1 PITROSI 4

₁Vhunga Khristo o tambudzwa lwa muvhili, zwenezwo na inwi mafumo aṋu a vhe muhumbulo hoyu: We a tambudzelwa Khristo lwa muvhili o khaukana na vhutshinyi. ₂Tshifhinga tsho salaho tshine a kha ḓi tshila fhano fhasi ha tsha tevhedza nyemulo dza vhathu, u vho tevhedza zwine Mudzimu a funa. ₃Zwiḽa kale no vha ni tshi ita zwine vhannḓa vha zwi funa na tou pfeledza, na tshila nga u ita zwa vhuḓabaḓaba, na zwa dzinyemulo, na vhudakwa, na khunyelela minyanyani hu no ḽeswa na u nweswa, na rerelela midzimu i nengisaho. ₄Ndi zwine vhannḓa zwino vha kanuka vha tshi vhona ni sa tsha ḓibaḓekanya navho kha zwa vhuḓabaḓaba havho, vha vho ni nyefula. ₅Ndi zwone, vha ḓo sengiswa nga onoyo o no ḓilugiselaho u haṱula vha tshilaho na vho faho. ₆Ho vha hu u itela zwenezwo vhaḽa vha kale vho no faho vha tshi ḓivhadzwa mafhungo maḓifha. Zwo itelwa uri naho vho haṱulwa nga milayo ya vhathu fhano shangoni mivhili yavho ya lovha, vha tshile lwa muya unga na Mudzimu a tshi tshila.

₇Vhufhelo ha zwoṱhe ho no sendela; zwenezwo ni tshile nga u ḓifara, no fhaṱuwa, uri ni kone u rabela. ₈Tshihulwane kha zwoṱhe khwaṱhelani u funana, ngauri lufuno lu pila vhutshinyi vhu si na mbalo. ₉Ni swielelane ni sa gunguli. ₁₀Muṅwe na muṅwe a tonde vhaṅwe nga yeneyo mpho ye Mudzimu a mu ṋea, sa vhakovhi vha fulufhedzeaho vha vhuthu ha Mudzimu ha tshakha-tshakha. ₁₁A na mpho ya u funza a nge ndi mulomo wa Mudzimu. Ane a shumela tshivhidzo nga a vhonale uri u a zwi ita nga nungo dze a ṋewa nga Mudzimu, uri nga Yesu Khristo zwoṱhe zwi ite uri Mudzimu a rendwe ngazwo. Vhugala na maanḓa ndi zwawe lini na lini. Amen.

₁₂Vhafunwa, ni songo kanuka ni tshi tambudzwa sa vhane vha lingwa nga mulilo, na nga no welwa nga zwi songo fanelaho. ₁₃Tshaṋu nga hu vhe u takala ngauri ndi hone ni tshi khou kovhekana na Khristo u tambula hawe; nge na ralo ni ḓo takala na tou pembela musi a tshi dzumbululwa e kha vhugala. ₁₄Arali ni tshi semelwa Khristo ni na mashudu: ndi tsumbo ya uri Vhugala ha Mudzimu, Ene Muya wa Mudzimu, u kha inwi. ₁₅Hu songo vha na muthihi waṋu ane a tambudzwa nge a vha phondi kana fobvu kana ḽivemu kana nge a dzhenelela kha mafhungo a vhaṅwe. ₁₆Hone arali muthu a tshi tambudzwa nge a vha Mukhriste a songo shona, nga a hulise Mudzimu vhunga e na dzina ḽeneḽo ḽa Mukhriste.

₁₇Tshifhinga tsha khaṱhulo tsho swika, nahone i ḓo thoma nga muṱa wa Mudzimu Ene muṋe. Zwino-ha arali ya thoma nga riṋe, vhaḽa vho landulaho mafhungo maḓifha a Mudzimu khavho zwi ḓo tou ngani?

₁₈Maṅwalo a ri,

₁₉Muvhumbi washu Mudzimu u a fulufhedzea. Zwenezwo vhane vha tambudzwa nge Ene a funa zwi tshi ralo, kha vha mu kumedze vhutshilo havho vha futelele u ita zwivhuya.