1 PITROSI 1

₁Ndi nṋe Pitrosi, muapostola wa Yesu Khristo. Ndi ṅwalela inwi vhanangiwa vha Mudzimu ni re vhadali fhano shangoni vho balanganaho na Pontosi na Galata na Kapadokia na Asia na Bithinia. ₂No nangiwa nge Mudzimu Khotsi a dzula o zwi dzudzanya, uri ni itwe vhakhethwa nga Muya Mukhethwa, ni vhe vha thetshelesaho Yesu Khristo, ni handululwe nga malofha awe.

Ndi a ni resha ndi ri ngavhe Mudzimu a tshi ni itela vhuthu vhuhulu na vha na mulalo wo ḓalaho lwa u ḓala.

_3-4Kha ri rende Mudzimu, Khotsi a Muṋe washu Yesu Khristo. O ri khathutshela zwihulu a ri beba nga huswa uri ri vhe na zwe ra fulufhela zwine zwa ḓo vha vhutshilo hashu, ri vhe na ifa ḽi sa ṱahali, ḽi sa siḓufhali, ḽi sa haluluwi, ḽe a ni vhulungela ngei ṱaḓulu. Hezwo ro kona u zwi wana nge Yesu Khristo a vuswa vhafuni. ₅Vhunga ni tshi fulufhela Mudzimu, u a ni pilela nga maanḓa awe, uri ni vhuye ni swike kha u tshidzwa ho khunyelelaho hune ra ḓo dzumbululelwa nga tshikhathi tsha vhufhelo.

₆Pembelelani zwenezwo, naho zwino ni tshi nga kha ḓi lingwa nga nḓila nnzhi dzo fhambanaho. U ṱungufhala honoho ndi ha tshifhinganyana. ₇Na musuku une tshawo ha vha u lovha, u longwa muliloni uri u vhonale uri ndi wone-wone. Lutendo lwaṋu ndi lwa mutengo u fhiraho wa musuku kule; lwone lu nga kundwa nga mini u lingwa uri lu wanale uri ndi lwone-lwone? Musi Yesu Khristo a tshi ḓo ḓivhonadza u ḓo ni khoḓa, a ni ṋea vhugala, a ni hulisa. ₈Naho ni sa athu vhona Yesu Khristo ni a mu funa. Naho na zwino ni sa khou mu vhona nga maṱo, ni a mu fulufhela, na pembela nga dakalo ḽi sa wanali fhano fhasi, dakalo ḽine maipfi a muthu a kundwa u ḽi bula, ₉ngauri ni a tshidzwa tshoṱhe, vhunga no itela zwenezwo ni tshi fulufhela Mudzimu.

₁₀Vhaporofita vho londolosa nga vhuronwane zwa u tshidzwa honoho. Ndi vhone vho ḓivhadzaho a vhuthu he Mudzimu a ni itela. ₁₁Muya wa Khristo we a vha e khavho o ṱanziela nga u tambudzwa ha Khristo na nga vhugala he a ḓo vhu wana, vha londolosa uri zwi ḓo vha zwa lini, hu tshi khou iteani. ₁₂Vho vhudzwa uri naho vho ḓivhadza ayo mafhungo o vha a songo vha livha, o vha o livha inwi. Ndi uri zwino Muya Mukhethwa ó rumiwa ngeno fhasi a tshi bva ṱaḓulu, ndi nga maanḓa awe vhaḓivhadzi vha ayo mafhungo maḓifha vho kona u a ḓivhadza – mafhungo ane na vharuṅwa vha tama u a vhona.

₁₃Zwó ralo ḓiiteni ngoma-madzula-wo-vhambwa, nó fhaṱuwa, nó dzivhuluwa, nó fulufhela nga mbilu yoṱhe vhuthu vhune na ḓo itelwa musi Yesu Khristo a tshi ḓo dzumbululwa. ₁₄Ni nge vhana vha thetshelesaho, ni sa sokou ungiwa nga nyemulo dzaṋu dza zwiḽa kale ni sa athu ḓivha tshithu. ₁₅Vhunga Mudzimu, Ene we a ni vhidza, e mukhethwa, na inwi tshilani vhutshilo ha vhukhethwa, ₁₆vhunga ho ṅwalwa ha pfi, “Ivhani vhakhethwa, ngauri Nṋe ndi mukhethwa.”

₁₇Ni rabela Mudzimu na ri ndi Khotsi aṋu. Ene ndi Mudzimu a haṱulaho a sa ṱaluli, u tevhedza mishumo ya muthu. Zwenezwo dzulani ni tshi mu ofha ni tshi kha ḓi vha fhano fhasi hune na vha dziṱhunḓu. ₁₈Hufha ni tshi ḓivha uri musi ni tshi rengululwa kha matshilele a sa ḓivhalei e na a wana kha vha haṋu vha kale, a no ngo rengululwa nga zwithu zwi tshinyalaho zwi no nga siliva kana musuku, ₁₉no rengululwa nga malofha a mutengo muhulu a Khristo, Ene we a vha a tshi nga ngwana i sa solisei, i si na luvhadzi. ₂₀O dzula o tiwa nga Mudzimu shango ḽi sa athu sikwa, a sala a tshi ḓivhonadza misi ino ya vhufhelo, zwi tshi itelwa inwi. ₂₁Ndi nga Khristo ni tshi fulufhela Mudzimu, we a mu vusa vhafuni a mu ṋea vhugala, uri ni fulufhele Mudzimu fhedzi, ni lavhelele Ene.

₂₂No thetshelesa ngoho ha vha u ṱamba mbilu na thoma u funana ni sa hoyi. Ndi zwone, funanani nga mbilu yoṱhe, ₂₃ngauri ni tshi bebwa nga huswa a zwo ngo bva kha mbeu i sinaho, no bebwa nga i sa sini, nga ipfi ḽa Mudzimu ḽine ḽa ḓi dzula ḽi hone. ₂₄Maṅwalo na one o ri,

Ipfi iḽo ndi mafhungo maḓifha e na ḓivhadzwa one.