1 VHAMAKHABI 7

₁Nga ṅwaha wa daṋa na mahumi maṱanu na muthihi (151) Dimitriosi murwa wa Selukhosi a takuwa Roma, a swika muḓini wa khunzikhunzini ya lwanzhe e na vhanna vha si gathi, a thoma u vhusa henefho e khosi. ₂Musi e nḓilani ya u dzhena pfamoni ya musanda wa vhomakhulukuku wawe, vhahali vha fara Anthiokhosi na Lisiasi uri vha vha ise khae. ₃Musi a tshi zwi pfa a ri, “A thi ṱoḓi na u vhona zwifhaṱuwo zwavho.” ₄Zwenezwo vhahali vha vha vhulaha, Dimitriosi a dzula kha khuluṋoni ya vhuhosi hawe.

₅Ndi hone Vhaisraele vhoṱhe vha nyadzaho Mulayo na Mudzimu vha tshi ḓa khae. Vho vha vho rangwa phanḓa nga Alikhimosi we a vha a tshi tama u vha muphrista muhulwane. ₆Vha pomoka Majuda vha tshi vhudza khosi vha ri, “Judasi na vhana vha khotsi awe vho lozwa khonani dzavho dzoṱhe, riṋe ra thathwa shangoni ḽa hashu. ₇Zwino, nga vha rume munna ane vha mu fulufhedza a yo vhona ndozwo yoṱhe ye Judasi a ita na zwe a tshinya shango ḽa khosi, a vha lifhedze na vhatikedzi vhavho vhoṱhe.”

₈Ndi hone khosi i tshi nanga Bakhidese, muṅwe wa khonani dzayo, muvhusi wa Seli ha Yufuratha, muḓivhalea muvhusoni wawe, munna a fulufhedzeaho kha khosi. ₉A mu ruma na Alikhimosi, uḽa o nyadzaho Mudzimu, ó vhea onoyo uri a vhe muphrista muhulwane, a vha laya uri vha lifhedze Vhaisraele. ₁₀Vha dzhena nḓilani vha swika shangoni ḽa Judia vhe na mmbi khulu, vha ruma vhaḓinḓa vha yo fhura Judasi na vhana vha khotsi awe vha tshi amba a mulalo. ₁₁Hone vhone vha si londe maipfi avho, nga u vhona uri vho ḓa na mmbi khulu. ₁₂Huno ha ḓa tshigwada tsha vhafunzi vha Maṅwalo ha Alikhimosi na Bakhidese vha tshi humbela uri hu vhe na pfano i ṱanganedzeaho. ₁₃Vhahasidi vho vha vhone vha u thoma kha Vhaisraele vha u ṱoḓa mulalo khavho, ₁₄vha ri, “We a ḓa na mmbi ndi muphrista wa lutsinga lwa Aroni; a nga si ri khakhele.” ₁₅Alikhimosi a amba navho maipfi a mulalo, a vha anela a ri, “Riṋe a ri nga lingi u ni huvhadza kana khonani dzaṋu.” ₁₆Ndi zwe vha mu fulufhedza. Hone ene a mbo ḓi fara vha mahumi maṱanu na ḽithihi (60) vhavho a vha vhulaha nga ḓuvha ḽithihi, hu tshi khunyeledzwa fhaḽa he ha ṅwalwa Maṅwaloni ha pfi,

₁₈Zwino vhathu vhoṱhe vha farwa nga nyofho na mutetemelo, vha ri, “Avha a vha na ngoho, a vha fulufhedzei, hufha vho pfuka na pfano na muano we vha u ana.”

₁₉Bakhidese a ṱuwa Jerusalema a yo ṱoka mishasha yawe Bethe Zaithi. A ita uri hu farwe vhanzhi vhe vha shavhela khae, na vhaṅwe vha havho, a ri vha vhulahwe vha poswe dindini ḽihulu. ₂₀Shango iḽo a ḽi ṋea Alikhimosi, a sia vhahali uri vha mu farise, ene muṋe a humela ha khosi.

₂₁Alikhimosi a ḓi dzula a tshi vhanga vhuphrista vhuhulwane, ₂₂vhoṱhe vhe vha vha vha tshi khou dzindela vhathu vha havho vha kuvhangana khae. Vha dzhia shango ḽa Judia ḽa vha ḽavho, vha tambudza Israele zwihulu.

₂₃Musi Judasi a tshi vhona vhuvhi hoṱhe vhu no khou itwa nga Alikhimosi na vhanna vha hawe kha ḽa Israele, zwi fhiraho na zwe zwa itwa nga vhannḓa, ₂₄a mona na shango ḽoṱhe ḽa Juda, a lifhedza vhanna vhoṱhe vho shandukelaho Majuda, a vha thivhela uri vha si vhuye vha ya mivhunduni ya nnḓa ha muḓi. ₂₅Hone Alikhimosi a tshi vhona uri maanḓa a Judasi na vhane vha ima nae a khou ḓi hula a tshi ya, na u ḓivha uri a nga si kone u imedzana navho, a humela ha khosi a vha pomoka vhuvhi vhunzhi.

₂₆Ndi hone khosi i tshi ruma Nikanoro, muṅwe wa magota ayo a bvumo, swina ḽa Majuda we a vha a tshi vha vhenga zwihulu, a mu laya uri a vha lozwe. ₂₇Nikanoro a swika Jerusalema e na mmbi khulu, a fhura Judasi na vhana vha khotsi awe nga u swikisa mafhungo aya a mulalo a ri, ₂₈“Nṋe na inwi ri songo lwa. Ndi ḓo ḓa na vhanna vha si gathi nda ṱangana na inwi nga mulalo.” ₂₉Zwenezwo a ḓa kha Judasi, vha reshana nga mulalo. Hone maswina a Judasi vho vha vho ḓilugisela u mu fara. ₃₀Judasi a ḓo sevhiwa upfi Nikanoro o ḓa khae e na tshimbevha, a pfa a tshi ofha a si tsha funa u dovha a ṱangana nae. ₃₁Musi Nikanoro a tshi vhona uri tshimbevha tshawe tsho no vhonololwa, a bva a yo lwa na Judasi tsini ha Khafara Salama. ₃₂Ha rambaladzwa vhanna vhane vha nga swika maḓana maṱanu (500) vha mmbi ya Nikanoro, vhaṅwe vha shavhela Muḓini wa Dafita.

₃₃Zwo no ralo Nikanoro a gonya thavhani ya Tsioni. Vhaphrista vhaṅwe vha no bva thembeleni na vhaṅwe vhahulwane vha lushaka vha bva u yo mu resha nga mulalo na u mu sumbedza tshiṱhavhelo tshi fhiswaho tshe tsha vha tshi tshi khou ṋekedzwa hu tshi itelwa khosi. ₃₄Hone ene a vha goḓa, a vha kolela, a vha kumadza, a amba nga lunyadzo. ₃₅A ana o sinyuwa a ri, “Arali Judasi na mmbi yawe vha sa mbo ḓi ḓiswa kha nṋe zwino, musi ndi tshi huma ndo mu kunda ndi ḓo fhisa nnḓu iyi ye lore.” A ṱuwa o sinyuwesa. ₃₆Ndi hone vhaphrista vha tshi dzhena thembeleni vha ima phanḓa ha aḽiṱari na nnḓu ya Mudzimu. Vha lila vha ri, ₃₇“Wo nanga nnḓu iyi uri i vhidzwe nga dzina ḽau, i vhe nnḓu ine vhathu vhau vha ḓo ḓa na thabelo dzavho na khumbelo dzavho. ₃₈Lifhedza munna uyu na mmbi yawe, u litshe vha rambaladzwe nga banga. Elelwa vhunyefuli havho, u vha laṱise tshoṱhe.”

₃₉Nikanoro a ṱuwa Jerusalema a yo ṱoka mishasha yawe Bethe Horoni, henefho mmbi iṅwe i bvaho Siria ya baḓekana nae. ₄₀Hone Judasi a ṱoka mishasha yawe Adasa e na vhanna vha zwigidi zwiraru (3 000). Judasi a rabela a ri, ₄₁“Musi vhaḓinḓa vha khosi iṅwe vho vhuya vha u nyefula, muruṅwa wau a bva a yo vhulaha vha zwigidi zwa daṋa na mahumi maṱanu na mararu na zwiṱanu (185 000) vhavho. ₄₂Ita nga u ralo zwino u kuye mmbi iyi phanḓa hashu ṋamusi, u ite uri vhaṅwe vha ḓivhe zwauri Nikanoro o nyefula hukhethwa hau; mu haṱule u tshi tevhedza vhuvhi hawe.”

₄₃Mmbi dza ṱangana dza lwa nga ḓuvha ḽa fumi na vhuraru (13) ḽa ṅwedzi wa Adara. Mmbi ya Nikanoro ya kuyekanywa, ene muṋe a vha wa u thoma u rambalala nndwani. ₄₄Musi mmbi yawe i tshi vhona uri Nikanoro o fa, vha laṱa zwihali zwavho fhasi vha shavha. ₄₅Majuda vha vha pandamedza ḓuvha ḽoṱhe, u bva Adasa u swika tsini ha Gezere, vha tshi khou lidza phalaphala dza u ramba Majuda ngavho murahu havho. ₄₆Vhathu vha bva miḓanani yoṱhe ya Judia thungo dzoṱhe, vha vha kutela ngomu vha vha humisela kha vhapandamedzi vhavho, maswina oṱhe a fa nga banga; a hu na we a ponyoka. ₄₇Ndi hone Majuda vha tshi kuvhanganya zwe vha thuba na zwe vha ṱangula. Vha tumula ṱhoho ya Nikanoro na tshanḓa tshawe tshauḽa tshe a tshi imisa nga lunyadzo, vha zwi isa Jerusalema vha zwi ṱana hone. ₄₈Vhathu vha pembela zwihulu, ḓuvha iḽo vha ḽi ita ḽa dakalo ḽihulu. ₄₉Vha ḓivhadza uri ḽi fanela u vhulungwa ṅwaha muṅwe na muṅwe, nga ḓuvha ḽa fumi na vhuraru (13) ḽa ṅwedzi wa Adara. ₅₀Ha fhela tshifhinganyana shango ḽa Judia ḽo lala.