2 VHAKORINTA 9

₁Nga zwiḽa zwa u tonda vhathu vha Mudzimu, nṋe ndi vhona zwi sa vhuyi zwa ṱoḓea uri ndi ni ṅwalele ngazwo. ₂Hufha ndi tshi zwi ḓivha uri ni a tama u vha farisa. Ndo no ita na u ni khoḓa kha vha Makedonia nda ri, “Vhaḽa vha Akhaya tsha ṅwahoḽa vho dzula vho ḓilugisa,” u ḓiṋekedza haṋu honoho ha mbo ḓi ṱuṱuwedza vhunzhi havho. ₃Zwino asizwo-ha ndi khou ruma havha vharathu uri zwi vhonale uri a ro ngo sokou ni khoḓa lwa fhedzi kha haya mafhungo. Ndi itela uri ni dzule no ḓilugisa unga ndo no ḓi vhudza vhaḽa. ₄Zwino-ha arali nda ḓa na vhathu vha Makedonia ra wana ni songo ḓilugisa ri nga shona hani ngoho – ri sa tsha amba inwi vhaṋe, ngauri ri ḓo vha ro fulufhela inwi. ₅Zwenezwo ndo vhona zwo tea u ṱuṱuwedza havha vharathu u nthanga phanḓa uri vha vhe vha tshi vhekanya tshifhiwa tshiḽa tshe na fulufhedzisa, uri ndi tshi swika ndi wane yo luga, yo bviswa nga mbilu tshena, hu si nga u kombetshedzwa.

₆Ḓivhani-ha uri ane a tshi zwala a tshivha mbeu, khaṋo na yone i ḓo vha ṱhukhu; hone ane a tshi zwala mbeu a si i tshivhe, khaṋo na yone i ḓo vha khulu. ₇Muṅwe na muṅwe nga a bvise nga he a elekanya mbiluni yawe, a tshi tou zwi funa a sa kombetshedzwi; Mudzimu u takalela ane a ṋea nga mbilu tshena. ₈Ene Mudzimu u kona u ni pfumisa nga mashudu lwa u tou kalula, uri misi yoṱhe ni dzule ni si na na tshithihi tshine na shaya, ni vhe na zwinzhi zwine na kona u tonda vhaṅwe ngazwo. ₉Na Maṅwalo a ri,

₁₀Huno Mudzimu, Ene ane a ṋea muzwali mbeu, a dovha a fha vhathu vhuswa ha u ḽa, u ḓo ni ṋea mbeu ine na i lila a ita na uri i aluwe, vhuthu haṋu ha bveledza khaṋo khulu. ₁₁U a ni pfumisa lune na dzula ni na zwine na kona u kovhekana na vhaṅwe, uri na vhaḽa vhe ra vha kovhela zwifhiwa zwi bvaho kha inwi vha kone u livhuha Mudzimu. ₁₂Mushumo hoyo waṋu u farisa vhathu vha Mudzimu nga zwine vha shaya, wa dovha wa ita na urí hu vhe na vhanzhi vhane vha livhuha Mudzimu. ₁₃Hezwo zwine na ita ndi tsumbo ya uri no ḓiimisela u shumela vhaṅwe. No thetshelesa mafhungo maḓifha a Khristo na ṱanzilela uri ni vhawe, na kovhekana zwine na vha nazwo na vhaḽa vhashai khathihi na vhaṅwe vhoṱhe, zwa vhonwa nga vhanzhi vha renda Mudzimu, ₁₄vha ni rabelela vha dzula vho ni ṱulutshela nga u vhona vhuthu ho tou kalulaho he Mudzimu a dzhenisa mbiluni dzaṋu. ₁₅Nga ri livhuhe Mudzimu we a ri ṋea tshifhiwa tshine luambo lwa vhathu lwa kundwa u tshi ṱalutshedza!