Ndifhedzo na lufu lwa Anthiokhosi
1Misi yeneyo Anthiokhosi a huma zwo no vhifha a tshi bva dzinguni ḽa Pheresia. 2O vha o dzhena muḓini wa Pheresepholisi, a linga u dzhia thundu dza thembele nga vhuvemu na u langa muḓi uyo, vhadzulapo vhaho vha mbo ḓi mu vutshela vhó fara zwihali vha ḓilwela, vha mu kunda, vha fhedza nga u mu shakulisa a huma o shona. 3Musi Anthiokhosi a tshi swika Ekhibathana, a pfa zwe Nikanoro na mmbi ya Timoti vha ṱangana nazwo, 4a mbo ḓi sinyuwa lwe a dzhenwa nga muhumbulo wa u vhaisa Majuda a tshi lifhedzela khombo ye ya mu wela Pheresepholisi; ndi zwe a vhudza mutshimbidzi wa gariki yawe uri a gidime a sa imi a vhuya a swika Jerusalema.
Mathina khaṱhulo ya Waṱaḓulu yo vha i nae henefho garikini. Ndi uri o vha o ḓihudza a ri, “Jerusalema ndi ḓo hu ita tshalo tshihulu tsha Majuda zwenezwo ndi tshi swika hone!” 5Hone Muṋe washu Muvhonazwoṱhe Mudzimu wa Israele o mu rwa nga dwadze ḽi sa vhonali hone ḽi sa lafhei. Zwenezwo a tshi tou fhedza u bula maipfi ayo, a mbo ḓi ṱhavhea dangani zwa si tsha ima, a pfa a tshi tshewa thumbuni, 6ya vha yone ṱhamu yo mu fanelaho, ene we a runga mala a vhaṅwe nga nḓila nnzhi dza tshiṱuhu. 7Nangwe zwo ralo a si vhuye a litsha zwa u ḓihudza, a ḓi phapha mbulu kha iṅwe a zhambela Majuda o sinyuwa, a ri gariki i gidimese. Ndi zwe a wela fhasi gariki i tshi khou gidima, a huvhalesa muvhili woṱhe nga u wa uho. 8Huno muthu onoyo we a vha a tshi ḓihudza a tshi vhona unga u fhira vhoṱhe, na u ḓifhima uri a nga langa magabelo a lwanzhe, a nga kala dzithavha nga zwikalo zwawe, zwino o rambaladzwa fhasi, o vho tou hwalwa nga hingo, vhathu vhoṱhe vha kona u vhona maanḓa u Mudzimu nga zwe zwa mu wela. 9Muvhili wa munna uyo muvhi wa phapha zwivhungu, ṋama yawe ya sina a tshi kha ḓi tshila a tshi khou tambula nga vhuṱungu, mmbi yoṱhe ya nengiswa nga u nukha hawe. 10O vha a tshi kha ḓi bva u ḓifhima uri a nga kona u swika kha ṋaledzi dza lutomboni, hone zwino ho vha hu si tshee na ane a nga koṋdelela u mu hwala nge a vha a tshi nukha lu sa konḓelelei.
11Hone musi muya wawe wo no pwashekana, a thoma u litsha u ḓihudza hawe hu kalulaho, a thoma u ṱalukanya ngoho musi Mudzimu a tshi khou mu rwa, ngauri vhuṱungu he a vha a tshi khou vhu pfa ho vha vhu sa imi. 12O vha a si tsha kona u konḓelela u nukha hawe, lwe a ṱavha mukosi a ri, “Muthu a faho u fanela u luvha Mudzimu, a songo ḓifhima uri a nga mu vhangisa a eḓana nae!” 13Naho o vha a si tsha ḓo khathutshelwa nga Mudzimu a fhola, munna uyo muvhi a mbo ḓi mu anela muano 14a ri u ḓo vhofholola Jerusalema wa pfi muḓi wo vhofhololwaho vhoṱhe vha tshi zwi pfa, muḓi wonoyo we a vha a tshi khou gidimela u u phusukanya uri u sale u zwalo fhedzi, 15Majuda vhe a vha a tshi vhona vha songo vhuya vha fanela na u swiṱwa, a ri u ḓo tou vha posa nnḓa na vhana vhavho vha ḽiwa nga maanga na zwivhanda, Majuda vhenevho a vho ri vhoṱhe u ḓo ita uri vha eḓane na vhadzulapo vha Athene; thembele khethwa ye a ranga u i ṱangula, 16thembele yeneyo a vho ri u ḓo i ṱama nga nduvho dzavhuḓisa, midzio yoṱhe mikhethwa ye a dzhia u ḓo vhumba i no fhira yone a i vhuedzedza. A ri u ḓo bvisa mutengo wa zwiṱhavhelo nga mali i bvaho kha mbuelo dzawe. 17A dovha a ḓadzisa a ri na ene muṋe u ḓo shanduka a vha Mujuda, a dala fhethu hoṱhe hu dzulaho vhathu a ḓivhadza maanḓa a Mudzimu henefho. 18Hone vhunga ṱhamu ya Mudzimu yo mu wela zwo fanela, vhuṱungu hawe vhu si fhungudzee. Zwenezwo a ṅwalela Majuda luṅwalo ulu lwa u farelwa lufhanga, a ri:
19Ndi nṋe Anthiokhosi, khosi yaṋu na mulangammbi waṋu, ndi ṅwalela Majuda, vhadzulapo vha huliseaho. Ndi a vha resha nga mbilu yoṱhe, ndi ri ngavhe vha tshi vha na mutakalo na mvelaphanḓa.
20Ngavhe inwi na vhana vhaṋu ni tshi dzula no takala, zwoṱhe zwa ni nakela nga hune na zwi tama. Ndi vho fulufhela zwa ḽiṱaḓulu, 21ndi humbula nga lufuno zwa misi iḽa ni tshi kha ḓi nkhulisa na u ntakalela. Musi ndi tshi vhuya ndi tshi bva mashangoni a Pheresia, ndo farwa nga vhulwadze vhu ntambudzaho. Zwenezwo nda vhona zwo fanela u sia ndo dzudzanya uri vhoṱhe zwi vha nakele. 22Vhukuma, na u lwala hánga a thi ṱovhowi, vhunga ndi na fulufhelo ḽihulu ḽa uri ndi ḓo fhola. 23Hone ndi a ḓivha uri khotsi anga misi yoṱhe vha tshi bva pfumo ḽa u wela Yufuratha, vho bva vhó sumba ane a ḓo vha khosi musi mativha a tshi xa, 24vha tshi itela uri arali ha sokou tshenuwa ho itea zwe zwa si lavhelelwe kana ha pfala phungo ya zwi sa takadzi, vhathu vha muvhuso woṱhe vha dzule vho ḓivhadzwa uri muvhuso wo ṋewa nnyi, uri vha si dinalee. 25Nahone ndi a ḓivha uri vhavhusi vhe mashango avho a ṋekena masakha na ḽashu, vho dzula vho sedza tshifhinga, vho lindela u vhona uri hu nga iteani. Zwenezwo ndo sumba murwa wanga Anthiokhosi uri a vhe khosi. Ene ndo ḓi anzela u mu kumedza inwi uri ni mu lele misi ye nda dalela mashango a seli ha Yufuratha, nda dovha nda ni eletshedza uri ni mu ṱanganedze. Ndo mu ṅwalela luṅwalo; ndi khou longa khophi yalwo afha kha lwaṋu. 26Zwino ndi khou humbela na u ṱuṱuwedza muṅwe na muṅwe waṋu uri ni ḓi dzula ni tshi ntakalela na murwa wanga unga kale, ni sa hangwi zwe nda ni tonda sa lushaka, nda dovha nda tonda na muṅwe na muṅwe waṋu nga muthihi nga muthihi. 27Ndi a fulufhela uri ene u ḓo kanda ṋayoni dzanga a ḓi ni itela vhuthu na vhulenda a tshi vhusa nga hune na funa ngaho.
28Zwino muvhulahi na munyefuli uyo a pfesa vhuṱungu vhu no nga he a pfisa vhaṅwe, a fa a tshi vhavha dzithavhani dza shango ḽisili. 29Filipi, khonani yawe khulu, a orosa tshitumbu tshawe hayani, hone nga u ofha murwa wa Anthiokhosi a pfulutshela Egipita ha Tholemiosi Filomethoro.
