DANIELE 12

₁“Misi yeneyo hu ḓo bvelela Mikaele muruṅwa muhulwane ane a londola vhathu vha haṋu. Hu ḓo vha na u tambula huhulu, hu sa vhuyi ha vhambedzwa na he ha vhuya ha vha hone tshee tshakha dza vha hone. Musi tshifhinga tshenetsho tshi tshi swika, vhathu vha haṋu vha ḓo tshidzwa, vhoṱhe vhe madzina avho a ṅwalwa buguni ya Mudzimu. ₂Vhanzhi vho eḓelaho ngomu mavuni vha ḓo vuwa: vhaṅwe vha ḓo vutshela u tshila tshoṱhe, vhaṅwe vha ḓo vutshela u shona na u nyadzea lini na lini. ₃Vhaṱali vha ḓo penya unga tshedza tsha ṱaḓulu, vho funzaho vhanzhi zwivhuya vha ḓo penya unga ṋaledzi lini na lini.

₄“Huno iwe Daniele aya maipfi u songo a vhudza muthu, u shatele bugu yao u swika tshifhinga tsha vhufhelo. Vhanzhi vha ḓo i fhenḓa vha konou wana nḓivho khulu.”

₅Ndi hone nṋe Daniele ndi tshi sedza nda vhona vhaṅwe vhavhili vho ima, muṅwe o ima bamani ḽa nga ngeno ḽa mulambo, muṅwe o ima kha ḽa nga ngei. ₆Muṅwe a vhudzisa uḽa munna we a vha o ambara lukhaha o ima nṱha ha mulambo a ri, “Izwi zwimangadzo zwi ḓo itea lini?” ₇Nda pfa uyo munna o ambaraho lukhaha a tshi amba ó ima nṱha ha mulambo, a takusa tshanḓa tshawe tshauḽa na tshamonde a sumba ṱaḓulu, a ana nga a tshilaho lini na lini a ri, “Hu ḓo ranga u fhela tshifhinga tsho tewaho. Zwoṱhe hezwo zwithu zwi ḓo itea musi hu tshi fa ane a tovhola vhathu vha Mudzimu.”

₈Nda thetshelesa, hone nda si zwi ṱalukanye. Ndi hone ndi tshi ri, “Muṋe wanga, hezwo zwi ḓo fhela hani?” ₉Ene a ri, “Daniele, ṱuwa: haya maipfi a songo vhudzwa muthu, a shatelwe u swika tshifhinga tsha vhufhelo. ₁₀Vhanzhi vha ḓo ṱanzwiwa tshika vha sala vho tshena vho bviswa manyelo, hone vhavhi vha ḓo ḓi dzula vha tshi ita vhuvhi vha tshi ya. Vhavhi vha nga si zwi ṱalukanye, zwi ḓo ṱalukanywa nga vha na ṱhalukanyo fhedzi. ₁₁U bva tshee tshiṱhavhelo tshi no ṋekedzwa misi yoṱhe tsha iledzwa ha imiswa vhuṱudzi vhu ḓisaho mutshinyalo, hu ḓo fhela maḓuvha a 1 290. ₁₂U na mashudu ane a ima o khwaṱha ha vhuya ha fhela maḓuvha a 1 335. ₁₃Huno iwe ṱuwa u yo awela, u ḓo vutshela u wana mukovhe wau nga tshifhinga tsha vhufhelo.”