1 VHAMAKHABI 9

₁Musi Dimitriosi a tshi pfa upfi Nikhanoro na mmbi yawe vho fa nndwani, a dovha a ruma Bakhidese na Alikhimosi shangoni ḽa Juda. Vha ṱuwa na tshigwada tshihulwane tsha mmbi yawe. ₂Vha fara gondo ḽo livhaho Galelia, vha govhela muḓi wa Mesalotho shangoni ḽa Arabela, vha u thuba vha vhulaha vhathu vhanzhi.

₃Nga ṅwedzi wa u ranga wa ṅwaha wa ḓana na mahumi maṱanu na mivhili (152) vha ṱoka mishasha u livhana na Jerusalema. ₄Ndi hone vha tshi takuwa vha livha Beria vhe na vhanna vha zwigidi zwa mahumi mavhili (20 000) na vhanameli vha dzibere vha zwigidi zwivhili (2 000). ₅Judasi o vha o ṱoka mishasha Elasa e na vhanna vha zwigidi zwiraru (3 000) vho nanguludzwaho. ₆Musi avho vha tshi vhona mmbi khulu ya Magiriki vha farwa nga nyofho khulu, vhanzhi vha ṋenga afho mishashani, ha vhuya ha sala vhanna vhane vha nga swika maḓana maṱanu na mararu (800) fhedzi.

₇Huno musi Judasi a tshi vhona uri mmbi yawe i khou ṱhoṱhela nahone nndwa i tsini, a hanganea, ngauri o vha a si tshee na tshifhinga tsha u thoma u vha kuvhanganya. ₈Hone nangwe o vha o kulea nungo, a ḓi amba na vho salaho a ri, “Nga ri mbo ḓi takuwa ri dzhene maswina nga pfumo, ri vhone arali ri tshi nga vha kona.” ₉Vha linga u mu dzivhisa vha ri, “Vhukuma ri nga si zwi kone. Nga ri sokou ḓitshidza zwino, ri konou vhuya na mashaka ashu ri lwe navho. Zwino a ri gathi.” ₁₀Hone Judasi a ri, “Izwo ndi nga si zwi ite zwa u vha shavha. Arali tshifhinga tshashu tsho swika, nga ri fele mashaka ashu ri na tshivhindi, ra si sie ro tshinya vhugala hashu.”

₁₁Zwino mmbi ya Bakhidese ya bva mishashani ya ima vhuimoni hayo ha u lwa. Vhanameli vha dzibere vho vha vho fhandekana nga zwigwada zwivhili, vhaposi vha magatho na vha misevhe vho vha vho fhira phanḓa ha mmbi, na vhanna vhoṱhe vha vhuhali vhe phanḓa, ₁₂Bakhidese ene e kha tshigwada tsha tshaṋda tshauḽa. Vha tshimbilaho nga ṋayo vha thoma u kovhola vha tshi khou lidza dziphalaphala, vhó tangwa nga vhanameli vha dzibere masia mavhili. ₁₃Majuda na vhone vha lidza phalaphala dzavho. Fhasi ha tou dzinginyea nga phosho ya mmbi, ya lwiwa u bva nga matsheloni ḽa vhuya ḽa kovhela. ₁₄Judasi a vhona Bakhidese e thungo ya tshauḽa na vhahali vhahulu, zwino vhanna vhoṱhe vha mbilu dza u khwaṱha vha ṱuwa nae, ₁₅vha humisa itsho tshigwada tsha vhahali vhahulu vha Bakhidese, vha vha shakulisa vha vhuya vha vha swikisa zwivhangani zwa Ashidodo. ₁₆Hone musi vhanna vha tshigwada tsha tshamonde vha tshi vhona uri tsha tshauḽa tsho humiswa tsha shakuliswa, tsha mbo ḓi rembuluwa tsha tevhela Judasi na vhanna vhe a vha e navho, vha vha ḓa nga murahu. ₁₇Ha lwiwa nndwa tswuku, ha vhulahwa vhanzhi masiani oṱhe. ₁₈Judasi na ene a rambalala, Majuda vhaṅwe vha shavha. ₁₉Jonathani na Simoni vha hwala Judasi ṅwana wa khotsi avho, vha yo mu swiṱa tshaloni tsha khotsi avho muḓini wa Modeini. ₂₀Vhaisraele vhoṱhe vha mu lila vho ṱungufhala zwihulu. Vha mu lilela vha fhedza maḓuvha manzhi, vha ri,

₂₂Mishumo miṅwe ya Judasi, na nndwa dze a lwa na mishumo ye ya sumbedza uri u na tshivhindi tshingafhani, na vhuhulwane hawe, a zwo ngo ṅwalwa zwoṱhe, hone zwo vha zwi zwinzhi.

₂₃Musi Judasi o no dzama, vha nyadzaho mulayo vha dzumbuluwa shangoni ḽoṱhe ḽa Israele, vhavhi vha dovha vha bvelela. ₂₄Misi yeneyo ha wa nḓala khulu, shango ḽa ima na avho vhavhi. ₂₅Bakhidese a nanga vhanna vho guneaho a vha ita vhalangi vha shango. ₂₆Vhenevho vha ṱoḓa hoṱhe vha londa khonani dza Judasi vha vha ḓisa ha Bakhidese, a vha ṱungufhadza a tamba ngavho. ₂₇Ho vha hu sa athu vha na u tambudzwa hungafho kha ḽa Israele u bva tshee vhaporofita vha fhelela vha si tsha vhonala.

₂₈Zwino khonani dzoṱhe dza Judasi vha kuvhangana vha vhudza Jonathani vha ri, ₂₉“Tshee mukomana waṋu vha dzama a hu athu vha na a no nga ene ane a nga ri ranga phanḓa ri tshi lwa na maswina ashu, Bakhidese na avho vhane vha vutshela lushaka lwa hashu. ₃₀Zwino, ro nanga inwi ṋamusi u vha muvhusi washu vhudzuloni ha Judasi, ni ri range phanḓa musi ri tshi bva pfumo.” ₃₁Zwenezwo Jonathani a tenda u vha murangaphanḓa, a dzhia vhudzulo ha Judasi mukomana wawe.

₃₂Musi Bakhidese a tshi zwi pfa a linga u mu vhulaha. ₃₃Hone Jonathani na Simoni mukomana wawe na vhoṱhe vha re navho vha zwi pfa, vha shavhela phangani ya Thekua, vha ṱoka mishasha tsini ha mihuvhi ya Asifara. ₃₄Bakhidese a zwi pfa nga ḓuvha ḽa Sabatha, a mbo ḓi wela mulambo wa Jorodani na mmbi yawe yoṱhe.

₃₅Jonathani a ruma mukomana wawe Johanisi a vha murangaphanḓa wa tshigwada tsha vhathu vha u yo humbela khonani dzawe Vhanabathi uri vha sie navho mihwalo ya thundu dzavho, ngauri dzo vha dzi nnzhi. ₃₆Hone Vhajamburi vha no bva Medaba vha vha wela, vha fara Johanisi vha mu hwala na zwoṱhe zwe a vha e nazwo.

₃₇Ngavhuya ha swikiswa ipfi kha Jonathani na mukomana wawe Simoni ha pfi Vhajamburi vha khou ita vhuṱambo vhuhulu ha mbingano, vho rwa muduba muhulu, vha khou vhuya na muselwa, ndi ṅwananyana wa muṅwe wa vhaḓivhalea vhahulwane vha Kanana a no bva Nabatha. ₃₈Vha elelwa malofha a mukomana wavho Johanisi, vha gonya vha yo dzumbama thavhani. ₃₉Vha sedza, vha vhona gogo ḽihulu kheḽiḽaa ḽi khou ita phosho khulu ḽi na mihwalo; mukwasha na khonani dzawe na mashaka vho vha vho bvela nnḓa u yo ṱanganedza tshigwada tsha muselwa vhe na mirumba na vhaimbi na zwihali zwinzhi. ₄₀Majuda vha dzumbuluwa he vha vha vho dzumbama vha vha wela, vha vha vhulaha. Ho rambalala vhanzhi, vho salaho vha shavhela thavhani, Majuda vha thuba thundu yavho yoṱhe. ₄₁Ngauralo vhuṱambo ha mbingano ha shanduka tshililo, mukosi wa nyimbo wa shanduka nyimbo dza zwililo. ₄₂Musi Majuda avho vho no lifhedza malofha a mukomana wavho vha humela maṱafani a mulambo wa Jorodani.

₄₃Musi Bakhidese a tshi zwi pfa, a ḓa mabamani a Jorodani nga ḓuvha ḽa Sabatha e na mmbi khulu. ₄₄Jonathani a vhudza vhe a vha e navho a ri, “Zwino nga ri vuwe ri lwele vhutshilo hashu, ngauri ṋamusi a ḽi ngi ḽa mulovha na mbamulovha. ₄₅Nndwa i phanḓa hashu, murahu hashu nga ḽiṅwe sia hu na maḓi a mulambo wa Jorodani, nga ḽiṅwe sia hu na ṱhangasi na maṱaka, a hu na vhushavhelo. ₄₆Zwino ṱavhelani Mudzimu mukosi u ye makoleni, uri ri lamulelwe kha maswina ashu.” ₄₇Nndwa ya ṱangana, zwa swika he Jonathani a angaladza tshanḓa a tshi ri a kovhole Bakhidese, hone Bakhidese a tinya. ₄₈Jonathani na vhanna vhe a vha e navho vha fhufhela mulamboni wa Jorodani, vha bambela vha wela seli, maswina a si tsha vha tevhela. ₄₉Musi uyo ho fa vhanna vhane vha nga swika tshigidi vha siani ḽa Bakhidese.

₅₀Bakhidese a humela Jerusalema, a fhaṱa miḓi ya madzhavhelo kha ḽa Judia: Jerikho na Emausi na Bethe Horoni na Bethele na Thiminathi na Pharathoni na Thefoni, ya vha na mitsheṱo milapfu u ya nṱha, na dzigethe dzo khwaṱhiswaho nga matsimbi. ₅₁Miḓini iyo yoṱhe a vhea vhahali vha u dzula vha tshi tshoṱhela Vhaisraele. ₅₂A khwaṱhisa muḓi wa Bethe Tsuru na Gezere na vhuimavhahali, a vhea vhahali ngomu hayo, a khokha na zwiḽiwa. ₅₃A dzhia vhana vha vhatuka vha vharangaphanḓa vha shango a vha ita vhahahedzwa, a vha hoṋela vhuimavhahali ha Jerusalema.

₅₄Nga ṅwedzi wa vhuvhili wa ṅwaha wa ḓana na mahumi maṱanu na miraru (153), Alikhimosi a ri mitsheṱo ya muṱa wa ngomu wa hukhethwa i thuthiwe, zwenezwo ha vha u thutha mushumo wa vhaporofita. Hone zwenezwo a tshi tou thoma u pwasha mutsheṱo uyo, ₅₅a mbo ḓi farwa nga vhulwadze, mushumo wawe wa thithisea, a vha tshimuma, a oma miraḓo, a si tsha kona u amba na ipfi na ḽithihi ḽa u dzudzanya zwa muṱa wawe. ₅₆Alikhimosi a fhedza nga u fa a tshi khou dziḓa nga vhuṱungu. ₅₇Bakhidese a tshi vhona uri Alikhimosi o fa, a humela ha khosi, shango ḽa Judia ḽa dzika ḽa fhedza miṅwaha mivhili.

₅₈Ndi hone vhanyadzi vha mulayo vha tshi ita khoro vha ri, “Jonathani na khonani dzawe vha khou tshila nga mulalo vho tsireledzea. Zwino nga ri vhidze Bakhidese a vhuye, u ḓo vha fara vhoṱhe nga vhusiku vhuthihi.” ₅₉Ndi hone vha tshi ya vha eletshedzana nae. ₆₀Bakhidese a bva na mmbi khulu, a ṅwala maṅwalo nga tshidzumbe a iswa kha vhoṱhe vhane vha ima nae kha ḽa Judia, a tshi vha vhudza uri vha fare Jonathani na khonani dzawe. Hone zwa vha kunda, ngauri tshimbevha tshavho tsho ḓo ḓihwa, ₆₁ha fariwa vhane vha nga swika mahumi maṱanu (50) vha shango ḽeneḽo vhe vha vha vhe khwali dza u ita vhuvhi uho, vha vha vhulaha. ₆₂Ndi hone Simoni na Jonathani na vhanna vhane vha vha navho vha tshi humela Bethe Basi phangani vha vusa mitsheṱo yawo ye ya vha yo thuthiwa vha i khwaṱhisa. ₆₃Bakhidese a zwi pfa, a ramba mmbi yawe yoṱhe, a ramba na vha re Judia. ₆₄A ḓa a ṱoka mishasha yawe u mona na Bethe Basi, a fhaṱa mitshini ya u govhela, a lwa nawo ha vhuya ha fhela maḓuvha manzhi.

₆₅Jonathani a sia mukomana wawe Simoni afho muḓini, a ṋenga a yo dzula ḓakani e na vhanna vha si gathi. ₆₆A dia Odomera na mashaka awe, na Vhafasironi vhe mishashani yavho, ₆₇a ḓi bvela phanḓa a vha kunda zwi tshi ya, a ḓi sendela tsini ha Bethe Basi na mmbi yawe. Simoni na vhanna vha hawe vha ṋenga vha bva afho Bethe Basi, vha fhisa mitshini iyo ya u govhela muḓi. ₆₈Vha lwa na Bakhidese vha mu kunda, vha mu tambudza zwihulu, ngauri zwe a vha o humbula zwo ḓo pfuvha. ₆₉Bakhidese a sinyutshela vhanna avho vha sa ḓivhalekani vhe vha mu eletshedza uri a die shango iḽo. A vhulaha vhanzhi vhavho, a elekanya u humela shangoni ḽa hawe. ₇₀Jonathani a zwi pfa, a ruma vhaḓinḓa vha yo pfumedzana nae, na u langana uri mathubwa a vhofhololwe. ₇₁Bakhidese a tenda u ita zwe Jonathani a mu humbela. A ana muano wa uri a nga si tsha mu dina vhutshilo hawe hoṱhe. ₇₂Ndi hone a tshi mu vhofhololela mathubwa e a vha o a thuba shangoni ḽa Judia. A humela ha hawe, a si tsha dovha a vhuelela shangoni ḽa Judia.

₇₃Zwenezwo ḽa Israele ḽa lala. Jonathani a yo dzula Mikhimashi, a vha muhaṱuli wa vhathu, a lozwa vhavhi vha nyadzaho Mudzimu kha ḽa Israele.