Luṅwalo lwa Jeremia a tshi lwa na midzimu ya zwitungulo
1Ngeyi khophi ya luṅwalo lwe Jeremia a ṅwalela avho vhe vha vha vha tshi khou iswa vhuthubwani Babilonia nga khosi ya Vhababele, a tshi vha vhudza zwe Mudzimu a mu laya, a ri:
Ni khou iswa vhuthubwani Babilonia nga Nebukhadinetsara, khosi ya Vhababele, nge na tshinya phanḓa ha Mudzimu. 2Musi ni tshi swika Babele ni ḓo dzula hone na fhedza miṅwaha minzhi, ha vhuya ha fhira mirafho miṱanu na mivhili (7), nda ḓo konou ni vhuisa nga mulalo ni tshi bva henengei. 3Zwino henengei Babilonia ni ḓo vhona midzimu yo itwaho nga siliva na musuku na thanda, ine vhathu vha i hwala kha mahaḓa avho, i no ofhiwa nga vhannḓa. 4Ni vhone ni sa ḓo edzisa maitele a vhatsinda na ofha midzimu iyo yavho 5musi ni tshi vhona i tshi gwadamelwa nga gogo ḽi re phanḓa hayo na murahu hayo. Tshaṋu ni ambele mbiluni ni ri, “Ho fanela u gwadamelwa Iwe Muṋe washu.” 6Vhukuma muruṅwa wanga u na inwi, u khou londola vhutshilo haṋu. 7Midzimu iyo yo fhomiwa nga musuku na siliva, ndimi dzayo dzo huṱiwa nga vhavhaḓi dza suvhelela, hone ndi i si ya ngoho, a i koni u amba. 8Vhathu vha dzhia musuku vha vhumba dzikhare dza ṱhohoni dza midzimu yavho, sa musi vha tshi itela musidzana a no funa zwa u ḓinakisa. 9Tshifhinga tshiṅwe vhaphrista vha dzhiela midzimu iyo yavho siliva na musuku nga tshidzumbe zwa shumela vhone vhaṋe, 10kana zwiṅwe zwa ṋewa dziphombwe nḓuni dzadzo he dza fhaṱwa mutsheṱoni. Midzimu iyo yavho ya siliva na musuku na thanda vha i ambadza zwiambaro unga vhathu, 11nangwe yo ambadzwa nguvho dza muridili, i ḓi ḽiwa nga vhulali ya ḽiwa nga tsole. Vha phumula zwifhaṱuwo zwayo vha bvisa buse ḽa thembele ḽo khokhanaho khayo. 12Muṅwe wa iyo midzimu wo fara luḓo unga muvhusi wa dzingu, hone a u koni u lozwa muthu ane a u levhela. 13Muṅwe wo fara tsanga kana banga nga tshanḓa tshauḽa, hone a u koni u ḓilwela nndwani na kha mavemu. 14Izwo zwi sumba uri a si midzimu; ni songo i ofha.
15Zwi ḓi nga muthu o pwasha mudzio wawe u si tshee na mushumo; 16na midzimu yavho yo tou ralo musi yo vhewa thembeleni dzavho. Maṱo ayo o ḓala buse ḽi no bva ṋayoni dza vhane vha dzhena. 17Miṱa yayo yo fhaṱeledzwa nga mitsheṱo, vhaphrista vha tsireledza thembele dzayo nga dzigethe na matsimbi na dzibaudu uri i sa ḓo hwalwa nga mavemu, mahothi a hoṋiwa u ḓi nga nnḓu ya muthu o haṱulelwaho lufu nge a khakhela khosi. 18Vha i fungela mbone nnzhi dzi no fhira dzine vha ḓifungela dzone, nangwe zwo ralo, midzimu iyo a i koni u vhona luvhone na luthihi. 19Midzimu iyo i tou nga phuphu ya thembele; i muṋiwa nga ngomu, muṱwa u bva mavuni wa i ḽa wa ḽa na khanzu dzayo, yone i sa zwi pfi. 20Zwifhaṱuwo zwayo zwo swifhadzwa nga vhutsi ha thembele. 21Milemalema na ṱhambamaḓi na zwiṋoni zwa tshakha-tshakha zwi kavha kha mivhili yayo na ṱhohoni dzayo, na zwimange zwi dzula khayo. 22Ni khou zwi vhona: a si midzimu, ni songo i ofha.
23Nangwe zwo fhomiwa nga musuku uri zwi nake, arali muthu a sa phumula vhulali, a i penyi, na musi i tshi vhumbiwa a yo ngo pfa tshithu. 24Nangwe yo rengwa nga mutengo ufhio na ufhio, a i na muya ngomu hayo. 25Vhunga i si na ṋayo, i tou hwalwa mahaḓani a muthu, ha vha u ṱana kha vhoṱhe uri ndi ya mahandana. Huno na vhane vha i luvha i a vha shonisa, ngauri arali ya wela fhasi vha fanela u i vusa. 26Nangwe yo no imiswa a i koni u tshimbila nga yoṱhe; arali ya sendama a i koni u ḓiimisa; u i ṋekedza nduvho zwi ḓi fana na u dzi ṋea vhafu. 27Vhaphrista vhayo vha dovha vha rengisa zwiṱhavhelo zwayo uri vha vhuelwe. Vhafumakadzi vhavho na vhone vha vhulunga ṋama iṅwe, hone a vha i kovhekani na vhashai na vhahoṱa. 28Zwiṱhavhelo zwine ya ṋewa, na vhasadzi vha no khou vhona ṅwedzi na vhadzadze vha nga ita na u zwi kwama. Ni khou zwi vhona: a si midzimu; ni songo i ofha.
29Zwino i nga pfi midzimu nga ḽifhio, hufha nduvho dza midzimu iyo ya siliva na musuku na thanda dzi tshi ṋekedzwa nga vhasadzi? 30Nahone thembeleni dzayo vhaphrista vha tumba vho ambara zwiambaro zwo ṱahalaho, vho vheula mavhudzi na ndebvu, vhá songo pila ṱhoho dzavho. 31Vha ṱavha mukosi, vha honḓa phanḓa ha midzimu yavho sa zwine vhaṅwe vha ita vhuṱamboni ha u swiṱa mufu. 32Vhaphrista vha dzhia zwiambaro zwa midzimu yavho vha ambadza vhafumakadzi vhavho na vhana vhavho. 33Naho muthu a itela midzimu iyo zwivhi kana zwivhuya, a i koni u mu lifhela. A i koni u vhumba khosi kana u i bvisa vhuhosini. 34Hu ḓi nga u ṋea muthu lupfumo kana mali, midzimu iyo a i koni. A kundwa u khunyeledza zwe a i anela, a i koni u mu vhila. 35Midzimu iyo a i koni u tshidza muthu lufuni, a i koni u lamukisa a shayaho nungo kha wa maanḓa. 36Muthu wa bofu a i koni u mu swingulusa, a i koni u lamukisa muthu a re khomboni. 37A i koni u pfela tshilikadzi vhuṱungu kana u tonda tsiwana. 38Zwifanyiso izwo zwo fhomiwaho musuku na siliva zwi nga matombo a bvaho thavhani, vhane vha zwi shumela vha ḓo shona. 39Zwino ndi mini muthu a tshi nga humbula uri ndi midzimu kana a i vhidza midzimu?
40Vhakhaladia na vhone vhaṋe vha nyadza midzimu iyo, ngauri musi vha tshi vhona muthu wa mbevhevhe, vha mu ṋekedza Bele, vha humbela mudzimu uri tshimuma tshi ambe, zwa nga Bele tshi na ṱhalukanyo. 41Nangwe zwo ralo, vhone vhaṋe a vha koni u zwi vhona vha ṱutshela midzimu iyo, ngauri a vha na ṱhalukanyo na ṱhukhu-ṱhukhu. 42Vhasadzi vhavho vha dzula magondoni vho ḓipomba nga dzithambo, vha tshi khou fhisa mufumbu vha tshi ita tshioro. 43Musi muṅwe wavho a tshi kungelwa thungo nga muṅwe wa vhafhiri vha nḓila a yo mu dzhenisa nḓuni, u kolela musadzi a re tsini nae nge a si nake unga ene, a si pfuṋululwe thambo yawe. 44Zwoṱhe zwi no itelwa midzimu iyo ndi mahandana. Zwino ndi mini muthu a tshi nga humbula uri ndi midzimu kana a i vhidza midzimu?
45Midzimu iyo yo itwa nga vhavhaḓi na vhafulamusuku, i tou vha zwenezwo zwine vhatsila avho vha funa i tshi vha zwone. 46Vhathu vho itaho midzimu iyo na vhone a vha lalami, 47zwino zwithu zwo itwaho nga vhone zwi nga vha midzimu hani? Vho siela vha vha tevhelaho vhufhura na u nyadziwa. 48Musi wa nndwa kana khombo, vhaphrista vhayo vha eletshedzana nga tshavho hune vha nga dzumbama na midzimu yavho. 49Zwino muthu a nga kundwa ngani u vhona uri izwo zwithu a si midzimu? Hufha i sa koni u ḓitshidza nndwani na khomboni! 50Vhunga yo itwa nga thanda yo fhomiwaho nga musuku na siliva, i ḓo fhedza nga u ḓivhea uri ndi i si ya ngoho. Zwi ḓo ḓivhea kha tshakha dzoṱhe na kha mahosi uri a si midzimu, i tou vha mushumo wa zwanḓa zwa muthu, a i koni u shuma na mushumo muthihi wa Mudzimu. 51Ndi nnyi a sa koni u zwi vhona uri a si midzimu?
52Midzimu iyo a i koni u vhumba khosi ya vhusa shango, a i koni u nisa mvula, 53a i koni u ḓishumela tshithu, a i koni u lamukisa o khakhelwaho. I nga mahunguvhu a re tshikhalani. 54Musi hu tshi phulea mulilo thembeleni ya midzimu iyo ya thanda yo fhomiwaho nga musuku kana siliva, vhaphrista vha shavha, vha ponyoka, yone iṋe i a swa ye lore ya nga phuphu. 55A i koni u imedzana na khosi kana mmbi ya maswina. 56Zwino i tshi pfi midzimu, ndi nnyi ane a nga zwi ṱanganedza? Ane a nga zwi tenda ndi nnyi?
57Midzimu iyo yo itwaho nga thanda ya fhomiwa nga musuku na siliva, a i koni u ḓitshidza kha mafobvu na mavemu. 58Ha ḓa munna wa nungo u a i ṱangula musuku na siliva, a ṱuwa na zwiambaro zwe ya vha yo ambara; yone a i koni u ḓiitela tshithu. 59Izwo ndi khwiṋe u vha khosi i re muhali nndwani, kana u vha mudzio wa nḓuni u no shumela muṋe wawo, u fhira u vha midzimu iyo i si ya ngoho; ndi khwiṋe na u vha vothi ḽa thanda nḓuni ḽi no tsireledza thundu, u fhira midzimu iyo i si ya ngoho.
60Ḓuvha na ṅwedzi na dziṋaledzi zwi a penya, zwi tshi ruṅwa uri zwi shume mushumo, zwi a thetshelesa. 61Zwi ḓi nga lupenyo, musi lu tshi penya, lu vhonala hoṱhe, muya na wone u vhudzula shangoni ḽiṅwe na ḽiṅwe. 62Makole na one musi Mudzimu o a laya uri a ṱanganye shango ḽoṱhe, a ita zwe a laiwa. 63Mulilo wo ruṅwaho u tshi bva ṱaḓulu uri u fhise dzithavha na maṱaka, u ita zwe wa laiwa. Hone midzimu iyo i si ya ngoho a i vhuyi ya vhambedzwa na izwo nga lunako kana maanḓa. 64Zwino hu songo vha na muthu ane a humbula uri ndi midzimu kana a i vhidza midzimu, hufha i sa koni u haṱula mulandu kana u itela muthu tshivhuya. 65Zwenezwo ḓivhani uri a si midzimu, ni songo i ofha.
66Midzimu iyo a i koni u teketela khosi kana ya i shudufhadza. 67A i sumbedzi dzitshakha zwiga zwa makoleni, a i penyi unga ḓuvha, kana ya vhonetshela unga ṅwedzi. 68I fhirwa na nga phukha, ngauri dzone dzi kona u shavha dza yo dzumbama. 69Zwino a hu na vhuṱanzi na vhuthihi ha uri ndi midzimu, zwenezwo ni songo i ofha. 70Midzimu iyo ya thanda yo fhomiwaho nga musuku na siliva i nga tshishushazwiṋoni tsimuni ya maranga, a i tsireledzi tshithu. 71I fana na tshiṱaka tsha mipfa tsimuni hune ha kavha tshiṋoni tshiṅwe na tshiṅwe, kana ya nga tshitumbu tsho poswaho nnḓa swiswini. 72Ni tshi vhona zwiambaro zwa muridili na lukhaha zwi tshi sinela mivhilini ya midzimu iyo, ni ḓo ḓivha uri a si midzimu, yone iṋe i ḓo fhedza nga u ḽiwa nga vhulali ya fhelela, dza tou vha ṱhoni shangoni. 73Zwino ndi khwiṋe u vha muthu muvhuya a si na zwitungulo; muthu o raloho ha nga vhuyi a shona!
