1 VHAKORINTA 11

₁Kandani ṋayoni dzanga, unga na nṋe ndi tshi kanda ṋayoni dza Khristo.

₂Ndi a ni khoḓa ngauri ni ḓi dzula ni tshi nnyelelwa, nga u tevhedza ndayo dze nda ni siela ni sa siedzi. ₃Hone ḓivhani uri Khristo ndi ṱhoho ya munna; munna ene ndi ṱhoho ya musadzi; ṱhoho ya Khristo a vha Mudzimu. ₄Zwo ralo munna ane a rabela kana u ḓivhadza zwine Mudzimu a funa ó khurumela ṱhoho u nyadzisa ṱhoho yawe a re Khristo. ₅Zwi ḓi nga musadzi a tshi rabela kana a tshi ḓivhadza zwine Mudzimu a funa a songo khurumela ṱhoho, u nyadzisa ṱhoho yawe. Onoyo zwi ḓi fana na musi o tou palulwa.

₆Arali musadzi a sa khurumeli ṱhoho, izwo a nga ḓi palulwa zwawe. Hone vhunga zwi tshi shonisa arali musadzi o ṱunya mavhudzi kana o palulwa, izwo-ha kha a khurumele.

₇Munna ene ho ngo fanela u khurumela ṱhoho, ngauri khae hu vhonala tshifanyiso na vhugala ha Mudzimu, ngeno kha musadzi hu tshi vhonala vhugala ha munna. ₈Tsikoni yavho a si munna we a bva kha musadzi, ndi musadzi we a bva kha munna. ₉Nahone a si munna we a sikelwa musadzi, musadzi ndi ene we a sikelwa munna. ₁₀Ndi zwine musadzi a fanela u khurumela ṱhoho u sumbedza tshileme tshawe na u ṱhonifha vharuṅwa. ₁₁Naho zwo ralo, nga he Muṋe washu a zwi vhea ngaho musadzi u ḓitika nga munna, zwi ḓi nga munna a tshi ḓitika nga musadzi. ₁₂Unga musadzi o sikwa a tshi bva kha munna, munna u bebwa nga musadzi sa zwenezwo, hone zwoṱhe hezwo zwi tshi bva ha Mudzimu.

₁₃Inwi ni zwi vhona hani? Ni vhona zwo tea musadzi a tshi rabela Mudzimu a songo khurumela ṱhoho naa? ₁₄Hu ḓi nga musi ni tshi sedza zwine munna a vha zwone, a ni vhoni zwi tshi solisea arali e na mavhudzi malapfu naa, ₁₅ngeno musadzi a tshi mu nakisa. Ayo mavhudzi malapfu o ṋetshelwa uri a pile ṱhoho yawe.

₁₆Hone arali hu na ane a kha ḓi ṱoḓa u ṱaṱa khani nga haya, ḓivhani uri hu riṋe, hu zwivhidzo zwa Mudzimu, a ro ngo ḓowela u vhona musadzi a tshi rabela a songo khurumela ṱhoho.

₁₇Litshani ndi ni sole nga zwine zwa anzela u itea musi no kuvhangana: a zwi tsha fhaṱa, zwi vho thutha. ₁₈Tsha u thoma ndi pfa upfi musi ni tshi kuvhangana tshivhidzo a hu na pfano, hu na u khethekana-khethekana nga zwigwada; nahone zwi nga ḓi vha zwi zwone. ₁₉Phambano dzone dzi a ṱoḓea, uri hu vhonale vho imaho ngohoni.

₂₀Musi ni tshi kuvhangana a tshi tsha vha Tshilalelo tsha Muṋe washu tshine na ḽa hetsho, ₂₁ngauri musi ni tshi ḽa, muṅwe na muṅwe u gidimela u ḽa mbuvha yawe a si tsha londa vhaṅwe, ha swika hune muṅwe a ṱuwa na nḓala, ngeno muṅwe o ita na u kambwa. ₂₂Kani a ni na mahaya hune na nga ḽa na nwa hone? Kana ni vho tou nyadza tshivhidzo tsha Mudzimu na shonisa vhashai? Ndi ḓo tou ri mini nga mafhungo ayo? Ndi ni khoḓe kani? Na kathihi, hu si kha hezwo-vho lini!

₂₃Muṋe washu o ntsiela ndaela, nṋe nda i fhirisela kha inwi. I ri: Muṋe washu Yesu vhusiku vhuḽa he a kumedzwa maswina o dzhia vhurotho ₂₄a livhuha Mudzimu, a vhu ṅwatela vhafunziwa a ri, “Hoyu ndi muvhili wanga; ndi u kumedza ndi tshi itela inwi. Ni ḓi zwi ita nga u rali hu vhe u nnyelelwa.” ₂₅Vho no lalela a dovha a dzhia na tshinwelo a ri, “Itshi tshinwelo ndi mulanga muswa u khwaṱhiswaho nga malofha anga; ni ḓi tshi nwa nga u rali hu vhe u nnyelelwa.”

₂₆Zwino-ha misi yoṱhe ni tshi ḽa vhurotho uho na nwa tshinwelo itsho, ni ḓivhadza lufu lwa Muṋe washu, u swika a tshi vhuya.

₂₇Zwenezwo ane a ḽa vhurotho ha Muṋe washu kana a nwa tshinwelo tshawe nga nḓila i songo fanelaho, u ḓiovhela mulandu wa u khakhela muvhili na malofha a Muṋe washu. ₂₈Muthu kha a thome u ṱola mbilu yawe a sa athu ḽa uho vhurotho na u nwa itsho tshinwelo, ₂₉ngauri ane a sokou ḽa a nwa a sa londi uri ndi muvhili wa Muṋe washu, u ḓiovhela mulandu a vho ḓo laṱwa. ₃₀Ndi zwine tshivhidzoni ha vho anda vhahoṱa na vhalwadze, vha na tshivhalo vha ita na u ri sia. ₃₁Ngavhe ri thome u ṱola mbilu dzashu, ndi musi ri songo haṱulwa nga Mudzimu nga u ralo. ₃₂Hone zwino ri khou haṱulwa na u laiwa nga Muṋe washu, uri ri sa vho ḓo laṱwa tshoṱhe na shango ḽino.

₃₃Zwino-ha vha hashu, musi ni tshi kuvhanganela Tshilalelo ni lindelane. ₃₄A re na nḓala kha a bve o ḽa hayani, ni sa vho ḓo kuvhanganela u ḓiovhela khaṱhulo.

Maṅwe ndi ḓo dzudzanya ndi tshi ḓa.