ZAKARIA 10

₁Humbelani Muṋe washu mvula

nga tshifhinga tsha mvula dza tseula.

Muṋe washu ndi Ene a no ruma makole

a nisa mvula.

U ṋea vhathu zwiḽiwa, kholomo a dzi medzela hatsi.

₂Midzimu ya zwitungulo i bula zwi sa tshidzi,

mingome i vhona mabono a mazwifhi,

vha anḓadza miloro i si na tshithu ngomu,

vha khuthadza vhathu lwa mahandana.

Ndi zwine vhathu vha xela unga nngu,

vha tendeleka ngauri a vha na mulisa.

“Ndo sinyutshela vhatsinda

vha lisaho vhathu vhanga,

ndi ḓo lifhedza khwali.

Vhukuma Nṋe Yahavee Mulangazwoṱhe

ndi ḓo londola sambi ḽa nngu dzanga,

wone muṱa wa Juda,

nda vha ita unga bere i ṱongaho nndwani.

₄Tombo ḽa thikho ḽi ḓo bva kha Juda,

khokho ya dennde i ḓo bva khae,

na tshiṱangu tsha nndwa tshi ḓo bva kha ene,

vhakandeledzi vhoṱhe vha ḓo thathwa ngae.

₅Nndwani vha ḓo nga vhahali

vhane vha kandekanya matope a mikotoni:

vha ḓo lwa vha kunda vhanameli vha dzibere,

ngauri Yahavee u navho.

₆Vhathu vha Juda ndi ḓo vha ṋea maanḓa,

vha muṱa wa Josefa ndi ḓo vha ṋea gundo.

Ndi ḓo vha vhuedzedza hayani ngauri ndi vha pfela vhuṱungu.

Zwi ḓo nga a tho ngo vhuya nda vha landula.

Ndi uri Mudzimu wavho ndi Nṋe Yahavee,

ndi ḓo fhindula thabelo dzavho.

₇Vhathu vha Efraimi vha ḓo nga vhahali;

mbilu dzavho dzi ḓo takala vha nga vho nwa waini.

Vhana vhavho vha ḓo zwi vhona vha pembela,

mbilu dzavho dzi ḓo fhululedza Yahavee.

₈Ndi ḓo vha vhidza nga muludzi nda vha kuvhanganya.

Vhukuma ndi ḓo vha tshidza, vha dovha vha anda unga kale.

₉Naho ndo vha balanganya na dzitshakha,

vha ḓo ḓi nnyelelwa vhe mashangoni a kule.

Vhone na vhana vhavho vha ḓo tshila, vha vhuya hayani.

₁₀Ndi ḓo vha pfulusa Egipita nda vha vhuisa,

nda vha kuvhanganya vha tshi bva Ashuru,

nda vha ḓisa shangoni ḽa Giliadi na Libanoni,

na henefho hu nga si vha eḓane nga u anda.

₁₁Ndi ḓo shusha lwanzhe,

nda rwa magabelo alwo;

nda xisa mativha oṱhe a Nile,

nda thutha zwoṱhe zwine Vhaashuru vha ḓitika ngazwo,

nda dzhiela Egipita luḓo lwa vhuhosi.

₁₂Nṋe Yahavee ndi ḓo vha ṋea maanḓa,

vha tshila nga maanḓa a dzina ḽanga.”

Hu amba Muṋe washu!