MISHUMO 5

₁Ha dovha ha vha na muṅwe munna a no pfi Ananiasi e na musadzi wawe a no pfi Safira. Vhenevho vha rengisa tsimu yavho, ₂Ananiasi a dzumba iṅwe tshelede musadzi wawe a tshi zwi ḓivha, yo salaho a i ṋea vhaapostola. ₃Pitrosi a mu vhudza a ri, “Ananiasi, nṋa no litshelani Saṱhane a tshi dzhena mbiluni yaṋu a ita uri ni zwifhele Muya Mukhethwa nga u dzumba iṅwe tshelede kha ye na i wana ni tshi rengisa tsimu? ₄Ni sa athu i rengisa yo vha i si tsimu yaṋu naa? Na musi no no i rengisa, iyo tshelede yo vha i si yaṋu na? Nṋa no vha no dzhenwa nga mini ni tshi vhuya na ita zwo raliho? Zwino-ha a no ngo zwifhela muthu no zwifhela Mudzimu!” ₅Ananiasi u pfa zwenezwo a mbo ḓi wela fhasi a fa. Vhoṱhe vhe vha zwi pfa vha farwa nga nyofho khulu. ₆Ha ḓa vhaṱhannga, vha putela tshitumbu tshawe vha ya vha tshi swiṱa.

₇Hó no fhela awara dzine dza nga swika tharu musadzi wawe a dzhena a sa ḓivhi zwe zwa itea. ₈Pitrosi a mu vhudzisa a ri, “Mmbudzeni! Nṋa tshelede ye inwi na munna waṋu na i wana nga tsimu yaṋu ndi yenei fhedzi?” Ene a fhindula a ri, “Ee, ndi yenei.”

₉Ndi hone Pitrosi a tshi mu vhudza a ri, “Nṋa ndi zwithu-ḓe ni tshi vhuya na tou langana na munna u linga Muya wa Muṋe washu? Na zwino ndi tshi khou amba vhaṱhannga vhe vha ya u swiṱa munna waṋu khevho afho muṋangoni, na inwi vha ḓo ni hwala!” ₁₀Kathihi fhedzi Safira a mbo ḓi wela fhasi henefho milenzheni ya Pitrosi a fa. Vhaṱhannga vha tshi dzhena vha wana o fa, vha mbo ḓi mu hwala vha ya vha mu swiṱa he vha swiṱa munna wawe. ₁₁Tshivhidzo tshoṱhe na vhoṱhe vhe vha zwi pfa vha farwa nga nyofho khulu.

₁₂Vhaapostola vho vha vha tshi ita maḓembe manzhi na mishumo i kanukisaho vhathuni. Tshivhidzo tshoṱhe tsho vha tshi tshi kuvhangana Lukumbini lwa Solomoni. ₁₃Hone a ho ngo vha na muthihi a si muṅwe ngavho we a ḓibaḓekanya navho; naho zwo ralo vha ḓi khoḓwa nga vhathu. ₁₄Vha ḓi anda vha tshi ya, nga vhanna na vhasadzi vhe vha ṱanganedza Muṋe washu; ₁₅ha vhuya ha swika he vhalwadze vha hwalelwa mikotoni vha vhewa kha mimbete na dzithovho uri Pitrosi a tshi fhira vhaṅwe vhavho vha tou welwa nga murunzi wawe zwawo. ₁₆Ha ḓa mavhuthu manzhi a tshi bva miḓini i re tsini ha Jerusalema vha tshi ḓisa vhalwadze vhavho na vha tambudzwaho nga thuṅwa dza Saṱhane, huno vhoṱhe vha fhodzwa.

₁₇Huno tshifhe muhulu na vhoṱhe vhe vha vha vhe nae vha tshigwada tsha Vhasadukei tsha henefho, vha dzhenwa nga vivho ḽihulu vha mbo ḓi langana vhaapostola. ₁₈Vha vha fara vha vha valela dzhele. ₁₉Hone vhusiku honoho muruṅwa wa Muṋe washu a vula mahothi a dzhele, a bvisela vhaapostola nnḓa a vha vhudza a ri, ₂₀“Iyani thembeleni ni funze vhathu zwoṱhe zwa vhutshilo hovhu vhuswa.” ₂₁Vhaapostola vho no pfa zwenezwo vha ita nga u ralo; ḽi tshi tsha vha ya thembeleni vha thoma u funza.

Tshifhe muhulu na vhathu vhe vha vha vhe nae vha ramba khoro ya vharangaphanḓa na vhahulwane vhoṱhe vha Israele, vha konou rumela vhaḓinḓa dzhele uri vhaapostola vha ḓiswe khoroni. ₂₂Vhaḓinḓa vhone vha tshi swika dzhele vha wana vhaapostola vha siho, vha vhuya na ḽa u ri, ₂₃“Ri tshi swika dzhele ro wana yo ḓi hoṋiwa yo tou ndwa, na vhalindi vho ḓi linda miṋango; hone ro ḓo ri ri tshi dzhena ra wana hu si na muthu!” ₂₄Mulangammbi wa maswole a u linda thembele na vhotshifhe vhahulwane vha tshi pfa zwenezwo vha kanuka vha ri, “Izwi zwithu zwi ḓo guma ngani?” ₂₅Ndi hone muṅwe munna a tshi ḓa a amba navho a ri, “Edzonu vhona-ha! Vhaḽa vhanna vhe na vha hoṋela dzhele khevhaḽaa thembeleni vha khou funza vhathu!” ₂₆Ndi hone mulangammbi na vhanna vhawe vha tshi ya vha dzhia vhaapostola; hone vha sa tou zwi ita nga khani, ngauri vho vha vha tshi ofha uri vhathu vha nga vha kanḓa nga matombo.

₂₇Vha dzhenisa vhaapostola vha vha imisa phanḓa ha khoro. Tshifhe muhulu a konou vha sengisa a ri, ₂₈“Hufha ro ni laya ro tou khwaṱhisa ra ri ni songo tsha vhuya na dovha na funza nga uyo muthu; zwino edzonu vhona, no no hashekanya pfunzo yaṋu hoṱhe-hoṱhe Jerusalema! Ni ṱoḓa u ri hwesa mulandu wa malofha a hoyo muthu!”

₂₉Pitrosi na vhaḽa vhaṅwe vhaapostola vha fhindula vha ri, “Riṋe tshashu ndi u pfa Mudzimu u fhira u pfa muthu. ₃₀Mudzimu wa vhomakhulukuku washu o vusa Yesu vhafuni, musi inwi no mu vhulaha nga u mu vhamba kha danda. ₃₁Mudzimu o mu vusa a mu vhea thungo ya tshauḽa tshawe uri vha vhuse vhoṱhe, e Murangaphanḓa na Mutshidzi, uri vhathu vha Israele vha rembuluwe vha hangwelwe. ₃₂Riṋe ri ṱhanzi dza hezwi zwithu khathihi na Muya Mukhethwa we Mudzimu a mu ruma kha vhane vha mu thetshelesa.”

₃₃Vhanna vha khoro vha tshi pfa vha tshi ralo vha tou halifha, vha ri vhaapostola kha vha vhulawe. ₃₄Hone muṅwe wavho wa Mufarisei a no pfi Gamaliele we a vha e muḓivhi wa Mulayo a huliswaho nga vhathu vhoṱhe a takuwa henefho khoroni a ri vhaapostola vha vhe vho bviselwa nnḓa, ₃₅a konou amba na khoro a ri, “Inwi vhanna vha Israele, ḓihumbuleni kha zwine na ṱoḓa u ita havha vhanna. ₃₆Zwiḽa tshiḽa tshifhinga a ho ngo ḓa Theudasi a ḓiita ene-ene a tevhelwa nga vhathu vhane vha nga swika 400? Hone o ḓo vhulawa, vhathu vhawe vha balangana naḽo ha vha u guma hazwo. ₃₇Ngavhuya nga tshiḽa tshifhinga tsha u vhalwa ha vhathu, ha bvelela Judasi wa Galelia, na ene a ḓi tevhelwa nga vhathu vha re na tshivhalo, hone a ḓi fhedza nga u vhulawa, tshigwada tshawe tshoṱhe tsha balangana. ₃₈Na henefha zwi nga ḓi ralo. Nṋe ndi tshi ni vhudza, ndi ri havha vhanna vha litsheni. Inwi sokonu vha lavhelesa ngauri arali zwine vha ita i mihumbulo ya muthu zwi ḓo pfuvha; ₃₉hone arali zwi tshi bva kha Mudzimu ni nga si vha kone. Ni ḓo tshenuwa ni tshi vho lwa na Mudzimu.” Nyeletshedzo iyo ya Gamaliele khoro ya i ṱanganedza. ₄₀Ndi hone vha tshi vhidza vhaapostola, vha vha rwa vha vha vhudza uri vha songo tsha amba nga Yesu, vha ralo vha konou vha vhofholola. ₄₁Vhaapostola vha ṱuwa khoroni vho tou takala nge Mudzimu a vhuya a vhona vho fanelwa-vho nga u rwelwa Yesu. ₄₂Vha ḓi dzula vha tshi funza na u ḓivhadza mafhungo maḓifha a uri Mesia ndi Yesu, vha tshi funza thembeleni na miḓini ya vhathu misi yoṱhe.