1Vhuṱali ndi mini?
Ndi bugu
ya milayo ya Mudzimu,
ndi wone mulayo
wo imaho wo khwaṱha lini na lini.
Vhoṱhe vhane vha vhu vhulunga vha ḓo tshila,
vhane vha vhu ṱutshela vha ḓo fa.
2Iwe Jakopo,
rembuluwa u tou vhu ndwa,
tshimbila u tshi vhonetshelwa ngaho wó livha tshedzani.
3Vhugala hau u songo vhu ṋea muṅwe,
u nangiwa hau u songo hu ṋea vhatsinda.
4Mashudu riṋe Vhaisraele,
ngauri zwi takadzaho Mudzimu ro zwi dzumbululelwa.
Zwililo zwa Jerusalema na zwe wa zwi lavhelela
5Vhathu vhanga,
ni songo ofha tshithu,
inwi Vhaisraele vhane vha kha ḓi humbulwa!
6No vha no rengiselwa dzitshakha,
hone zwi sa itelwi uri ni lozwiwe.
No sinyusa Mudzimu,
ndi zwe a ni kumedza maswina aṋu.
7No ṱunga Muvhumbi waṋu
nga u ṋekedza madimoni zwiṱhavhelo
na si zwi ṋekedze Mudzimu.
8No hangwa Mudzimu wa lini na lini we a ni alusa,
na ṱungufhadza Jerusalema we a ni lela.
9Vhukuma wone wo vhona mbiti
dza Mudzimu dzi tshi ni wela, wa ri,
“Inwi vhadzulelani vha Tsioni, ipfani!
Mudzimu o nnḓisela vhuṱungu vhuhulu.
10Ndo vhona vhana vhanga vha tshi thubwa
zwó itwa nga Mudzimu
wa lini na lini.
11Ndo vha lela nga dakalo,
hone vha tshi ṱuwa nda lila ndo ṱungufhala.
12Hu songo vha na ane a vhona
nṋe tshilikadzi ndo felwa nga vhanzhi,
zwa mu takadza;
ndo felwa nga mulandu wa vhuvhi ha vhana vhanga;
vho furalela Mulayo wa Mudzimu.
13A vho ngo londa ndayo dzawe,
a vho ngo tevhedza nḓila dza milayo ya Mudzimu,
a vho ngo kanda nḓilani dza ndayo
dze vha sumbedzwa nga vhuvhuya hawe.
14Vhadzulelani vha Tsioni nga vha ḓe,
vha elelwe u thubwa ha vhananga vha vhatuka na vhasidzana,
zwó itwa nga Mudzimu wa lini na lini.
15O vha rambela lushaka lwa kule,
lwa tshiṱuhu lu no amba luambo lusili,
lu sa londi vho no vhaho vha maḓuvha,
na vhana lu sa vha pfeli vhuṱungu.
16Vho hwala vhana vha funwaho
vha tshilikadzi vha ṱuwa navho,
a sala e eṱhe a si na ṅwananyana.
17Nṋe ndi nga ni farisa ngani?
18Onoyo we a ni wisela khombo idzo
ndi Ene a no ḓo ni lamulela zwanḓani zwa maswina.
19Tshimbilani zwaṋu vhananga,
tshimbilani zwavhuḓi,
nṋe ndo sala ndi ndoṱhe ndi si na ṅwana.
20Ndo bvula khanzu yanga ya mulalo,
nda ambara madzanganda a thabelo ya tshililo;
ndi ḓo lilela Mudzimu wa lini na lini misi yoṱhe ya vhutshilo hanga.
21“Ni songo ofha tshithu vhananga,
vhidzelelani Mudzimu;
Ene u ḓo ni lamulela zwanḓani zwa maswina a ni kandeledzaho.
22Ndo fulufhela Ene wa lini na lini uri a ni tshidze,
dakalo ḽo ḓa kha nṋe
ḽi tshi bva kha Ene Mukhethwa,
ngauri Mutshidzi waṋu,
Ene Mudzimu wa lini na lini,
u ḓo ṱuwa a tshi ri khathutshela.
23Ndo ni vhona ni tshi ṱuwa ndi tshi lila miṱodzi,
hone Mudzimu u ḓo ni vhuedzedza kha nṋe
ri tshi pembela ro takala lini na lini.
24Vhadzulelani vha Tsioni
vha ḓo ṱuwa vha tshi vhona Mudzimu a tshi ni lamulela
u ḓi nga vho zwi vhona ni tshi thubwa;
vha ḓo vhona a tshi ni lamulela
nga vhugala vhuhulu na lupenyo lwa Walininalini.
25“Vhananga, mbiti dzo ni welaho dzi tshi bva kha Mudzimu,
dzi konḓeleleni ni sa fheli mbilu.
Maswina aṋu o ni tovhola,
hone hu si kale ni ḓo vhona vha tshi lozwiwa
na vha kanda mitsinga.
26Vhananga vhane nda vha funa
vho tshimbila nḓilani dza dambulo,
vha hwalwa nga maswina avho
unga sambi ḽa nngu ḽi tshi khadiwa.
27Vhananga, ni songo tsha ofha,
tshaṋu vhidzelelani Mudzimu!
Ndi Ene we a ni ḓisela izwi;
u ḓo dovha a ni elelwa.
28A thi ri
no thoma u furalela Mudzimu ni tshi zwi funa inwi vhaṋe?
Zwino vusani nungo kafumi ni rembuluwe ni mu ṱoḓe.
29Ndi Ene we a ni ḓisela khombo idzo;
ndi Ene ane a ḓo dovha a ni tshidza
a ni ṋea dakalo ḽa lini na lini.
30“Iwe Jerusalema,
u songo tsha ofha tshithu!
Ene we a u rina dzina u ḓo u fhumudza.
31Vhoṱhe vhe vha u tambudza vha takalela u fhalala hau,
vha vho ḓo welwa nga khombo.
32Miḓini he vhana vhau vha vha vho itwa dziphuli
na vhoṱhe vhe vha vha renga
vha vho ḓo welwa nga khombo;
33muḓi uyo wo takalela u fhalala hau,
wa pembela iwe u tshi phusukanywa;
na wone u vho ḓo gomela
wone uṋe u tshi vho sala u soga.
34Muḓi uyo ndi ḓo u dzhiela magogo awo o takalaho,
lunyadzo lwawo lu ḓo shanduka tshililo.
35Mulilo u ḓo u wela u tshi bva kha Mudzimu wa lini na lini,
khawo hu ḓo dzula madimoni ha fhela miṅwaha.
36“Iwe Jerusalema, sedza vhubvaḓuvha!
Vhona dakalo ḽi no khou ḓa kha iwe ḽi tshi bva kha Mudzimu.
37Vhona, vhana vhau vhe wa vhona vha tshi ṱuwa
ngevha vha khou vhuya!
Vho kuvhanganywa vha tshi bva Vhubvaḓuvha na Vhukovhela
nga ipfi ḽa Ene Mukhethwa,
vha khou pembelela vhugala ha Mudzimu.”
