DANIELE 10

₁Nga ṅwaha wa vhuraru wa muvhuso wa Khoreshe khosi ya Pheresia, Daniele ane ḽiṅwe a pfi Beletheshatsara, a ḓiselwa nzumbululo, nzumbululo ya ngoho yo ḓaho hu na nndwa khulu. Iḽo bono ḽe a dzumbululelwa a ḽi ṱalukanya zwavhuḓi.

₂Tshifhinga tshenetsho nṋe Daniele ndo vha ndi tshi khou lila vhege tharu dzoṱhe. ₃Ndo vha ndi sa ḽi zwiḽiwa zwa madzanga, ndi sa ḽi ṋama, waini i sa kwami mulomo wanga, na u ḓola ndi sa ḓoli idzo vhege tharu dza vhuya dza fhela. ₄Huno nga ḓuvha ḽa 24 ḽa ṅwedzi wa u ranga, ndó ima bamani ḽa mulambo muhulu wa Thigirisi, ₅nda takusa maṱo, nda vhona munna o ambara lukhaha, o vhofha khundu dzawe nga bannda ḽa musuku u songo vangwaho, ₆muvhili wawe u tshi penya unga ndalama, tshifhaṱuwo tshawe tshi tshi nga lupenyo lwa mvula, maṱo awe a tshi nga khavhu dza mulilo, zwanḓa zwawe na milenzhe zwi tshi penya unga musinaseṱha wo kulutedzwaho, ipfi ḽawe ḽi tshi pfala unga mubvumo wa gogo ḽa vhathu.

₇Ndi nṋe Daniele ndi ndoṱhe ndo vhonaho iḽo bono; vhathu vhe nda vha ndi navho a vho ngo ḽi vhona, vho tou farwa nga nyofho khulu lwe vha shavha vha yo dzumbama. ₈Nda sala ndi ndoṱhe ndo sedza iḽo bono, nda pfa ndo kulea nungo, tshifhaṱuwo tshanga tsha shanduka nga u tshenuwa, nungo dze nda vha ndi nadzo dza fhela.

₉Nda pfa a tshi amba, nda ri u pfa ipfi ḽawe nda wa nga tshifhaṱuwo ndó dzidzivhala. ₁₀Nda pfa tshanḓa tshi tshi khou nkwama, tsha mmvusa nda gwadama nga magona nda farelela fhasi ndi tshi khou tetemela.

₁₁A ri, “Daniele, mufunwa-nga-Mudzimu, u thetshelese zwavhuḓi zwine nda ḓo amba, takuwa, ndí fhano ndo rumiwa ha iwe.” A ri u amba zwenezwo nda takuwa ndi tshi khou tetemela. ₁₂Zwino a ri, “Daniele, u songo ofha: u bva musi wa u ranga zwe wa ri u ḓo ḓiṱukufhadza phanḓa ha Mudzimu uri u kone u vha na ṱhalukanyo, maipfi au o pfala; nṋe ndo ḓiswa nga maipfi au. ₁₃Muruṅwa a no londola muvhuso wa Pheresia o nnzivhisa ha vhuya ha fhela maḓuvha a 21, hone Mikaele muṅwe wa vharuṅwa vhahulwane a ḓa a mpfarisa, ndo sia ndo kunda mahosi a Pheresia. ₁₄Zwino nda ḓa-ha u u vhudza zwine zwa ḓo itea kha vhathu vha haṋu misi i ḓaho, ngauri na heḽo bono ḽi amba misi ya vhufhelo.”

₁₅A ri u mmbudza izwo zwithu nda shuvhama nda si ambe tshithu. ₁₆Ndi hone muṅwe a no nga muthu a tshi ḓa a kwama mulomo wanga. Nda thoma u amba, nda konou amba na o imaho phanḓa hanga nda ri, “Muṋe wanga, bono iḽi ḽi a nnyofhisa, ndo farwa nga vhuṱungu vhu no nga ha musadzi a tshi khou beba, ndo kulea nungo. ₁₇Ndi nga amba hani na vhone muṋe wanga zwino ndo kulea nungo ndi si tsha kona na u fema?” ₁₈Uḽa a no nga muthu a dovha a nkwama, a nṋea nungo, ₁₉a ri, “U songo ofha, mufunwa-nga-Mudzimu, mulalo u vhe na iwe, ivha munna, khwaṱha!” A tshi khou amba na nṋe nda pfa ndo khwaṱha nda dovha nda ri, “Amba muṋe wanga, ndo no vha na nungo.”

₂₀Zwenezwo a ri, “U a ḓivha uri ndi mini ndo ḓa ha iwe? A thi nga lengi u huma nda yo lwa na muruṅwa a londolaho Pheresia; ndi tshi ṱuwa hu ḓo ḓa muruṅwa a no londola Giriki. ₂₁Hone ndi ḓo ranga u u vhudza zwo ṅwalwaho Buguni ya ngoho. (A hu na ane a ntikedza ndi tshi lwa navho, ndi tikedzwa nga Mikaele muruṅwa ane a londola Israele.