MISHUMO 21

₁Ra onesana navho ra ṱuwa; ra buḓekanya nga tshikepe ra swika Khoso. Nga matshelo ra swika Rodosi, u bva afho ra fhirela Phathara. ₂Henefho ra wana tshikepe tshi no ya Finikia, ra mbo ḓi namela ra ṱuwa. ₃Ri tshi vho tou ri Kipirosi khefhaḽaa, ra hu sia thungo ya devhula, ha vha u fhirela Siria. Ri tshi swika Tiro tshikepe tsha rula muhwalo watsho, ra tsa. ₄Henefho ra wana vhaṅwe vhafunziwa, ra fhedza vhege ri tshi dzula navho. Vhone vha vhudza Paulo vho sevhiwa nga Muya Mukhethwa uri a si fhirele Jerusalema. ₅Ho ḓo ri tshifhinga tshi tshi swika ra dovha ra dzhena nḓilani. Ri tshi ṱuwa afho muḓini vhoṱhe vha ri bvisa, vhó tou bva na vhasadzi na vhana. Khunzikhunzini ya lwanzhe ra gwadama muṱavhani ra rabela. ₆Ra konou onesana navho, vhone vha tshi khou humela mahayani riṋe ra vha ri tshi namela tshikepe.

₇U bva Tiro ra tshimbila nga tshikepe ra swika Tholemai. Henefho ra reshana na vhaṅwe Vhakhriste nga riṋe, ra ṱwa navho ḓuvha ḽithihi. ₈Nga matshelo ra takuwa ra ya ra dzhena Khisaria. Henefho ra swikela muṱani wa muevangeli Filipi ra dzula henefho. Filipi onoyo o vha e muṅwe wa vhaḽa vhaṱanu na vhavhili vhe vha nangiwa Jerusalema. ₉O vha e na vhana vhawe vhaṋa vha vhasidzana vhe vha vha vhe na mpho ya vhuporofita. ₁₀Ho ḓo ri ro no ita maḓuvha ri henefho, ha swika muṅwe muporofita a no pfi Agabosi a tshi bva Judia. ₁₁A ḓa kha riṋe a dzhia bannda ya Paulo a ḓivhofha milenzhe na zwanḓa ngayo, a ri, “Muya Mukhethwa u ri, ‘Muṋe wa bannda hei u ḓo vhoxwa sa zwenezwi nga Majuda Jerusalema, vha mu kumedza vhannḓa.’ ” ₁₂U pfa zwenezwo riṋe na vhathu vha henefho ra kwengweledza Paulo uri a si fhirele Jerusalema.

₁₃Ene a fhindula a ri, “Ni itani? Ni lilelani? Ni mpfiselani vhuṱungu? A vha nṋe a tho ngo ḓiimisela u vhoxwa fhedzi, ndo ḓilugisela na u vhulahelwa dzina ḽa Yesu Muṋe washu.” ₁₄Ri tshi vhona a sa tendi zwine ra amba ra vho sokou mu litsha ra ri, “Nga hu itwe zwine Muṋe washu a funa.”

₁₅Ho ḓo ri tshifhinga tshi tshi swika ra goda zwithu zwashu ra livha Jerusalema. ₁₆Vhaṅwe vhafunziwa vha Khisaria vha ṱuwa na riṋe vha ri isa muṱani wa muṅwe munna a bvaho Kipirosi a no pfi Munasoni, we ra vha ri tshi khou ya u dzula nae. Munasoni onoyo o vha a tshi ḓi vha mufunziwa u bva mathomoni.

₁₇Ri tshi swika Jerusalema Vhakhriste vha ri ṱanganedza nga dakalo. ₁₈Nga matshelo Paulo a ṱuwa na riṋe ra yo vhona Jakopo, ra wana na vhalisa vhoṱhe vha tshivhidzo vhe nae. ₁₉Paulo a vha resha a konou vha toololela zwoṱhe zwe Mudzimu a zwi shuma ngae kha vhannḓa. ₂₀Vhone vha tshi pfa mafhungo eneo vha renda Mudzimu. Vha vhudza Paulo vha ri, “Wa hashu, vha khou vhona uri ho no vha na vhatendi vha Majuda vha no vhalwa nga zwigidi, vha ro sa funa u kwatuwa kha Mulayo wa Mushe. ₂₁Zwino vho pfa vhuṱanzi ha uri inwi ni enda ni tshi funza Majuda vha dzulaho mashangoni a vhannḓa uri vha ṱutshele Mulayo wa Mushe na uri vha songo tsha fumbisa vhana vhavho kana u tevhedza maitele a Tshijuda. ₂₂Zwino a ri ḓivhi uri ri nga tou zwi ita hani; ngauri zwauri ni fhano vha ḓo zwi pfa; a hu na na nga iṅwe nḓila. ₂₃Inwi itani nga hune ra ni vhudza. Hu na vhanna vhaṋa hafha vho anelaho Mudzimu muano. ₂₄Ṱuwani navho ni ḓibaḓekanye navho kha vhuṱambo ha u kumululwa, ni vha bvisele tshelede yoṱhe uri vha kone u vheulwa ṱhoho. Ndi hone muṅwe na muṅwe a tshi ḓo ḓivha uri zwine na ambelwa zwone ndi mazwifhi fhedzi, inwi ni tshila nga u tevhedza Mulayo. ₂₅Arali vhe vhaḽa vhannḓa vho vhaho vhatendi, tenda ro no ḓi vha ṅwalela luṅwalo, ra vha vhudza uri ro vhofha ḽa uri vha si ḽe ṋama yo sumelwaho midzimu ya zwifanyiso, kana malofha kana phukha ye ya fa nga u tou tshipiwa, na uri vha sendele kule na vhuṱudzi ha u dzekana nga tsha muṱa.” ₂₆Ndi hone Paulo a tshi dzhia vhaḽa vhanna, nga matshelo a dzhena navho vhuṱamboni ha u ḓikumulula; a ya thembeleni a ḓivhadza ḓuvha ḽine vhuṱambo ha ḓo fhela ngaḽo – ḽone ḽine muṅwe na muṅwe wavho a ḓo ṋekedzelwa nduvho dzawe ngaḽo.

₂₇Ayo maḓuvha maṱanu na mavhili a tshi vho ṱoḓou fhela vhaṅwe Majuda vha bvaho vunduni ḽa Asia vha vhona Paulo thembeleni. Vha fhiriṱanya gogo ḽoṱhe vha fara Paulo. ₂₈Vha zhamba vha ri, “Hee vhanna vha Israele, na ri phalalaa! Uḽa munna a no tshimbila hoṱhe-hoṱhe a tshi funza vhathu vhoṱhe u shandukela lushaka lwa Israele na Mulayo wa Mushe na thembele, khoyu. Zwino o no sokou sia o ḓodza afha fhethu hukhethwa tshika nga u sokou hwala vhannḓa a tshi vha ḓisa thembeleni!” ₂₉(Vha tshi ralo ndi uri vho vha vho vhona Paulo e na Throfimosi wa Efesa afho muḓini, zwino vha vho sokou humbulela uri na thembeleni o ḓi dzhena nae.) ₃₀Ha vuwa vilinga muḓini woṱhe, vhathu vha ḓa nga u gidima vha tshi bva thungo dzoṱhe, vha mu khwikhwidzela nnḓa, kathihi fhedzi mahothi a thembele a valwa. ₃₁Gogo ḽi tshi kha ḓi ri ḽi a mu vhulaha, fhungo ḽa vha ḽo no swika kha mulangammbi wa Muroma uri zwi re Jerusalema a si zwiṱuku. ₃₂Mulangammbi u pfa zwenezwo a mbo ḓi dzhia vhalangagomane na maswole, vha tsela hu na gogo nga u gidima. Vhathu vha tshi vhona mulangammbi na maswole awe vha mbo ḓi litsha u rwa Paulo. ₃₃Mulangammbi a sendela a fara Paulo a ri a vhoxwe nga tshaini mbili. Ndi hone a tshi vhudzisa a ri, “Nṋa uyu muthu ndi nnyi? O tshinyani?” ₃₄Muṅwe a sokou zhamba tshino, muṅwe a zhamba tshiḽa, dzheme-dzheme ḽa hula lwe mulangammbi a si kone na u pfa zwavhuḓi uri hu nga vha ho tshinyalani. Ndi hone a tshi vho sokou ri Paulo a iswe gammbani ya maswole. ₃₅Vha tshi swika nae zwiṱepisini vha vhuya vha tou mu hwala, ngauri gogo ho vha hu hone ḽo vuwa tshoṱhe. ₃₆Vhoṱhe vha vho mu sala murahu vha tshi khou zhamba vha tshi ri, “Kha a fe!”

₃₇Vha tshi vho ṱoḓou dzhena gammbani ya maswole Paulo a amba na mulangammbi a ri, “Ndi nga amba navho naa?” Mulangammbi a mu fhindula a ri, “Mathina ni amba Tshigiriki? ₃₈Zwi amba uri a si inwi uḽa munna wa Muegipita we tshiḽa tshifhinga a vusa mufhirifhiri o ranga phanḓa mmbi ya matherorisi a 4 000 o fara zwihali o livha sogani?” ₃₉Paulo a fhindula a ri, “Nṋe ndi Mujuda o bebwaho Tharasisi, shangoni ḽa Kilikia; ndi mudzulapo wa muḓi u ḓivheaho. Zwino ndi khou humbela uri ndi tendelwe zwanga u amba na gogo heḽi.” ₄₀Mulangammbi a mu tendela. Paulo a ima nṱha ha zwiṱepisi a fhumudza vhathu nga tshanḓa. Vha tshi tou ṅo a thoma u amba navho nga Tshiheberu a ri,