Hu tshi lwiwa na Nikanoro, mulangammbi wa Dimitriosi wa u thoma
Vhufheṱi ha Alikhimosi
1Ngavhuya ho no fhela miṅwaha miraru, Judasi na vhahali vhawe vha pfa upfi Dimitriosi murwa wa Selukhosi o tala nga zwikepe a dzhena vhuimazwikepe ha Thripholisi e na mmbi ya maanḓa na zwikepe, 2na uri o vhulaha Anthiokhosi na Lisiasi we a mu alusa, a thuba shango iḽo.
3Ha vha na munna muṅwe a no pfi Alikhimosi, we a vhuya a vha muphrista muhulwane, hone a vho ḓikumadza nga khole misi ya u vutshelana. 4Ene a zwi vhona uri a hu tshee na nḓila ine a nga ḓivhuedzedza vhuimoni hawe a shumela aḽiṱari khethwa. Ndi hone a tshi ya ha khosi Dimitriosi nga ṅwaha wa ḓana na mahumi maṱanu na muthihi (151), a mu ṋea khare ya musuku na davhi ḽa mutshevho, khathihi na matavhi a muolivi e a vha a tshi ḓi ṋewa vhahulisea a tshi bva thembeleni. O no ralo a fhumula a si tsha amba tshithu.
5Hone o ḓo wana tshifhinga tsha u tshimbidza vhukwila hawe ha vhuḓabaḓaba, musi a tshi vhidzwa nga Dimitriosi u vha hone khoroni, a ita na u vhudziswa nga nzulele na mihumbulo ya Majuda. Alikhimosi a fhindula a ri, 6“Majuda avhaḽa vhane vha pfi Vhahasidia, vho rangwaho phanḓa nga Makhabiosi, vha vusa muvhango, vha funesa nndwa, vha ita uri shango ḽi si dzike. 7Ndi zwine zwino nṋe nda kundiswa u wana vhugala ho mpfanelaho he nda vhu wana kha vhomakhulukuku wanga – ndi amba vhuphrista vhuhulwane. Zwino ndó ḓa fhano ndo ḓela zwithu zwivhili: 8Tsha u thoma, ndi tama zwi tshi nakela khosi. Tsha vhuvhili, ndi vhilaela nga vhadzulapo vha hashu. Vhukuma vhuhwarahwara ha vhathu avho vhane nda kha ḓi bva u vha bula a ho ngo vhaisa zwone lushaka lwa hashu lwoṱhe. 9Thovhele, musi vho no ḓivha mafhungo ayo nga vhuḓalo, nga vha ite uri zwi nakele shango ḽashu na vhathu vhaḽo vhane vha khou kandeledzwa, vha vha itele vhuthu na vhulenda vhune vha ḓi vhu itela vhathu vhoṱhe. 10Vhukuma shango ḽi nga si lale Judasi a tshi kha ḓi tshila!”
11Musi o no amba izwo, Khonani dziṅwe dza khosi dzine dza vhenga Judasi dza mbo ḓi sala dzi tshi ṱuṱuwedza khosi uri a sinyuwe tshoṱhe. 12Khosi ya mbo ḓi nanga Nikanoro, we a vha e mulangi wa dzinḓou, ya mu vhea uri a vhe muvhusi wa Judia. Ya mu ruma 13yó mu vhudza uri a vhulahe Judasi, a balanganye vhahali vhawe, a vhee Alikhimosi a vhe muphrista muhulwane wa thembele iyo i no fhira dzoṱhe. 14Vhannḓa vha re Judia vhe vha vha vho shakuliswa nga Judasi vha ḓa nga vhunzhi vha ḓibaḓekanya na Nikanoro, vha tshi ri khombo na u tambudzwa ha Majuda zwi ḓo vha ḓisela zwivhuya.
Nikanoro a tshi ita pfano na Judasi
15Musi Majuda vha tshi pfa uri Nikanoro u khou ḓa, na uri vhannḓa vha khou ḓilugisela u vha dia, vha ḓihasha nga mavu, vha rabela Ene we a vhea vhathu vhawe uri vha vhe hone lini na lini, ngauri ha athu litsha na luthihi u farisa vhathu vhawe vhukuma nga u sumbedza vhugala hawe. 16Judasi a vha vhudza uri vha mu tevhele, vha mbo ḓi bva nae vha yo ṱanganedzana na maswina avho muḓanani wa Adasa. 17Simoni mukomana wa Judasi a imedzana na Nikanoro, hone a tsetsemiselwa murahu zwiṱuku nge maswina a ṱavhanya u bvelela. 18Naho zwo ralo, Nikanoro o vha o pfa zwa vhuhali ha Judasi na vhahali vhawe, na uri vha ḓi lwela shango ḽa havho vha sa ofhi vha sa humi. Ndi zwe a si tsha ṱoḓa mafhungo a u shulula malofha. 19Zwino a ruma Phosidoniosi na Theodothosi na Mathathiasi u yo dzudzanya pfano na Majuda. 20Judasi a sedzesa mafhungo a ndangano e Nikanoro a mu eletshedza, a a ḓivhisa vhahali vhawe, a pfa uri vhoṱhe vha anḓana nayo, vha i ṱanganedza. 21Ha vhewa ḓuvha ḽine vharangaphanḓa vha ḓo ṱangana nga tshavho. Ho ḓa gariki i tshi bva siani ḽiṅwe na ḽiṅwe, ha vhewa zwidzulo. 22Judasi, nga u ofha uri maswina a nga ita vhumbulu zwi songo lavhelelwa, o vha o no ḓi vhea vhahali vhawe vhaṅwe fhethu ho fhambanaho hune maswina a si kone u sokou hu tshoṱhela, vha ima vhó fara zwihali zwavho. Hone nyambedzano dzo tshimbila zwavhuḓi. 23Nikanoro o sala Jerusalema a si vhuye a ita tshithu tsho bvaho nḓilani. O ita na u balanganya magogo a vhannḓa vhe vha ḓibaḓekanya nae, 24a ḓi dzula na Judasi, 25a mu takalela vhukuma, a mu ṱuṱuwedza uri a dzee musadzi a vhe na vhana, Judasi a tenda, a dzea, a vho tshila ó dzika.
Alikimosi a tshi luṱanya khosi na Judasi
26Musi Alikimosi a tshi vhona vhukonani ha Nikanoro na Judasi, a dzhia khophi ya ndangano yavho a i isa ha Dimitriosi, a ri Nikanoro u khou fheṱa muvhuso, na uri u khou humbula uri Judasi a re swina ḽa muvhuso wa Magiriki a vhe ene a tevhelaho u dzhena kha tshigwada tsha Khonani dza khosi musi hu tshi dovha ha ṱoḓea muṅwe. 27Khosi i tshi pfa mazwifhi a mutho uyo muvhi ya sinyuwa tshoṱhe, ya ṅwalela Nikanoro ya ri ndangano iyo a i takadzi, a ri u fanela u mbo ḓi fara Makhabiosi a mu rumele Antiokia o vhoxwa nga dzigeḓane.
28Musi mafhungo ayo a tshi swika ha Nikanoro a pfa o dinalea, ngauri o vha a tshi vhenga u bva kha ndangano ye a langana na munna a songo tshinyaho tshithu. 29Nangwe zwo ralo, ho vha hu si na nḓila ya u hanedza khosi, ndi zwe a thoma u sedza tshifhinga tsha u ita zwe ya mu vhudza, a luka vhunwa ha a u zwi ita. 30Hone Makhabiosi a zwi vhona uri Nikanoro u vho mu shandukela, ha tsha mu fara zwavhuḓi, ha tsha amba nae zwavhuḓi, a zwi vhona uri u hambiwa nga u ralo a zwi ṱuli zwivhuya. Ndi hone a tshi kuvhanganya vhahali vhawe vha na tshivhalo, a yo mu dzumbama.
31Musi Nikanoro a tshi zwi vhona uri Judasi o mu thanyela, a ya thembeleni i fhiraho dzoṱhe nga vhuhulu na vhukhethwa, a wana vhaphrista vha tshi khou ṋekedza zwiṱhavhelo zwa nga maḓuvha, a ri vha ḓise Judasi. 32Vhone vha ana vha ri a vha ḓivhi hune a vha hone. 33Zwenezwo ene a imisa tshanḓa tshawe tshauḽa tshó sumba thembele a ana a ri, “Arali na sa vhofha Judasi na mu ṋekedza nṋe, ndi ḓo wisa fhethu hafhano hu luvhiwaho Mudzimu he huru fhasi. Ndi ḓo thutha aḽiṱari, nda fhaṱa thembele ya madzanga henefha ya Dionisiosi.” 34O no ralo a ṱuwa, vhaphrista vha imisa zwanḓa zwavho vho zwi livhisa ḽiṱaḓulu, vha tshi khou rabela Mulamuleli wa lushaka lwa hashu, vha ri,
35“Muṋe wa zwoṱhe, Iwe a u lili tshithu. Naho zwo ralo, wo takalela uri hu vhe na thembele hune wa dzula hone vhukati hashu. 36Zwino, Iwe Mukhethwa, Muṋe wa vhukhethwa hoṱhe, tsireledza nnḓu iyi i si kumadzwe lini na lini; hufha i tshi kha ḓi bva u kumululwa.”
Lufu lwa Razisi
37Ho vha hu na munna muṅwe a no pfi Razisi, muṅwe wa vhahulwane vha Jerusalema. O vha a tshi ḓivhea a tshi funa lushaka lwa hawe, a tshi huliswa nga lushaka lwoṱhe, a tshi pfi “Khotsi a Majuda” nga vhuthu hawe vhuhulu. Muthu uyo a pomokwa ha Nikanoro a pfi u na muvhango. 38Nazwino musi muvhango u tshi thoma o vha o vhonwa mulandu a pfi u khou lwela Vhujuda nga mbiti khulu, a sa ofhi na u vhulahelwa Vhujuda hawe. 39Nikanoro a ri u ḓo sumbedza uri ha anḓani na Majuda, a ruma vhanna vha no fhira maḓana maṱanu (500) u yo mu fara. 40O vhona uri u fara munna o raloho hu ḓo vha u vhaisa Majuda. 41Musi vhahali vha tshi vho ṱoḓou thuba thawara ye Razisi a vha e khayo, a tshi vhona uri vha khou pwasha gethe ya nga nnḓa, vha tshi khou ri hu ḓiswe mulilo wa u fhisa vothi, Razisi a vhona uri o tangwa masia oṱhe, a ḓirunga nga banga ḽawe, 42a tshi vhona zwi khwiṋe u fa á songo nyadzea, u fhira u wela zwanḓani zwa vhanna vha nengisaho, a tambudzwa nga nḓila i songo fanelaho mbebelwe yawe sa muḓivhalea. 43Hone nge nndwa ya vha yo no vha tswuku a kundwa u ḓirunga a livhanyisa. Zwino musi maswina a tshi khou gidima a tshi dzhena nga mahothi, a mbo ḓi gonya zwiṱepisi nga luvhilo, a ḓifunga sa munna a ḓiposa fhasi a wela vhukati ha maswina. 44Hone vha humela murahu nge vha vha vho no mu vhona uri u khou ḓiposa khavho, a mbo ḓi wela fhasi hu si na muthu. 45O vha a tshi kha ḓi fema, o tou funga nga mbiti, a vuwa a gidima vhukati ha gogo, malofha a tshi khou gubunyea a tshi bva kha mbonzhe dzawe dzi ofhisaho. 46Zwino a ima kha tombo ḽi re nṱha, malofha awe a tshi khou ḓi fhelela a tshi ya, a ḓinzwunzwumula mala a a posa kha gogo nga zwanḓa zwawe zwivhili, a tshi khou vhidzelela Muṋe washu Muṋe wa vhutshilo na muya uri a dovhe a mu ṋee one. A fhedza a fa nga nḓila yeneyo.
