1 VHAKORINTA 8

₁Zwino ndi tshi ḓa kha mafhungo a zwiḽiwa zwo sumelwaho midzimu ya zwifanyiso ndi ri:

Roṱhe ri a zwi ḓivha zwavhuḓivhuḓi uri zwa ngoho ndi zwifhio. Nḓivho i yoṱhe i ro ita uri muthu a ḓihudze, ngeno lufuno lu tshi fhaṱa. ₂Arali muthu a tshi ḓifhima uri u na nḓivho, onoyo nḓivho yawe a i athu vha yone-yone. ₃Ane a funa Mudzimu ndi ene we a ḓivhiwa nga Mudzimu.

₄Zwenezwo-ha nga u ḽa zwiḽiwa zwo sumelwaho midzimu: ri a zwi ḓivha uri midzimu na u vha hone a iho, nahone a hu na muṅwe mudzimu, Mudzimu ndi muthihi fhedzi – ₅naho hu na iyo ine ya pfi midzimu, i nga vha i tshi pfi i makoleni kana fhano shangoni; iṱali midzimu ya hone na vhaṋe vha hone vha sa fheli – ₆hone riṋe ri ḓivha Mudzimu e muthihi: Ene Khotsi we a sika zwithu zwoṱhe. Ndi Ene ane ra tshilela Ene. Na Muṋe washu ri ḓivha e muthihi, Ene Yesu Khristo we zwithu zwoṱhe zwa vha hone nga Ene, na riṋe ri tshila ngae.

₇Hone ngoho iyo a i athu ḓivhiwa nga vhoṱhe; vhaṅwe vhathu vha kha ḓi vha vho ḓowela midzimu ya zwifanyiso, lune na ṋamusi vha tshi ḽa zwiḽiwa zwo sumelwaho yone vha ri ri khou ḽela u luvha midzimu ngazwo. Vha tshee na luvalo, vha pfa unga vho ḓikumadza ngazwo. ₈Zwiḽiwa a si zwone zwine zwa ri swikisa ha Mudzimu; ra sa ḽa a ri tshinyalelwi nga tshithu; naho ra ḽa a ri wani tshithu.

₉U tendelwa no tendelwa u zwi ḽa, hone ni vhone zwi sa ḓo khukhulisa vha sa athu vha na lutendo lwo khwaṱhaho. ₁₀Arali iwe u re na nḓivho yo fhelelaho wa yo ḽa thembeleni ya midzimu wa vhonwa nga uḽa ane a kha ḓi vha na luvalo, a zwi nga mu ṱuṱuwedzi u ḽa misumo ya midzimu naa? ₁₁Nḓivho heyo yau i ḓo vha yo lozwa mutendi nga iwe a si na lutendo lwo khwaṱhaho we na ene a felwa nga Khristo. ₁₂Ngauralo ni nga khakhela vhatendi nga inwi vhane vha kha ḓi vha na luvalo na vha ṱhavha mbilu, ha vha u khakhela Khristo. ₁₃Zwino-ha arali zwiḽiwa zwi tshi ita uri ndi khakhise mutendi nga nṋe, ndi khwiṋe ndi tshi ḓiilisa zwanga ṋama tshoṱhe uri ndi si mu khakhise.