Nndwa ya u lwa na vha Idumia na Vhaamoni
1Musi vhannḓa vho vha tangaho vha tshi pfa upfi aḽiṱari yo vuswa na uri thembele yo kumedzwa Mudzimu u ḓi nga u rangani, vha sinyuwa zwihulu. 2Zwenezwo vha langana u lozwa vha lutsinga lwa Jakopo vhe vha vha vha tshi dzula navho, vha mbo ḓi thoma u vha vhulaha uri vha vha lozwe. 3Ndi hone Judasi a tshi dia vhana vha Esau vha re Akrabathene kha ḽa Idumia, nge vha vha vha tshi khou lalela Vhaisraele; a vha kunda tshoṱhe a vha kula nungo, a vha ṱangula. 4Judasi a humbula na vhuvhi he a itwa nga vha Beani, vhe vha vha vhe tshifu na tshikhukhuli tsha vhathu nga u vha lalela magondoni. 5A vha pandamedza vha shavhela thawarani yavho, a mbo ḓi hu govhela, a ana uri u ḓo vha lozwa tshoṱhe, a fhisa thawara dzavho, dza swa na vhathu vhoṱhe vhe vha vha vhe ngomu hadzo. 6Ndi hone a tshi wetshela kha Vhaamoni, a ṱangana na mmbi yo khwaṱhaho na gogo ḽihulu ḽa vhathu vhe na Timoti murangaphanḓa wavho. 7A lwa navho nndwa nnzhi, a vha zhaka, a vha rambaladza. 8A thuba Jazere na miḓana yawo, a konou humela Judia.
Nndwa dza Vhamakhabi Galelia na Giliadi
9Vhannḓa vha re Giliadi vha kuvhangana uri vha yo dia Vhaisraele vha dzulaho shangoni ḽavho vha vha lozwe. Zwino avho vha shavhela dzhavheloni ḽavho ḽa Dathema. 10Vha ṅwala luṅwalo vha lu isa ha Judasi na vha hawe vha ri, “Vhannḓa vho ri tangaho vho kuvhangana uri vha lwe na riṋe vha ri lozwe, 11vha khou lugisela u ḓa vha thuba dzhavhelo idzi ḽe ra shavhela khaḽo; Timoti ndi ene murangaphanḓa wa mmbi yavho. 12Nga vha ṱavhanye u ḓa vha ri lamukise khavho, ngauri ho no rambalala vhanzhi vhashu. 13Vha hashu vhoṱhe vhe vha vha vha tshi dzula shangoni ḽa Thobiasi vho vhulahwa; vhannḓa vho thuba vhafumakadzi vhavho na vhana na thundu, vha vhulaha vhanna vhane vha nga swika tshigidi (1 000).”
14Vha tshi kha ḓi vhala maṅwalo ayo ha mbo ḓi swika vhaḓinḓa vha tshi bva Galelia vho kherukanya zwiambaro zwavho, vha swikisa mafhungo a no nga eneo: 15vha ri vhathu vha dzulaho Tholemai na Tiro na Sidoni na kha ḽoṱhe Galelia ḽa vhannḓa vho kuvhanganela u vha lozwa. 16Musi Judasi na vhathu vha tshi zwi pfa, ha mbo ḓi vha na guvhangano ḽihulu vha langana uri vha ḓo lamukisa hani vha havho vha no khou diwa nga maswina.
17Judasi a vhudza mukomana wawe Simoni a ri, “Ḓinangeleni vhanna, ni ṱuwe, ni yo lamukisa vha haṋu vha re Galelia, nṋe na murathu wanga Jonathani ri ḓo ya Giliadi.”
18Kha ḽa Judia, Judasi a sia Josefa murwa wa Zakaria, na Azaria murangaphanḓa wa vhathu, na mmbi yo salaho uri vha hu linde. 19Judasi a vha laya a ri, “Langani vhathu avha, hone ni songo dia vhannḓa ri sa athu vhuya.” 20Simoni a kovhelwa vhanna vha zwigidi zwiraru (3 000) uri a ye navho Galelia, Judasi ene a kovhelwa vhanna vha zwigidi zwiṱanu na zwiraru (8 000) uri a ye navho Giliadi.
21Simoni a livha Galelia, a lwa nndwa nnzhi na vhannḓa, a vha kuyekanya, 22a vha pandamedza vha vhuya vha swika khoroni ya Vhatholemaisi. Ha rambaladzwa vhanna vhane vha nga swika zwigidi zwiraru (3 000) kha vhannḓa, a vha ṱangula. 23A ṱuwa na Majuda vhe vha vha vhe Galelia na Aribatha, na vhafumakadzi vhavho na vhana, na thundu yavho yoṱhe, a vha isa Judia hu tshi khou pembelwa.
Judasi na Jonathani vhe seli ha Jorodani
24Judasi Makhabiosi na murathu wawe Jonathani vha wela mulambo wa Jorodani vha tshimbila lwendo lwa maḓuvha mararu phangani. 25Henefho vha ṱangana na Vhanabathia; vhenevho vha vha ṱanganedza nga mulalo, vha vha vhudza zwoṱhe zwe zwa itea kha Majuda vha Giliadi, vha ri, 26“Vhanzhi vhavho vho hoṋelwa Botsora na Bosoro na Alema na Khasipho na Makede na Kharanaimi” – miḓi iyo yoṱhe yo vha yo hula, yo fhaṱeledzwa nga mitsheṱo – 27“vhaṅwe vho hoṋelwa miḓini miṅwe ya Giliadi. Maswina avho o luka vhunwa ha u yo dia dzhavhelo ḽavho matshelo uri vha thube vhathu avho vhoṱhe nga ḓuvha ḽithihi vha vha lozwe.”
28Zwenezwo Judasi na mmbi yawe vha mbo ḓi huma nga u ṱavhanya, vha buḓekanya phanga vha livha Botsora, vha u thuba vha vhulaha vhathu vhoṱhe vha tshinnani, vha hwala thundu yoṱhe ya henefho muḓini, vha u fhisa. 29Vha takuwa henefho hu tshee vhusiku, vha swika dzhavheloni ḽa Dathema. 30Musi mapfuvhi a tshi tswuka vha sedza phanḓa vha vhona gogo ḽa vhathu vha sa vhalei, vhe na vhunamelo na mitshini ya nndwa ya u thuba vhuimavhahali, vha tshi vho thoma u dia vhathu vha re nga ngomu. 31Judasi a tshi vhona uri nndwa yo no ṱangana, na mukosi wa thabelo u vho pfala u tshi gonya ṱaḓulu, hu tshi lidzwa phalaphala hu tshi ṱavhiwa mukosi muhulu, 32a vhudza vhanna vha mmbi yawe a ri, “Ṋamusi lwelani vha hashu!”
33Judasi a vha ḓa nga murahu e na zwigwada zwiraru zwa vhathu vha tshi khou lidza phalaphala, vha tshi ṱavha mukosi wa thabelo. 34Musi mmbi ya Timoti i tshi vhona uri ndi Makhabiosi, vha shavha, ene a vha kunda lwa u tou vha kuyekanya. Musi wonoyo ha rambalala vhanna vha maswina vhane vha nga swika zwigidi zwiṱanu na zwiraru (8 000). 35Zwino a livha Alema, a u dia, a u thuba; a vhulaha vhathu vhoṱhe vha tshinnani, a hu ṱangula, a fhisa muḓi uyo we lore. 36U bva henefho a fhirela phanḓa a thuba Khasipho na Makedi na Bosoro, na miḓi miṅwe ya Giliadi.
37Zwenezwo Timoti a ramba mmbi iṅwe, a ṱoka mishasha u livhana na Rafoni, seli ha govha. 38Judasi a ruma dziṱholi afho mishashani, vha vhuya vha tshi mu vhudza vha ri, “Timoti o ri rambela vhannḓa vhoṱhe vho ri tangaho vha vhumba mmbi khulu vhukuma; 39vha ita na u rendela Maarabu uri vha vha farise, nahone vho ṱoka mishasha seli ha govha, vho ḓilugisela u ni dia.” Ndi hone Judasi a tshi yo ṱangana navho.
40Musi Judasi na mmbi yawe vha tshi swika govhani hu elelaho maḓi, Timoti a vhudza magota a mmbi yawe a ri, “Arali a vha ene a rangaho u wetshela kha riṋe, ri nga si kone u imedzana nae; vhukuma u ḓo ri kunda. 41Hone arali a tshi ofha, a ṱoka mishasha seli na luḽa lwa govha, ri ḓo wetshela khae, ra mu kunda.”
42Hone Judasi a tshi swika muedzini u elelaho maḓi, a vhea magota a mmbi tsini nawo, a vha laya a ri, “Ni songo tenda munna na muthihi a tshi sala afha; vhoṱhe nga vha bve pfumo.” 43Judasi o vha ene wa u thoma u wela a vha tshoṱhela e na vhahali vhawe vhoṱhe, vha tou kuyekanya vhannḓa, avho vha mbo ḓi laṱa zwihali zwavho vha shavhela thembeleni ya Kharanaimi. 44Majuda vha thuba muḓi uyo, vha fhisa muṱa wa thembele ha swa na vhoṱhe vhe vha vha vhe ngomu. Zwenezwo a phusukanya Kharanaimi, ha sala hu si tshee na muthu ane a nga imedzana na Judasi.
45Ndi hone Judasi a tshi kuvhanganya Vhaisraele vhoṱhe, vhahulwane na vhaṱuku, vhe vha vha vhe Giliadi, na vhafumakadzi vhavho na vhana na thundu yavho, vha vha gogo ḽihulu ḽa vhathu, uri vha ye shangoni ḽa Juda. 46Musi vha tshi swika Efroni, muḓi muhulu wo tingeledzwaho nga mutsheṱo wo khwaṱhaho u navha na nḓila, vha wana zwi sa konadzei u mona nawo siani ḽa tshauḽa kana tshamonde, vha fanela uri vha fhire vhukati hawo. 47Hone vhanna vha afho muḓini vha vha valela nnḓa, vha vala dzigethe nga matombo. 48Ndi hone Judasi a tshi vha swikisela mafhungo aya a mulalo, a ri, “Ri ḓo tou pfukekanya shango ḽaṋu uri ri swike kha ḽashu; a hu na ane a ḓo ni huvhadza; ri ḓo tou fhira nga milenzhe fhedzi.” Hone vhone vha si tende u mu vulela.
49Ndi hone Judasi a tshi ri hu itwe mulevho wa uri muṅwe na muṅwe a ṱoke mushasha henefho hune a vha hone. 50Vhanna vha mmbi vha mbo ḓi ṱoka mishasha, vha lwa na muḓi uyo ḓuvha ḽeneḽo ḽoṱhe na vhusiku, a vhuya a u thuba. 51A vhulaha vhathu vhoṱhe vha tshinnani, a vha lozwa tshoṱhe, a ṱangula muḓi uyo, a fhira vhukati ha muḓi nṱha ha zwitumbu.
52Zwino vha wela mulambo wa Jorodani vha wetshela mudavhini muhulu phanḓa ha Bethe Shiani. 53Huno Judasi a endela u kuvhanganya vho balanganaho a tshi vha ṱuṱuwedza lwendoni lwoṱhe, vha vhuya vha swika shangoni ḽa Juda. 54Vha gonya thavha ya Tsioni vha tshi pembela vho takala, vha ṋekedza zwiṱhavhelo zwi fhiswaho, nge ha vha hu si na na muthihi wavho o vhulahwaho, vho vhuya vhoṱhe vha tshi tshila.
Josefa na Azaria vha tshi kundwa
55Judasi na Jonathani vho vha vha tshee shangoni ḽa Giliadi, mukomana wawe Simoni e Galelia u livhana na Tholemai. 56Huno Josefa murwa wa Zakaria, na Azaria, vhe vha vha vhe vhalangammbi, vha pfa zwa mishumo ya vhuhali na nndwa zwe Vho Judasi vha zwi ita, 57vha ri, “Nga ri ḓiitele-vho dzina nga u bva ra yo lwa na vhannḓa vho ri tangaho.” 58Vha vhudza vhanna vha mmbi yavho vhe vha vha vhe navho, vha bva vha livha Jamunia. 59Huno Gorogiasi na vhanna vha hawe vha bva muḓini vha vha ṱanganedza vha kovholana. 60Josefa na Azaria vha kundwa, vha pandamedzwa u vhuya u swika masakhani a Judia, musi uyo ha rambaladzwa Vhaisraele vhane vha nga swika zwigidi zwivhili (2 000). 61Vhathu vho vha vho kundwa luvhi, nge vha si thetshelese Judasi na vhana vha khotsi awe, vha tshi ri vha ḓo ita-vho mishumo ya vhuhali, 62hone vha si vha muṱa wa avho vhanna vhe vha pfi vha ḓo tshidza Israele.
63Huno Judasi, munna wa vhuhali, na vhana vha khotsi awe vha vha na bvumo kha ḽoṱhe ḽa Israele na kha vhannḓa vhoṱhe, hoṱhe he dzina ḽavho ḽa pfala; 64vhanna vha kuvhangana ha Vho Judasi vha vha khoḓa.
65Ndi hone Judasi na vhana vha khotsi awe vha tshi bva vha yo dia vhana vha Esau shangoni ḽa thungo ya Tshipembe; a thuba Hebroni na miḓana yawo, a thutha dzhavhelo ḽawo, a fhisa dzithawara u mona nawo. 66Ndi hone a tshi takuwa a livha shangoni ḽa Vhafilista, a fhira vhukati ha Maresha. 67Musi wonoyo vhaphrista vhaṅwe vha fela nndwani nge vha ita zwa vhutsilu uri vha vhoniwe sa vhahali. 68Judasi zwenezwo a livha Ashidodo shangoni ḽa Vhafilista, a thutha aḽiṱari dzavho, a fhisa zwifanyiso zwa matombo zwa midzimu yavho, a ṱangula miḓi yavho a konou humela shangoni ḽa Juda.
