Vhalivi na vhatsinda na tsiwana na tshilikadzi dzine dza dzula miḓini yaṋu. ₁₅Vhuṱambo uho ni vhu ite maḓuvha maṱanu na mavhili ni tshi itela u hulisa Muṋe washu Mudzimu waṋu nó kuvhangana fhethu he a ḓinangela. Nga ḽi vhe dakalo fhedzi, ngauri Muṋe washu Mudzimu waṋu o ni shudufhadza kha zwoṱhe zwe na lima na zwe na shuma.

₁₆“Ngauralo vhanna vha haṋu vhoṱhe vha fanela u sendela phanḓa ha Muṋe washu Mudzimu waṋu luraru nga ṅwaha vha tshi ḓa fhethu he a ḓinangela. Ndi nga vhuṱambo ha Vhurotho vhu si na mbilisa na ha Khaṋo na ha Mishasha. Hone ni songo swika ni si na nduvho, ₁₇muṅwe na muṅwe a ḓe na nduvho yawe a tshi bvisa nga he Muṋe washu Mudzimu waṋu a mu ṋea mashudu ngaho.

₁₈“Miḓini yaṋu yoṱhe ine Muṋe washu Mudzimu waṋu a ni ṋea, ni vhee vhahaṱuli na vhakoma. Vhenevho vha fanela u sengulusa mafhungo a vhathu vha haṱula vha tshi tevhedza mulayo. ₁₉Vha songo haṱulela thungo, vha songo vha na tshiṱalula, vha songo ṱanganedza tshanḓanguvhoni; tshanḓanguvhoni tshi pofudza muṱali, tshi kundisa a re ngohoni u wana zwo mu fanelaho. ₂₀Inwi tshaṋu ndi u lwela khaṱhulo mbuya fhedzi, ndi hone ni tshi ḓo tshila, na dzula shangoni ḽine Muṋe washu Mudzimu waṋu a ni ṋea.

₂₁“Tsini ha aḽiṱari ye na fhaṱela Muṋe washu Mudzimu waṋu ni songo ḓiṱokela thanda ya Ashera ya muri ufhio na ufhio. ₂₂Ni songo ḓiimisela phuphu ya tombo na i luvha; Muṋe washu u a zwi vhenga hezwo zwithu.