DZIPHISALEMA 69

₁Mudzimu, ntshidze,

maḓi o guma nga mukulo wanga!

₂Ndo mbwandamela dopeni,

a hu na vhukando.

Ndo wela dzivhani ḽihulu,

lutsinga lu ṱoḓou nkumba.

₃Ndo neta nga u ṱavha mukosi,

mikulo yanga i ita na u rema;

maṱo anga o ita na u punda

ndó lindela Mudzimu wanga a tshi nndamulela.

₄Vhane vha sokou mmbenga ndi si na tshe nda tshinya,

vho anda u fhira mavhudzi anga.

Maswina anga a sokou nnzwifhelela;

vha na nungo, vha ṱoḓa u mmbulaha.

Vha ri ndi vhuedzedze zwe nda si tswe.

₅Mudzimu, Iwe u ḓivha vhuhwarahwara hanga,

milandu yanga a i koni u u dzumbama.

₆Muṋe wa zwoṱhe,

Muṋe washu Ramaanḓaoṱhe,

ngavhe vha u fulufhelaho vha sa shoni

vha tshi mmbona;

Mudzimu wa Israele,

vha u luvhaho ngavhe vha sa shoni nga u vhona zwine nda itwa.

₇Ndi nyadzelwa Iwe,

hezwi ndo ambara ṱhoni.

₈Vha hashu vha vho nnyita mutsinda,

ndi nga asili muṱani wa hashu.

₉Ndo no tou fhelela nga mbilu i tshi swela nnḓu yau,

maṱamba ane a poswa kha Iwe a wela kha nṋe.

₁₀Ndi ḓiṱukufhadza nga u ḓidzima,

ndi zwine vhathu vha nnyadza.

₁₁Ndi tshi ḓivhuedza nga u ambara saga,

ndi tou itwa ṱano.

₁₂Mikotoni hu pfala dzina ḽanga fhedzi,

zwidakwa zwi ita na u nnyimba.

₁₃Hone a vha nṋe ndi ḓo rabela Iwe Muṋe washu

nga tshifhinga tshine wa funa;

Mudzimu, u na lufuno luhulu,

ipfa thabelo yanga;

Iwe u a fulufhedzea, u ḓo ntshidza.

₁₄Mphalale,

ndi si mbwandamele dopeni,

mponyokise kha maswina anga,

u nṋule dzivhani!

₁₅U songo litsha ndi tshi kumbwa nga lutsinga lwa maḓi,

nda milwa nga lwanzhe,

nda govhedzwa nga dindi.

₁₆Muṋe washu, mphindule;

lufuno lwau lu takadza hani!

Khathutshelo yau ndi khulu,

u songo tsha mpfuralela.

₁₇U songo dzumbama mulanda wau;

ndi khomboni khulu,

ṱavhanya u mphindula!

₁₈Iḓa u mmbofholole,

nndamulele u fhumudze maswina anga!

₁₉Iwe u ḓivha uri ndi nyadziwa hani;

ndí fhano ndo bva mvumbo,

ndo shona,

tendá maswina anga oṱhe á songo u dzumbama.

₂₀Maṱamba o pwashekanya mbilu yanga,

ndo kulea nungo;

ndo lavhelela u pfelwa vhuṱungu,

zwe ndi bva vhubvo;

nda ri ndi ḓo fhumudzwa,

zwe vhutoto.

₂₁Ndi tshi pfa nḓala vho mpha vhutulu;

ndó farwa nga ḓora vha mpha viniga.

₂₂Vha tshi ḽa nduvho dzine vha u ṋekedza,

nga dzi vhe khunḓa vha wele ngomu;

ngavhe madzanga avho a tshi vha tshikwekwe tsha vha fasha!

₂₃Nga vha pofule!

Miṱoḓo yavho i kulee!

₂₄Shululela mbiti dzau nṱha havho!

Vha sinyutshele u vha lozwe!

₂₅Miḓi yavho nga i sale e matumba,

nḓuni dzavho hu si tsha sala muthu!

₂₆Vha khokhovhedza o no ḓi rwiwaho;

vha tshi vhona mbonzhe dza we wa mu phula,

vha a mu holedza.

₂₇Vhuvhi havho nga vhu lifhedzwe nga vhuvhi!

Vha songo vhuya vha ṱamba tsengoni!

₂₈Madzina avho nga a thuthwe buguni ya vha tshilaho!

Kha vha bviswe kha mutevhe

wa vhathu vhau vha fulufhedzeaho!

₂₉A vha nṋe, ndo kulea nungo,

ndi pfa vhuṱungu;

Mudzimu, ntakuse u ntsireledze!

₃₀Ndi ḓo renda Mudzimu nga luimbo,

nda livhuha,

nda ḓivhadza vhuhulu hawe.

₃₁Hezwo zwi ḓo takadza Muṋe washu

u fhira zwiṱhavhelo zwa dzikholomo,

u fhira u mu ṋekedza mboho yo vhinaho.

₃₂Vhakandeledzwa vha ḓo ri u zwi vhona vha takala,

vha no luvha Mudzimu vha ḓo ṱuṱuwedzea.

₃₃Muṋe washu u thetshelesa vha lilaho,

vhathu vhawe vho vhoxwaho ha vha hangwi.

₃₄Ḽiṱaḓulu na ḽifhasi, rendani Mudzimu

na lwanzhe, na zwoṱhe zwi re khalwo!

₃₅Mudzimu u ḓo tshidza Tsioni,

a vusa miḓi ya Juda;

vhathu vhawe vha ḓo dzula hone,

shango ḽa vha ḽavho.

₃₆Ḽi ḓo vha ifa ḽa vhaḓuhulu vha vhalanda vhawe;

vhane vha mu funa vha ḓo dzula henefho.