1 VHAKORINTA 15

₁Vha hashu, ndi ni humbudza mafhungo maḓifha aḽa e nda ni ḓivhadza, inwi na a ṱanganedza na tou ima khao no khwaṱha. ₂Ndi one ane na tshidzwa ngao arali no nambatela eneaḽa e nda ni ḓivhadza. Arali na bva khao, aiwa, lutendo lwaṋu lu ḓo vha lu lwa mahandana.

₃One mahulwane e nda sielwa nga vhaṅwe, nda dovha nda a fhirisela kha inwi, ngea:

₉Ndi tshi ralo ndi uri nṋe ndi tou vha lupedzi kha vhaapostola, a zwo ngo vhuya zwa mpfanela na u tou pfi muapostola; hufha ndo vha ndi mutovholi wa tshivhidzo tsha Mudzimu. ₁₀Ndi vhuthu ha Mudzimu fhedzi ni tshi mmbona ndo rali; nahone ho ngo nkhathutshela zwa guma henefho, nṋe ndo shuma u fhira vhoṱhe – hone hu si nṋe, ho shuma vhuthu ha Mudzimu he a nnyitela.

₁₁Asizwo-ha, kana ndi nṋe, kana ndi vhenevhaḽa, e ra ḓivhadza ndi eneo, e na a tenda ndi eneo.

₁₂Zwi ḓa hani vhaṅwe vhaṋu vha tshi hanedza vha ri zwa u vuwa ha vhafu a zwiho? Hufha zwi zwone zwine ra ḓivhadza, zwa uri Khristo o vuwa vhafuni! ₁₃Arali hu si na u vuwa ha vhafu, izwo na Khristo ho ngo vuwa. ₁₄Zwino-ha arali Khristo a songo vuswa vhafuni, izwo vhuṱanzi hashu a vhu farisi tshithu, na lutendo lwaṋu a lu farisi tshithu; ₁₅nahone ri vho ḓo vhuya ra nga ri vha zwifhelelaho Mudzimu, ngauri ro ri o vusa Khristo vhafuni ngeno a songo mu vusa – ri amba arali zwi zwone zwauri u vuwa ha vhafu a zwiho. ₁₆Huno arali vhafu vha sa vuwi, izwo na Khristo ho ngo vuwa. ₁₇Hone-ha arali Khristo a songo vuswa vhafuni, izwo lutendo lwaṋu ndi lwa mahandana; no vha ni tshi ḓo vha ni tshee ngomu vhutshinyini haṋu! ₁₈Ndi musi na vho ri siaho vhe vha Khristo vho lovha tshoṱhe. ₁₉Arali u lavhelela hashu Khristo ho vha hu u itela zwa vhutshilo vhuno fhedzi, ho vha hu tshi ḓo vha khombo yashu i tshi fhira ya vhoṱhe fhano shangoni.

₂₀Mathina ngoho ndi ya uri Khristo o vuwa vhafuni, a vha Ene mbali ya u vulela vho ri siaho nḓila. ₂₁Vhunga lufu lwo ḓa shangoni nga muthu muthihi, sa zwenezwo u vuwa ha vhafu ho ḓa-vho nga muthu muthihi. ₂₂Vhunga vhathu vhoṱhe vho vha vha faho nga vhuthihi havho na Adamu, sa zwenezwo vhoṱhe vha ḓo vuswa vhafuni nge vha vha vhathihi na Khristo. ₂₃Hone vha ḓo vuswa nga u tevhekana: ho thoma Khristo, huno musi a tshi vhuya hu ḓo tevhela vha re vhawe, ₂₄ha vha hone u khunyelela hazwo. Ndi hone Khristo a tshi ḓo lozwa vhahulwane vha mimuya i lwaho nae na vharangaphanḓa vhayo na vhavhusi vhayo, a konou kumedza muvhuso kha Mudzimu Khotsi. ₂₅Khristo o fanela u vhusa Khotsi a vhuya a khothisa maswina awe oṱhe phanḓa ha khuluṋoni yawe a luvha. ₂₆Lufu lu ḓo vha ḽone swina ḽa u fhedzisela u kundwa. ₂₇Maṅwalo a ri,

₂₉Zwino ni ri mini-ha nga avho vhane vha ḓilovhedzisela vhafu? Vha tshi ḓilovhedzisa vha itelani? Arali vhafu vha sa vuwi, zwino avho vha lovhedzelwani? ₃₀Riṋe-ha ra ḓidzheniselani khomboni tshifhinga tshoṱhe? ₃₁Vha hashu, nṋe ndi tou vha wa u ponyoka lufu ḓuvha ḽiṅwe na ḽiṅwe. Vhukuma nga dakalo ḽanga ḽa u kona u ni zuwa nge ra vha vhathihi na Khristo Yesu Muṋe washu, ndi ri zwo tou ralo. ₃₂Zwiḽa ndi tshi lwa na mavhanda fhano Efesa, ngavhe ndo lwa lwa vhathu fhedzi ndi musi ndo wanani? Arali vhafu vha sa vuwi, izwo-ha

₃₃Ni songo fhurwa:

₃₄Dzivhuluwani ni laṱe vhutshinyi haṋu. A si u shonisa hazwo vhaṅwe vhaṋu vha sa ḓivhi Mudzimu!

₃₅Muṅwe a nga ḓi ri, “Zwi ḓo tou ita hani vhafu vha tshi vuwa? Vha ḓo vuwa vhe kha muvhili-ḓe?” ₃₆U tsilu ḽingafhani! A u ḓivhi uri u tshi gobela mbeu a i meli i songo thoma ya fa? ₃₇Nahone tshine wa gobela a si tshimela i tou vha thoro zwayo, i nga ḓi vha ya goroi kana iṅwe-vho. ₃₈I tshi vho simuwa ndi Mudzimu ane a ṋea iṅwe na iṅwe tshivhumbeo tshayo. ₃₉Hu ḓi nga ṋama dza zwi tshilaho a dzi fani; vhathu vha na yavho, zwipuka zwi na yazwo, zwiṋoni zwi na yazwo, khovhe-vho dzi na yadzo. ₄₀Ha dovha ha vha na zwisikwa zwa ngei ṱaḓulu, na zwa fhano fhasi. Vhugala ha zwisikwa zwa ngei ṱaḓulu ho fhambana na vhugala ha zwa fhano fhasi. ₄₁Ḓuvha ḽi na vhugala haḽo, ngeno ṅwedzi u na hawo-vho, nga ngei ṋaledzi dzi na hadzo-vho; na dzone ṋaledzi a dzi penyi u fana.

₄₂Zwi ḓi nga vhafu vha tshi vuwa zwi ḓo tou ralo:

Hu na muvhili une wa langwa nga tsiko yawo, ha dovha ha vha na muvhili u langwaho nga Muya wa Mudzimu. ₄₅Na Maṅwalo a ri, “Adamu muthu wa u thoma o vha tshisikwa tshi tshilaho”; hone Adamu wa u fhiledza a vha Muya a ṋeaho vhutshilo. ₄₆Hone-ha muvhili wa u thoma a si uḽa u langwaho nga Muya wa Mudzimu, ndi hoyu une wa langwa nga tsiko yawo, ha konou tevhela u langwaho nga Muya wa Mudzimu. ₄₇Muthu wa u thoma o vhumbwa nga vumba, ndi wa shango; wa vhuvhili u bva ṱaḓulu. ₄₈Vha shango vho dzhia khotsi avho wa shango, vha ṱaḓulu vho dzhia wa ṱaḓulu. ₄₉Unga ro vha ri tshi fana na uḽa o vhumbwaho nga vumba, ri ḓo fana na uḽa wa ṱaḓulu sa zwenezwo.

₅₀Vha hashu, tshani ndi ni vhudze: muthu a nga si kone u dzhena muvhusoni wa Mudzimu o tou ralo; tshi tshinyalaho tshi nga si kone u vha tshithihi na zwi sa tshinyali.

₅₁Zwino-ha ndi ni phulela tshiphiri asitshi: a ri nga fi roṱhe; u shandukiswa ri ḓo shandukiswa roṱhe, ₅₂kathihi fhedzi, nga u poidza ha iṱo, musi lufhalafhala lwa vhufhelo ha shango lu tshi lila. Lu tshi lila vhafu vha ḓo vuwa vhe kha mivhili i sa sini, riṋe vhapenyu ra mbo ḓi shandukiswa-vho. ₅₃Ndi uri hezwino zwi lovhaho zwi fanela u ambadzwa muvhili u sa lovhi, zwi faho zwi fanela u ambadzwa muvhili u sa fi. ₅₄Zwenezwo musi hezwino zwi lovhaho zwi tshi ambadzwa muvhili u sa lovhi, zwi faho zwi tshi ambadzwa muvhili u sa tsha ḓo fa, ndi hone Maṅwalo a tshi ḓo vha o khunyelela ane a ri,

₅₆Luvholela lwa lufu ndi vhutshinyi; vhutshinyi-vho vhu wana maanḓa kha Mulayo. ₅₇Kha ri livhuhe Mudzimu we a ita uri ri kunde nga Muṋe washu Yesu Khristo.

₅₈Zwino-ha vha hashu, imani no khwaṱha ni sa dzinginyei, shumelani Muṋe washu tshifhinga tshoṱhe ni sa neti no tou ḓiṋekedza, vhunga ni tshi zwi ḓivha uri u ḓinetisela Muṋe washu a si mahandana.