Mathathiasi na vharwa vhawe
1Misi yeneyo Mathathiasi, murwa wa Johanisi, murwa wa Simioni, muphrista wa muṱa wa Juaribi, a pfuluwa Jerusalema, a yo dzula muḓini wa Modeini. 2Mathathiasi o vha e na vharwa vhaṱanu. Ndi Johanisi we a vha a tshi pfi Gadi, 3na Simoni we a vha a tshi pfi Thasi, 4na Judasi we a vha a tshi pfi Makhabiosi, 5na Eliazara we a vha a tshi Avarani, na Jonathani we a vha a tshi pfi Aphusi. 6Musi Mathathiasi a tshi vhona vhuṱudzi ha u nyefula Mudzimu kha ḽa Judia na muḓini wa Jerusalema, 7a ri, “Nṋe wee! Ndo bebelwani nda vhona vhana vhanga vha tshi fhalala, muḓi mukhethwa u tshi phusukanywa, nda sokou dzula henefho u tshi ṋekedzwa maswina, hukhethwa ha dzhiwa nga vhatsinda?
8“Thembele yawo i vho nga munna o shoniswaho,
9zwinakisi zwawo zwa vhugala zwo hwalwa sa zwiṱangulwa.
Tshetshe dzawo dzo vhulahwa mikotoni yawo,
vhaṱhannga vhawo vha fa nga banga ḽa maswina.
10Ndi lushaka lufhio
lu songo ḓithubelaho mukovhe wa pfamo dzawo
wa dzhia thundu dzawo?
11Madzanga awo oṱhe o dzhiwa.
Wo vha wo vhofholowa, zwino wo no vha phuli.
12Vhonani hukhethwa hashu,
lwone lunako lwashu na vhugala hashu, ho sala hu soga.
Vhannḓa vho hu kumadza!
13Ri kha ḓi tshilelani?”
14Ndi hone Mathathiasi na vharwa vhawe vha tshi kherukanya zwiambaro zwavho, vha ambara madzanganda, vha lila lu ṱungufhadzaho.
U hana kuluvhele kwa vhahedeni
15Magota a khosi vhane vha kombetshedza Majuda u landula lutendo lwavho vha swika muḓini wa Modeini u dzudzanya zwiṱhavhelo. 16Vhaisraele vhanzhi vha baḓekana navho, hone Mathathiasi na vharwa vhawe vha ima nga tshavho. 17Ndi hone magota a khosi vha tshi amba na Mathathiasi vha ri, “Vhone vha murangaphanḓa, vha munna muhulwane a huliseaho muḓini uno, vha tikedzwa nga vhana vhavho na mashaka avho. 18Nga vha ḓe zwino, vha vhe wa u ranga u tevhedza mulayo wa khosi, u ḓi nga vhannḓa vhoṱhe na vhahulwane vha Judia na vho salaho Jerusalema vho ita nga u ralo. Ndi hone vhone na vharwa vhavho vha tshi ḓo vha-vho khonani dza khosi, vha pfumiswa nga siliva na musuku na zwifhiwa zwinzhi.” 19Hone Mathathiasi a fhindula a tshi tou ṱavha mukosi a ri, “Nangwe vhannḓa vhoṱhe vha re muvhusoni wa Khosi vha mu thetshelesa, muṅwe na muṅwe wavho a landula vhurereleli ha vhokhotsi awe, a tenda milayo ya khosi, 20huno nṋe na vharwa vhanga na mashaka anga ri ḓo vhulunga mulanga wa vhokhotsi ashu. 21Na kathihi ri nga si landule mulayo na ndayo. 22Riṋe a ri nga thetshelesi maipfi a khosi kana ra pambuwa kha vhurereli hashu na zwiṱuku.”
23Musi Mathathiasi a tshi tou fhedza u amba maipfi ayo, muṅwe Mujuda a bvela khagala vhoṱhe vha tshi zwi vhona uri a ṋekedze tshiṱhavhelo kha aḽiṱari afho muḓini wa Modeini a tshi tevhedza mulayo wa khosi. 24Mathathiasi a tshi tou mu vhona, a pfa a tshi tou swa, mbilu yawe ya rithea, ya swela mulayo, a mbo ḓi fhufhela phanḓa a mu vhulahela henefho kha aḽiṱari. 25A mbo ḓi vhulaha na muḓinḓa wa khosi we a vha a tshi khou vha kombetshedza u ṋekedza zwiṱhavhelo, a thutha aḽiṱari iyo. 26Ngauralo a sumbedza uri mbilu yawe i swela mulayo, zwa nga zwe Finiasi a ita Zimiri murwa wa Salu.
27Ndi hone Mathathiasi a tshi buḓekanya muḓi a tshi khou ṱavha mukosi a tshi ri, “Muṅwe na muṅwe ane mbilu yawe ya swela mulayo, onoyo ane a tikedza mulanga, nga a ntevhele!” 28Zwenezwo Mathathiasi a shavhela dzithavhani na vharwa vhawe, vha sia thundu dzavho dzoṱhe muḓini. 29Vhanzhi vhe vha vha vha tshi funa u tshila vha tshi tevhedza zwivhuya na maitele a zwa vhurereli vha bva vha ya phangani vha yo dzula hone, 30vhone na vharwa vhavho na vhafumakadzi vhavho na kholomo dzavho, nge vha vha vho konḓiselwa vhutshilo.
31Mafhungo ayo a swikiswa kha magota na kha vhahali vha khosi vhe vha vha vhe Muḓini wa Dafita henefho Jerusalema, ha pfi vhanna vhaṅwe vhe vha nyadza mulayo wa khosi vho yo dzumbama phangani. 32Vhanzhi vha gidima vha yo vha londa, vha tshi vha wana vha ṱoka mishasha u livhana navho, vha ḓilugisela u vha wela nga ḓuvha ḽa Sabatha. 33Vhalondi vha vha vhudza vha ri, “Zwino zwo guma! Bvelani nnḓa ni tevhedze mulayo wa khosi, ndi hone ni tshi ḓo tshila.” 34Avho vha fhindula vha ri, “Riṋe a ri nga bveli nnḓa, na mulayo wa khosi a ri nga u tevhedzi, a ri nga nyadzi Sabatha.” 35Ndi hone maswina vha tshi vha wela kathihi fhedzi, 36hone vhone vha si ḓilwele, na matombo vha si pose, na vhudzumbamo havho vha si hu thivhe. 37Vha ri, “Roṱhe nga ri fe, tenda ri si na mulandu; ḽiṱaḓulu na ḽifhasi ndi ṱhanzi dzashu dza uri ni khou ri lozwa ri si na tshe ra tshinya.” 38Ndi hone maswina a tshi vha wela nga ḓuvha ḽa Sabatha, vha fa na vhafumakadzi vhavho na vhana vhavho na zwifuwo zwavho, ha fa vhathu vha tshigidi (1 000).
39Musi Mathathiasi na khonani dzawe vha tshi zwi pfa vha vha lila zwihulu. 40Vha vhudzana vha ri, “Arali roṱhe ra ita unga mashaka ashu, ra si lwe na vhannḓa ri tshi lwela vhutshilo hashu na maitele ashu, vha ḓo ṱuwa vha tshi ri lozwa vha tou ri swiela ḽifhasini.” 41Musi wonoyo vha mbo ḓi ita ambadzifhele vha ri, “Nga ri lwe na muṅwe na muṅwe ane a ri dia nga ḓuvha ḽa Sabatha, uri ri si fe roṱhe unga mashaka ashu vhe vha fa vhe vhudzumbamoni.”
42Zwenezwo ha ḓa tshigwada tsha Vhahasidia tsha ḓibaḓekanya navho, vhahali vha Israele, vhoṱhe vha tshi lwela mulayo. 43Vhoṱhe vhe vha vha vha tshi shavha u tovholwa, na vhone vha ḓibaḓekanya navho, vha vha tikedza. 44Vha vhumba mmbi, vha vhulaha vhavhi vho sinyuwa, vha lozwa vhapfuki vha mulayo vhe mbitini, vho ponyokaho vha shavhela kha vhannḓa uri vha vha tsireledze. 45Mathathiasi na khonani dzawe vha tshimbila vha tshi thutha aḽiṱari dza vhahedeni, 46vha ita na u fumbisa vhatukana vhoṱhe vha mashuvhuru vhe vha wanala shangoni ḽa Israele, nga u tou vha kombetshedza. 47Vha pandamedza vhanna vha u ḓiḓivha, zwa ḓi vha nakela. 48Vha lamukisa mulayo kha vhannḓa na mahosi, vha si tende vhavhi vha tshi kunda.
Lufu lwa Mathathiasi
49Musi tshifhinga tsha Mathathiasi tsha u fa tshi tshi swika, a vhudza vharwa vhawe a ri, “U ḓiḓivha na lunyadzo zwi khou ḓi hulela zwi tshi ya, ndi tshifhinga tsha ndozwo na mbiti dzi dugaho. 50Zwino vhananga, ivhani na dzangalelo ḽa mulayo, ni fele mulanga wa vhokhotsi aṋu.
51“Elelwani mishumo
ye vhokhotsi ashu vha shuma misi yavho,
ndi hone ni tshi ḓo wana vhugala vhuhulu,
na vha na dzina ḽa lini na lini.
52Abrahamu ho ngo wanala
a tshi fulufhedzea musi a tshi lingwa,
a pfi ndi muvhuya ngazwo naa?
53Josefa zwiḽa e khomboni o vhulunga mulayo,
a vha muvhusi wa Egipita.
54Khotsi ashu Finiasi,
nge a vha na dzangalelo ḽa u lwela Mudzimu,
o ṋewa mulanga wa vhuphrista lini na lini.
55Joshua o vha murangaphanḓa wa Israele
nge a khunyeledza zwe Mudzimu a amba.
56Khalebe o wana shango ḽa vha ifa ḽawe
nge a ṱanzilela tshivhidzoni.
57Dafita o wana ifa ḽa khuluṋoni ya lini na lini
nge a vha na tshilidzi.
58Elia o takulelwa makoleni
nge mbilu yawe ya swela mulayo.
59Hanania na Azaria na Mishaele
vho tshidzwa khavhuni ya mulilo
nge vha fulufhela Mudzimu.
60Daniele o lamukiswa mulomoni wa ndau
nge a vha a si na mulandu.
61Zwino elekanyani zwe zwa itea
zwi tshi bva kha murafho zwa ya kha murafho
uri vha fulufhelaho Mudzimu vha nga si shae nungo.
62Ni songo shushedzwa nga muthu muvhi,
vhugala hawe vhu guma nga vhuaḓa na mbungu.
63Ṋamusi u ḓo huliswa, matshelo ha tsheeho,
ngauri o vhuelela buseni ḽawe, tshimbevha tsho lovha.
64Vhananga, ivhani na tshivhindi na nungo, ni vhulunge mulayo,
ndi hone ni tshi ḓo huliswa.
65“Mukomana waṋu Simioni ngoyu, ndi mu ḓivha e munna wa vhuṱali; mu thetsheleseni misi yoṱhe, u ḓo vha khotsi aṋu. 66Judasi Makhabiosi o ḓi vha muhali u bva hanani hawe, u ḓo vha murangaphanḓa wa mmbi yaṋu, a langa mmbi ni tshi yo lwa na tshakha dza vhannḓa. 67Ni ḓo fanela u kuvhanganya vhoṱhe vhane vha tevhedza mulayo, na lifhedzela vhathu vha haṋu vhuvhi he vha itwa. 68Lifhedzani vhannḓa tshoṱhe, ni tevhele ndayo dza mulayo.”
69Ndi hone a tshi vha shudufhadza, a yo eḓela na vhokhotsi awe. 70Mathathiasi o fa nga ṅwaha wa ḓana na mahumi mana na miṱanu na muthihi (146) wa muvhuso wa Magiriki, a swiṱwa zwaloni zwa vhokhotsi awe shangoni ḽa Modeini. Vhaisraele vhoṱhe vha mu lila zwihulu.
