DANIELE 11

₂“Zwino-ha ndi u dzumbululela ngoho: Pheresia hu kha ḓi ḓo vhusa maṅwe mahosi mararu, ha dovha ha vhusa wa vhuṋa o pfumaho u fhira vhaḽa vhaṅwe. Musi o no wana maanḓa nga lupfumo lwawe u ḓo ṱuṱuwedza vhoṱhe uri vha lwe na muvhuso wa Giriki. ₃Ha ḓo konou bvelela khosi ya maanḓa, muvhuso wayo wa vha muhuluhulu, ya ita zwine ya funa. ₄Musi a tshi kha ḓi thoma u vhusa, muvhuso wawe u ḓo pwashea wa fhandekanywa, wa bva zwipiḓa zwiṋa, hone zwi sa khwaṱhi unga wawe. Muvhuso a u nga dzhiwi nga vhana vhawe, u ḓo tupulwa wa ṋewa vhaṅwe, vha thungo.

₅“Khosi ya Tshipembe i ḓo vha na maanḓa, hone mulangammbi wawe u ḓo vha na maanḓa a no fhira awe, a vhusa shango ḽihuluhulu. ₆Musi ho no fhela miṅwaha vha ḓo konana. Ṅwananyana wa khosi ya Tshipembe u ḓo vhingwa nga khosi ya Devhula u khwaṱhisa pfano iyo. Huno pfano a i nga ṱhaphudzi, uyo mufumakadzi na munna wawe na ṅwana wawe na pheletshedzi dzawe vha ḓo vhulawa. ₇Muṅwe wa mashaka a uyo mufumakadzi u ḓo vha khosi. Onoyo u ḓo lwa na mmbi ya khosi ya Devhula a vhuya a swika vhushavheloni hawe, a lwa navho a vhuya a vha kunda. ₈U ḓo hwala midzimu yavho na zwifanyiso zwo fulwaho nga tsimbi na thundu yavho ya mutengo muhulu ya siliva na musuku a isa Egipita. Ha ḓo fhela miṅwaha a sa dini khosi ya Devhula. ₉Huno khosi ya Devhula i ḓo dia khosi ya Tshipembe, hone u ḓo dovha a humela shangoni ḽawe.

₁₀“Vhana vhawe vha ḓo ḓilugisela u bva pfumo vha kuvhanganya mmbi khulu ya nga muḓalo wa maḓi u sa konei vha vhilimedza swina vha vhuya vha ḽi swikisa vhushavheloni haḽo. ₁₁Khosi ya Tshipembe i ḓo bva pfumo ya sinyuwa ya yo lwa na khosi ya Devhula, yone ya ḓa na mmbi khulu ya kundwa. ₁₂Khosi ya Tshipembe i ḓo pfa i tshi ḓihudza musi vha tshi hwala iyo mmbi vha tshi ṱuwa nayo, a vhulaha zwigidi na zwigidi, hone ha nga dzuli o kunda. ₁₃Khosi ya Devhula i ḓo vhumba iṅwe mmbi i no fhira iḽa ya u ranga, musi ho no fhela miṅwaha minzhi ya vhuya na mmbi khulu i na zwoṱhe zwi no ṱoḓea. ₁₄Misi yeneyo vhanzhi vha ḓo vutshela khosi ya Tshipembe. Na vhaṅwe vhanna vha vhathu vha haṋu vha no takalela zwa nndwa vha ḓo i shandukela vha tshi ri vha khunyeledze vhuporofita ha vhuḓivhusi, hone vha kundwa. ₁₅Khosi ya Devhula zwenezwo i ḓo ḓa ya govhela uyo muḓi u re na mitsheṱo, ya u thuba. Mmbi ya Tshipembe i nga si tsha kona u lwa, na vhahali vhavho vha khwiṋe vha nga si tsha vha na nungo. ₁₆Iyo khosi i ḓo ita zwine ya funa, a hu na ane a nga imedzana nayo. U ḓo ṱoka midzi henefho Shangoni ḽa vhugala, a vha na maanḓa a u ḽi phusukanya. ₁₇U ḓo elekanya u ḓa na maanḓa a muvhuso wawe woṱhe, a ita pfano na khosi ya Tshipembe. U ḓo mu ṋea ṅwananyana wawe o nakesaho uri a mu vhinge a tshi itela u tekula muvhuso wawe, hone izwo zwi nga si itee, a nga si mu kone. ₁₈Zwenezwo u ḓo livha mashangoni a re seli ha lwanzhe a kunda vhunzhi hao, hone muṅwe mulangammbi u ḓo mu kaṱudza a mu kunda a fhedza u ḓihudza hawe.

₁₉“Ndi hone a tshi ḓo kona u humela vhushavheloni ha shango ḽa hawe, hone u ḓo khukhulwa a wa a si tsha dovha a vhonala. ₂₀A no ḓo sala a tshi vhusa u ḓo ruma muthelisi a yo thelisa vhathu uri a tikedze vhugala ha vhuhosi hawe. Huno hu ḓo ri ho fhela miṅwaha i si gathi, a vhulawa, hone a sa fi nga mbiti dza muthu kana nga nndwa.

₂₁“Hu ḓo sala hu tshi vhusa khosi i nyadzeaho, a si na pfanelo dza u vha khosi. U ḓo ḓa vhathu vha songo vhuya vha humbula, a dzhia muvhuso nga vhukwila. ₂₂U ḓo lozwa mmbi dzoṱhe dzine dza lwa nae, a vhulaha na murangaphanḓa wa vhathu vha mulanga. ₂₃U ḓo ita mulanga wa tshimbevha, a fhura a dovha, a ḓi vha na maanḓa a tshinya, naho a tshi vhusa vhathu vha si gathi. ₂₄U ḓo dia mashango o pfumaho vhathu vha songo vhuya vha zwi lavhelela, a ita zwe vhokhotsi awe na vhomakhulukuku wawe vha si zwi ite. U ḓo kovhekanya vhathu vhawe zwe a thuba nndwani na zwe a ṱangula vhathu, na lupfumo. U ḓo luka vhunwa ha u tekula madzhavhelo, hone izwo u ḓo zwi ita tshifhinganyana.

₂₅“U ḓo luma mbilu a ṱuwa na mmbi khulu a yo dia khosi ya Tshipembe. Khosi ya Tshipembe ya bva na mmbi khulu ya maanḓa, hone ya si kone u imedzana nae nge ya lukelwa vhunwa ya fhurwa. ₂₆Vhane vha ḽa nayo vha ḓo i lozwa, mmbi yayo ya swielelwa kule, vhanzhi vha vhulawa nndwani.

₂₇“Ayo mahosi mavhili a mbilu dzo tshingamelaho vhuvhini a ḓo dzula ḓafulani a ḽa oṱhe a zwifhelana, hone vha si wane zwine vha zwi ṱoḓa, ngauri tshifhinga tsho vhewaho tshi ḓo vha tshi sa athu swika. ₂₈Khosi ya Devhula i ḓo humela shangoni ḽayo yo pfuma, hone a fhira nga shangoni ḽa vhathu vhe Mudzimu a vhofha navho mulanga, a hu tshinya unga o dzula o elekanya, a konou humela shangoni ḽawe.

₂₉“Nga tshifhinga tsho tewaho u ḓo dovha a dia muvhuso wa Tshipembe, hone itsho tshifhinga zwi no ḓo itea a zwi nga fani na zwa u ranga. ₃₀Vha seli ha lwanzhe vha thungo ya vhukovhela vha ḓo ḓa nga zwikepe vha lwa nae a kulea nungo. U ḓo huma a shululela mbiti dzawe kha vhathu vhe Mudzimu a vhofha navho mulanga, a takalela vhane vha furalela mulanga wa Mudzimu.

₃₁“Mmbi yawe i ḓo ḓa ya kumadza Hukhethwa na muḓi. Vha ḓo ri hu songo tsha ṋekedzwa tshiṱhavhelo tsha misi yoṱhe, vha imisa vhuṱudzi vhu ḓisaho mutshinyalo henefho. ₃₂Vho shandukelaho mulanga wa Mudzimu u ḓo vha hoya vha mu tikedza, hone vhathu vhane vha ḓivha Mudzimu wavho vha ḓo takuwa vha ima vho khwaṱha vha lwa nae. ₃₃Vhathu vha re na ṱhalukanyo vha ḓo funza vhanzhi, naho zwo ralo vhaṅwe vhavho vha ḓo vhulawa nga pfumo, vha fhiswa, vha thubiwa, vha ṱangulwa, maḓuvha a si gathi. ₃₄Vha ḓo ri vha tshi khou ralo u vhulawa, vha fariswanyana, vhanzhi vha ima navho lwa muhoyo. ₃₅Na kha vhenevho vha re na vhuṱali ha dovha ha vhulawa vhaṅwe, izwo zwi ḓi ita uri vha bviswe manyelo, vha kuniswe, vha ṱanzwiwe, hu vhuye hu swike vhufhelo, ngauri tshifhinga tsho vhewaho tshi kha ḓi ḓa.

₃₆“Khosi i ḓo ita zwine ya funa. U ḓo ḓihudza a tshi ya, a ri ene u fhira midzimu yoṱhe, u ḓo amba zwi sa athu pfiwa a tshi nyefula Mudzimu wa midzimu. Zwi ḓo mu nakela mbiti dza Mudzimu dza vhuya dza thuthuba, ngauri zwe zwa dzudzanywa vhukuma zwi ḓo khunyelela. ₃₇Midzimu ya vhokhotsi awe ha nga i londi, mudzimu une vhasadzi vha u funa ha nga u sedzi, mudzimu ufhio na ufhio ha nga u londi, u ḓo vhona unga ene u i fhira yoṱhe. ₃₈U ḓo litsha yone a hulisa mudzimu wa u tsireledza dzhavhelo, a hulisa mudzimu we vhokhotsi awe vha si u ḓivhe, a u luvha nga musuku na siliva na matombo a mutengo muhulu na zwifhiwa zwa mutengo muhulu. ₃₉U ḓo dia muḓi wo tangwaho nga mitsheṱo a tshi ḓitika nga mudzimu usili une a u luvha, vhane vha ima nae a vha hulisa zwihulu, a ita uri vha vhuse vhathu vhanzhi, a vha pfufha nga shango.

₄₀“Musi tshifhinga tsha vhufhelo tshi tshi swika, khosi ya Tshipembe i ḓo mu bvela pfumo, khosi ya Devhula ya ḓa ya lwa nae nga gariki dza nndwa na vhanameli vha dzibere na zwikepe zwinzhi. U ḓo dia mashango manzhi a a swiela unga ḓumbu a fhira. ₄₁U ḓo dia Shango ḽa vhugala a vhulaha vhathu vhanzhi, hone vhathu vha shango ḽa Edomo na ḽa Muaba na vhunzhi ha Vhaamoni vha ḓo mu ponyoka.

₄₂“U ḓo dia mashango manzhi, na shango ḽa Egipita a ḽi nga mu ponyoki. ₄₃U ḓo dzhia lupfumo lwa musuku na siliva na zwoṱhe zwa Egipita zwa mutengo muhulu. U ḓo kunda vha Libia na vha Kushu. ₄₄Huno mafhungo a no bva vhubvaḓuvha na devhula a ḓo mu dina, nahone u ḓo sinyuwa a bva pfumo a lozwa vhathu vhanzhi. ₄₅U ḓo akha dennde dzawe dza musanda vhukati ha lwanzhe na thavha khethwa ya vhugala. Naho zwo ralo u ḓo fa, a hu nga vhi na ane a ḓo ima nae.