NZUMBULULO 20

₁Nda vhona muruṅwa a tshi tsa a tshi bva ṱaḓulu o fara khii ya dindi na geḓane khulu. ₂A fara ḽiḽa ḓiragoni, heḽiḽa ḽiṋowa ḽa kale-kale, ene diabolo, ene Saṱhane, a mu vhofha, uri a dzule o vhoxwa hu vhuye hu fhele miṅwaha ya 1 000. ₃Muruṅwa a mu posa dindini a khiela a ita na u shatela uri a si tsha ḓo kona u dovha u fhura dzitshakha hu vhuye hu fhele yeneyo miṅwaha ya 1 000. Ngavhuya u ḓo vhofhololwa tshifhinganyana.

₄Nda vhona dzikhuluṋoni, vho dzulaho khadzo vhó ṋewa maanḓa a u haṱula. Nda dovha nda vhona mimuya ya vhathu vho vhulawaho nga u tou tumulwa dziṱhoho nge vha nambatela vhuṱanzi ha Yesu na ipfi ḽa Mudzimu. Vhone a vho ngo luvha ḽivhanda kana tshifanyiso tshaḽo; a vho ngo swaiwa nga luswayo lwa ḽivhanda kha phanḓa dzavho na zwanḓa zwavho. Vha dovha vha tshila vha thoma u vhusa na Khristo vhe mahosi miṅwaha yoṱhe heyo ya 1 000. ₅Ndi hone u vuwa ha u thoma. Vhaṅwe vhafu ho vhuya ha fhela miṅwaha heyo ya 1 000 vha sa athu dovha vha tshila. ₆Avho vha no ḓo wanala kha u vuwa ha vhafu ha u ranga vha na mashudu, ndi vho ḓikumedzaho Mudzimu; lufu lwa vhuvhili a lu tsha ḓo vha vhusa. Vha ḓo vha vhotshifhe vha Mudzimu na vha Khristo, vha vhusa nae ha vhuya ha fhela miṅwaha ya 1 000.

₇Hu ḓo ri ho no fhela miṅwaha ya 1 000, Saṱhane a vhofhololwa a bva dzhele, ₈a tshimbila a tshi fhura dzitshakha hoṱhe-hoṱhe, dza Gogo na Magogo, a vha kuvhanganya uri vha bve pfumo, vhó ḓala sa muṱavha khunzikhunzini ya lwanzhe. ₉Vha balangana na ḽifhasi vha tanga mishasha ya vhathu vha Mudzimu na muḓi une a u takalela. Hone ha wa mulilo u tshi bva ṱaḓulu wa vha lozwa. ₁₀Zwenezwo uḽa diabolo we a vha fhura a poswa ishani ḽa mulilo na tsevhela, fhaḽa he ha poswa ḽivhanda na muporofita wa u zwifha. Henefho vha ḓo tambudzwa vhusiku na masiari lini na lini.

₁₁Nda vhona khuluṋoni khulu tshena na o dzulaho khayo. Ḽiṱaḓulu na ḽifhasi zwo vha zwo nyamalala henefho phanḓa hawe zwi si tsha vha na vhudzulo. ₁₂Nda vhona vhafu, vhahulwane na vhaṱuku, vho ima henefho phanḓa ha khuluṋoni, bugu dza vulwa. Ha dohwa ha vulwa iṅwe bugu; ndi bugu ya vha tshilaho. Ndi hone vhafu vha tshi haṱulwa hu tshi tevhedzwa mishumo yavho nga he ha ṅwalwa dzibuguni. ₁₃Lwanzhe lwa ṱanza vho felaho ngomu halwo. Lufu na vhudzulavhafu zwa humisa vhe vha vha vho iswa hone, vhoṱhe vha haṱulwa hu tshi tevhedzwa mishumu yavho. ₁₄Zwenezwo lufu na vhudzulavhafu zwa kudzwa ishani ḽa mulilo. Heḽo isha ḽa mulilo ndi lufu lwa vhuvhili. ₁₅Muṅwe na muṅwe we dzina ḽawe ḽa vha ḽi songo ṅwalwa buguni ya vha tshilaho a kudzwa ishani ḽeneḽo ḽa mulilo.